|
 Ari  akaik kapatang ko, Pudin jo mak Kari pai baralek ka kampuang Tan Koti. Salasai alek, katigonyo bakuliliang manyilau-nyilau, kok ado pakaro nan ganjia dimato.
Panek bajalan, katigonyo singgah ka lapau di tapi labuah. “Kadai sia ko, Tan?” tanyo Pudin kutiko sampai di halaman. “Adiak Ayah den,” jawek Sutan. “Induak bako namonyo di Minangkabau,” semba mak Kari. “Kok baitu Sutan anak pisang tibonyo dek urang di siko,” uleh Pudin. “Bana...”
“Assalaamu’alaikum,” sorak Tan Koti dari halaman. Tadanga jawek dari dalam, “Wa alaikummussalaam... Masuaklah. Wakden sadang di balakang.” Indak lamo antaronyo, kain pintu basibak. Urang gaek bakaco mato taba bajalan sambia manggegek-gegek. Tan Koti bagageh manyonsong, mambimbiang tangannyo ka kurisi kayu nan talatak di suduik. “Sia kini ko?” tanyo gaek sambia mamelokan latak kacomato. “aden Pak! Buyuang Koti,” jawek Sutan ka pangka talingo gaek. “Ooo, kaminum kopi?” “Buyuang Koo...tiii!” ariak Sutan labiah kareh. Gaek maangguak paham. “Anak Sidi Kalek?” “Iyo, Pak!” “Anaknyo nan dima? Jo bininyo nan kabara?” tanyo gaek. “Anak Piak Intan. Bini baliau nan ka tujuah baleh!” jawek Sutan malu-malu. “Tapi baa mangko waang mangecek maariak-ariak di pangka talingo den? Ang kecekan pakak den?” Tan Koti tapana. Dikironyo gaek ko pakak, kironyo nyariang juo pandangarannyo. Mukonyo manyirah dek malu. Mak Kari tabasuik dek galak. Mandanga urang galak, gaek mamandang ka suduik. “Baa mangko galak waang? Bacimeehan, den?” kecek gaek mandareh. Mak Kari langsuang manutuuik muluik jo tapak tangan. Tan Koti manyorong, “Itu konco ambo dari nagari Matipucuak mah, Pak. Namonyo mak Kari,” Tan Koti manjalehan. “Ooo... Nan mambuek minuman Pokari tu yo?” “Indak, Ngku,” jawek mak Kari manutuik malu. “Ado hubuangan jo Mariah Keri, panyanyi Amerika tu?” Tan Koti paham jo kakobeh apak eteknyo, baliau andak mampagarahan mak Kari. “Itu anak baliau jo urang Amerika, Pak,” semba Tan Koti sambia manahan galak. Mak Kari mambulancikan mato. Gaek tagalak sengeang. “Baleak-leak se katurunan Ang mah,” kecek gaek. Sutan jo mak Kari malulua galak. “Maa si Pudin?” tanyo Sutan tibo-tibo. “Antahlah. Tadi sairiang jo ambo,” jawek Mak Kari. “Tadi inyo taicia di balakang. Mungkin pai kajamban.” Tibo-tibo tadanga urang tapakiak dari halaman. “Aduahhh..! Baruak kalera!” Urang di lapau malengong ka lua. Di sinan Pudin sadang marabo ka Baruak, sambia mamacik talingonyo. “Dek a, Diin?” tanyo Tan Koti jo Mak Kari sairiang. “Dilapianyo pangka talingo den jo ikuanyo!” Sutan jo Mak Kari saliang pandang. Kaduonyo tagalak gadang. Gaek takekeh mancaliakan muluiknyo nan indak bagigi. Baruak mancibia sambia manggauik-gauik ikua. “Makonyo caliak-caliak nan kadipagarahan,” cimeeh gaek. *** Kopi talatak di ateh meja. Carito baraliah anyo lai. Sajak dari sajarah ranji katurunan hinggo ka adaik salingka nagari. Panek mangaji sajarah, carito babaliak ka pangka kaji, iyo carito Baruak nan malapia pangka turiak Pudin tadi. *** Lobo tamahak tabiaik buruak nan dipakai Baruak. Jikok mancaliak barang nan katuju inyo mamakiak-makiak sarato mancak-mancak kian kamari. Diagiah ciek mintak duo. Dapek duo mintak tigo. Kok indak ado jatah nan kadiambiaknyo, punyo kawan dirabuik rampehnyo. Walau muluik panuah dek makanan, pipi gambuang dek buah-buahan, tangan jo kaki lah barisi pulo, tapi nan Baruak indak namuah pueh juo. Tangannyo manggapai-gapai sambia malompek kian kamari. Sasudah paruiknyo kanyang, awak dicibia-annyo pulo! “Kok basobok jo pakaro nan bakcando itu sorongan camin kaco ka mukonyo,” pasan gaek. “alah bacubo jo caro itu...” “Basobok jo camin inyo marabo.” “Itu dek karano mancaliak buruak roman mukonyo. Bak papatah urang pandai, Baruak bacamin, muko dibalah.” pituah gaek cando urang sungguah. Tan Koti mangarinyiakan kaniang. Kato-kato nan tadanga sabanta ko taraso jangga di talingonyo. Biasonyo urang manyabuik, Buruak muko camin di balah. Inyo ka manyolang tapi gaek lah basuaro. “Eh.., salah..! Mungkasuik ambo, nan buruak muko, camin nan salah. Ehhh...” gaek icak-icak salah. “Buruak muko camin dibali!” sorong Mak Kari. Katigonyo takakah dek galak. “Itu dek Baruak nan bapitih, tantu lai dapek mamborong camin supayo indak tampak buruak muko,” ciloteh Tan Koti. Sakutiko lapau panuah dek galak. Mandanga dirinyo dipagunjiangan, Baruak maoyak tonggak kandangnyo sambia mamakiak-makiak. Urang di lapau mamandang ka lua. Baruak manunggiang mampacaliakan mambang ikuanyo. Sudah tu inyo mancibia dari salo karampangnyo. “Mambang lancik-e,” semba Mak Kari sambia manunjuak ka Baruak. “Ari dek tarang bulan tu mah,” sambuang gaek. “A hubuangan Bulan jo tumbuang Baruak?” tanyo Pudin. Gaek galak tasengeang. Sudah tu inyo bakato, “Tanyoanlah ka Baruak tu. Manga tanyoan ka den?” jawek gaek sambia tabatuak-batuak.
This e-mail address is being protected from spam bots, you need JavaScript enabled to view it
www.padangekspres.co.id
Trackback(0)
 |
TrackBack URI for this entry
Subscribe to this comment's feed
