|
Pituah |
Dalam awa akhia mambayang
Dalam baiak kanalah buruak
Dalam galak tangih ka tibo
Hati gadang hutang kok tumbuah |
|
|
Kiamaik Ketek |
|
|
|
Ditulis oleh Soetandi ATeH
|
|
Sabtu, 22 Maret 2008 |
 alah tigo hari hujan labek indak baranti manimpo kampuang. Aie Batang Lundi lah nampak samakin panuah. Batang aie tu mailie dareh, labiah dareh dari pado nan biaso. Sawah-sawah disuok kida nyo nan salamo musin paneh kapatang indak balangih, kini panuah taganang jo aie gadang nantun. Tambah lamo Batang Aie Lundi tu batambah tenggi juo, malimpah marambah ma hanyuikkan tapian bagai,......... Kudian lah muloi pulo masuak kadalam kampuang.
Sabananyo Batang Lundi tu indak gadang bana doh. Batang Aie itulah nan alah mahiduik i masarakaik kampuang tu sajak saisuak, turun tamurun. Nan kini nampak cando berang agaknyo............ malimpahkan aie nyo masuak kadalam kampuang nantun.
Makonyo majalang parak siang tu lah, tadanga bunyi tontong dari rumah rundo, basambuang pulo jo tontong dari surau, dilangkok i jo tabuah musajik, manjagokan umaik nan sadang lamak lalok. Urang kampuang bi tasintak dek bunyi tontong jo tabuah nan manduo tu. Sudahtu bi takajuik dek aie alah masuak kadalam rumah surang-surang....... Urang lah muloi kalibuik. ado nan mamikue kasue, ado nan maangkek lamari, ado nan manungkuih kain baju jo ceda bunta atau jo kain saruang nan laweh, ado pulo nan mairik-irik taranak,......bibalari katampaik nan katinggian. paja-paja ketek manangih-nangih basah kuyuik badukuang jo mandeh atau jo apaknyo.
Mulonyo urang balari kasurau, karano urang kampuang tu picayo baraso surau adolah tampaik manyalamaikkan diri nan paliang elok. disinan Tuhan kamalinduangi umaikNyo. Disinan ado Labai Budin nan kamandoa kan bagai. Tapi katiko tibo disurau, aie nampak lah masuak pulo. Di jandela surau, lai nampak Labai Budin tagak manggigie kadinginan.
Ha, malah Labai....... lah naiak aie ko....... bagageh malah.
Iyo, iyo......taruihlah taroooo......
Awanyo tagak juo baru, sambie mamacik dama nan maijok-ijok ditangannyo.
Tuhan nan ka manyalamaik kan den disiko.......
Kecek Labai Budin dalam hatinyo. Muluiknyo manggumam taruih mambaco doa jo dikie, sambie sakali-sakali dipiciangkannyo matonyo, nak putuih ma’ripaik.
Hari alah samakin tarang, tapi nan hujan labek, turun juo baru, cando indak kabaranti-baranti. Nan aie Batang Lundi cando indak tatahan kan lai,.... samakin naiak juo. Tapian indak nampak lai.... alah hilang disarundo dek aie gadang tu. Musala Kaciak tampaik sumbayang dakek tapian tu, indak nampak pulo lai,.... alah hanyuik dilendo aie. Urang kampuang bagaduru bakumpue di dikantue PKK nan agak katinggian. Paja-paja ketek hiruak pikuak bimanangih. induak-induak baitu pulo, ado nan manangih, ado nan maluluang-luluang dek karano ado harato-bando nan indak ta bao.
datuak Maruhun nan Kapalo Nagari, nampak bakarajo kareh manyusun dorom tigo buah. Katigo dorom tu dikabeknyo jo kawek sarato tali, diagiahnyo balantai papan, untuak dijadikan rakik.
Jo rakik itulah baliau ba mantel-mantel, dikawani dek si Mu’in jo si Kurin nan jadi Hansip, bakuliliang kampuang mancari kalau-kalau ado masarakaik nan tatingga atau tarandam dek banjir bandang tu.
Tibo dakek surau, nampak Labai Budin tagak dijandela sambie basalimuik jo kain saruang. Nan aie nampak alah tinggi, masuak kadalam surau tu.
Labaiii..... basugiro malah....... aie lah tinggi ko mah.....
Datuak Maruhun basorak dari ateh rakik nyo. Nan Labai Budin nampak tanang-tanang sajo. Diangkeknyo tangannyo tinggi-tinggi:
Taruih lah nyiak Wali,...... nak ambo jago surau awak ko....
Aaaa pulo nan ka Labai jago? Aie lah naiak ko mah...... Pakuasi lah lai kateh..... Muah naiak kamari........ka rakik koah.......
.............Taruih selah angkuuuu.....
Labai Budin batahan juo baru.
Tuhan Allah nan kamanyalamaikkan den disurau ko mah...... Indak tantu dek urang-urang tu doh........
Gumam labai Budin pulo, surang.
Datuak Maruhun indak mangecek bagai lai. Ditingga kannyo malah surau Labai Budin tu hanyo lai. Jo rakik dorom tu batigo inyo taruih manguliliangi kampuang. Babarapo pondok nan dari batuang jo buluah, nampak lah ado nan hanyuik dilendo aie. Babarapo taranak nampak pulo hanyuik tarapuang-apuang....... ado nan alah mati, tapi ado pulo nan masih ma angok-angok..........Diujuang kampuang, di pandakian labuah nan katinggian, nampak ado ciek oto baranti. Mati masin agaknyo, pikie Datuak Maruhun. Mako dikayuahnyo pulo rakik nyo kasinan, nak manolong.
Kironyo diujuang labuah tu pak Camaik jo anak buahnyo nan bi tagak disinan.
baa, wali? Baa urang kampuang?
Aman pak Camaik,........... alah pakuasi samantaro ko........... tapi alun bimakan bagai lah.....
saba nyiak wali..... cacah lai tibo bantuan dari bupati. Ambo alah kontak kateh.......Tapi samantaro lai dapek nyiak wali mambao mi kariang jo aie akua ko? Iko nyoh, nan dapek ambo baok samantaro....... Bagi-bagi kan malah.......
Pak Camaik mangaluakan kotak-kotak karuduih mi jo galeh aie akua dari ateh oto nyo. Lai sapuluah kotak karuduih tu, bapasokan naiak kateh rakik dorom tu. Tapaso pulo si Mu’in surang lai nan dapek naiak rakik tu, jan barek bana. Si Kurin mangawani nyiak Wali jo Camaik disinan. Dikayuahnyo pulo rakik tu dek si Mu’in baliak katampaik urang-urang mangungsi dikantue PKK tadi.
Samantaro tu Nyiak Wali jo pak Camaik tagak juo baru bamantel, ba ujan-ujan.
Lah sa gaekko umue ambo hiduik, iyo baru sakali ko baru nagari kanai banjir nan bak galodo ko, pak Camaik.
Kecek Datuak Maruhun.
Nan namonyo bala,...... iyo indak tantu tibo nyo doh, nyiak wali.
Jawek pak Camaik pulo mangecek ba yobana.
Nampak dek ambo..... ko bala ko babuek dek umaik ko mah Pak Camaik. Rimbo dibukik alah tandeh barambahi jo masin..... Kini, itu nan bi hanyuik manimpo kampuang....... Indak ado batang kayu nan kamanahan aie lai.......
Kok itu...... itu parentah dari ateh tu mah wali,.... indak dapek diawak lai tu.
Lah tibo bala nan bak nangko? Aaaa nyo nan kecek urang ateh tu?
Pak Camaik indak manjawek bagai lai. Agak tajam irih pisau nyiak wali ko mah....... takana dek inyo babarapo bulan nan lapeh ado toke kayu diutuih dek urang pusek, nan maagiahnyo ampolop taba,........... tando tarimo kasi.....
Indak baitu doh ko wali..... nak ambo tokok kawek baliak ka Bupati.... sampaikan sajo salam ambo taroh ka urang kampuang. Cah lai tibo bantuan tu handaknyo......
Pak Camaik basalam jo Datuak Maruhun, sudah tu bagageh awanyo naiak kateh otonyo baliak.
Alah manjalang ukatu asa, nan hujan alah agak baranti. Tapi nan Batang Lundi batambah gadang aie nyo. Ruponyo aie dari gunuang indak tatahankan lai. Kampuang alah tarandam kasado alahnyo. Kantue PKK alah samakin sampik. Rumah-rumah urang nan lai indak tarandam alah dipakai pulo untuak manampuang urang banyak, nan pakuasi tu. Iyo alah bagalemak peak jadi nyo dima-dima........ Nan aie batambah naiak juo. Tangih paja-paja ketek sambuang basambuang, dek kadinginan bacampue jo litak paruik bagai.
Surau tampaik Labai Budin, nampak alah tahereang, tarandam sampai ka dakek loteang nyo. Labai Budin mamanjek kateh pagu. Nan inyo iyo indak juo namuah maningga kan suraunyo tu. Pikierannyo tatap yakin baraso Tuhan nan ka tibo manyalamaikkan hiduiknyo beko.
Katiko itu lah bantuan tibo dari Bupati. Ampek parahu apuang-apuang, balapehkan katangah banjir tu, sasudah bapompa jo angin. Urang-urang kampuang, muloi dari anak-anak ketek, induak-induak, urang gaek-gaek, banaiakkan kateh parahu apuang-apuang tu, babao ka pangungsian nan labiah aman. Nan mudo-mudo basuruah maatur pambagian makanan, manjago kaamanan, mambuek dapue umum bagai, cando katiko parang saisuak.
Samalam nantun Datuak Maruhun sabagai wali nagari, iyo indak lalok dibueknyo. Baliau maetong rakyaik kampuangnyo surang-surang. Tanyato iyo kurang surang......... Labai Budin nan indak ado. Inyo surang nan alun mangungsi lah.
Malam tu juo jo parahu apuang-apuang, urang SAR, pai babaliak kasurau. Nan nyiak Wali nan alah baumue tu, indak talok barangkek lai. Badannyo rangkik-rangkik dek karajo kareh sahari tadi.
Tibo disurau, indak ado nan nampak lai. Sadonyo kalam. Dicubo menyorot jo lampu tarang dek urang-urang SAR tu......... Nampak surau lah runtuah tahereang, tarandam sampai ka loteang. Atok nyo samiang nan nampak lai......Antah dima Labai Budin kini ko......
Baulang-ulang namo labai Budin diimbaunyo kareh-kareh jo pangareh suaro bagai.... indak ado nan manjawek. Kasudahannyo batingga kan samiang lai surau nantun. Labai Budin dianggap alah hanyuik dek aie gadang....... Lah jatuah korban surang..........Ka baa juo lai........ pangana Nyiak Wali, kutiko mandapek laporan.
Nan sabana nyo Labai Budin lai disurau tu juo baru. Lai tadanga dek inyo urang maimbau namonyo bagai. Tapi disangajo nyo haniang samiang, karano dianggapnyo urang tu manggaduah dikie nyo sajo. Labai Budin sadang asik badikie diateh pagu, sambie manantikan panyalamaik an dari Allah Ta’ala.
Manjalang tangah malam tu hujan tibo babaliak. Nan sakali ko disaratoi jo patuih tongga sarato kilek bagai.
Labai Budin takajuik katiko patuih-tongga tu tanyato manembak surau....... Labai Budin tatilantang, tacampak kadalam aie...... tarandam....... garondoh pondoh jo surau nan muloi runtuah badarak-darak................
Taraso dek inyo badannyo malayang, tibo disuatu tampaik. Disinan ado urang-urang babaju putiah, basaroban........ tasanyum ka inyo.
Salamualaikum Labai......
Wa... alaikum salam....... sia ko garan?
He, he..... kami ko malaikaik.
Hah? Jadi......... ambo ko alah mati?
Urang tu maangguak-angguak. Labai Budin tangango.
Kok bak nantun...... batanyo malah ambo..... lai buliah?
Buliah...... aaaa nan ka tanyo Labai?
Baa mangko ambo indak disalamaikkan dek Tuhan? Ambo sadang badikie manantikan itu....... tanyato kini ambo alah mati samiang.......
He, he....... tadi lai ado urang nan maajak Labai pai mangungsi?
Iyo lai..... wali nagari...... Tapi ambo manantikan Tuhan nan kamanyalamaikkan ambo.
Itulah...... urang tu lah nan dikirim dek Allah untuak manyalamaikkan Labai.... Katiko urang baparahu tibo malam-malam maimbau-imbau namo Labai, baa mangko indak bajawek?
Iyo dek ambo sadang badikie,.......mananti partolongan dari Tuhan samiang nyoh.......
Itu lah pulo nan dikirim dek Tuhan ka manyalamaikkan Labai sakali lai, tapi Labai indak juo namuah.......
Ta jahaya Labai Budin. Taraso kini baraso kaji nyo iyo alun putuih lah sampai kasinan. Pado hal salamo nangko awanyo nan katampaik batanyo umaik sakampuang nyo tantang ugamo. Inyo nan dapek manantukan urang badoso atau bapahalo. Inyo nan biaso dibaie urang untuak mambacokan do’a bagai. Manarimo upah manikahkan......... Manarimo upah katubah Jumahaik bagai, ......... Tarnyato..... tarnyato......
Basiap malah Labai,...... sabanta lai kito pareso hiduik Labai nan salamo nangko.
Tapi.....tapi ambo ko Labai...... rajin sumbayang, mangaji, jo mandoa bagai.......
Salain itu aaa lai karajo Labai?
Iyo itu samiang nyoh...... badikie dari pagi sampai patang, siang jo malam.......... disurau.
Labai lupo ko mah.... nan manusie diutuih Allah ka dunie nangko, untuak bakarajo kareh mamaliharo alam. Manuntuik ilemu sabagai khalifah....... indak badikie jo mando’a sarato manarimo upah kaji samiang doh........................... Umue Labai salamo nangko lah abih untuak badikie jo mandoa samiang...... nan bakarajo mamaliharo dunie, lupo......
Jadi.............. jadi salah koh ambo..........?
Urang basaroban tu ma angguak-angguak. Sudahtu manggeleang-geleang.
Indak namuah jo doa-dikie sajo tu doh Labai. Banyak parentah Allah nan lain lai, nan alun Labai karajo kan. Labai manarimo upah mandoa, upah katubah Jumahaik, upah manikahkan urang, upah mangaji ......... itu samo jo mampajua balikan kaji tu Labai. Nan mandoa, bakatubah Jumahaik..... mustinyo indak baupah tu doh. Itu lah kawajiban bagi nan tahu bantuak Labai ko, gunonyo untuak manyebakan syi’ar. Jadi indak baupah bagai tu doh, sahandaknyo. Upah ka dapek ditarimo di akir zaman isuak.........di Akhiraik........Tapi.......iyo lah kok baitu......... beko nak dipareso bana,.....dima bana tampaik Labai nan sabananyo .........
Labai Budin indak manjawek lai. Dituruikkannyo kama awanyo ka di bao sasudah tu.
Tigo ari tibo, dikampuang nampak aie alah muloi suruik. Urang alah muloi pulo bipulang dari pangungsian babaliak karumah surang-surang....... Rumah nan tingga alah bagalemak peak jo luluak sarato sarok bagai. Nan surau Labai Budin, nampak iyo alah runtuah tajirongkoh, ditembak patuih jo dirandam banjir bandang tu. Sabana ibo sarato rusuah hati mancaliak jajak galodo tu.
Katiko urang kampuang bagotong royong mangamehi surau nan runtuah tu, basuo lah mayik-janazah Labai Budin ....... anguih ditembak patuih....... tapuruak dalam luluak bakeh banjir gadang tu........... Ditangannyo tapacik juo baru, sabiah sagalentong ...........Innalillahi wa inna ilaihi raji’uuuuunnnn. Antah sia lai nan kapatuik manggantikan baliau ko kudian manjadi garin...... kecek rang kampuang sambie manggali kubue untuak Labai Budin.
-oOo-
|
1. mirip2 robohnya surau kami
Ditulis oleh de alfiand pada Minggu, 23 Maret 2008
mirip2 "robohnya surau kami" karangan bang Navis, tapi dak baa doh...
nan penting ado dunsanak nan namuah manulih, hehehe
wasalam
|
Hanya pengguna yang terdaftar yang boleh menulis komentar.
Silahkan login atau daftar. Powered by AkoComment 2.0! |
|
|
