Pandapek nan mangatokan adaik minang indak lai diamalkan di malaysia adolah sabuah pandapek atau tinjauan nan indak objektif, kemudian ruang lingkupnyo talalu gadang, sebab Malaysia ko dari Sabah sampai ka Sarawak, dari Perlis sampai ka Johor. baa baitu ambo katokan , dek urang minang nan di rantau, bukannyo ado baniniak mamak, bukan bakampuang bahalaman, indak basuku jo baindu, maalumlah awak di rantau urang, papatah awak juo manyabuikkan, di ma bumi dipijak di situ langik dijunjuang, di ma aia disauak, di situ rantiang dipatah. Kok kabaradaik awak kato awak, di ma dilatakkan adaik nantun, di ma pangulu andikonyoa, di ma balerong jo rumah adaiknyo. Ciek lai pulo nan takana, adaik nan mano nan dimakasuik, apokoh adaik sabana adaik, atau adaik nan diadaikkan, atau adaik nan taradaik, ataunyo adaiik istiadaik. Tapi sapanjang pancaliakkan ambo, nan alah lamo di Malaysia, urang awak nan di subarang ko, indak maninggakan budaya minang, baik baralek atau kamalangan, lai juo kunjuang bakunjung, sarato tolong jo manolong. Tapi kok nan saban adaik nan kadisabuik, caliaklah urang nagari sambilan, adaik minangnyo kokoh sampai kini, rajo jo dubalang indak tabuang, basa ampek balai lai ado juo, di sungai ujuang jo do johol, di jalabu jo sri menanti, tapi namonyo nan agak batuka, datuak undang namo dibari. Sadangkan di awak di nagari minang, di tanah minang nan tacinto, pusek jalo pumpunan ikan, rajo lah ilang antah kama, manti jo dubalang usah disabuik, apolai ka batagak macam dahulu, jauah sakali tu dunsanak. Adaik di awak tingga namo, santano tunggua nan alah lapuak, buahnyo ado di nagari sambilan, nan masih subur sampai kini. Lai sapaham sanak jo hambo.<br><br>Post edited by: muallif, at: 2007/07/20 10:11