Dek lamaknyo kalio dagiang nan ambo buek jo si Tamburin...jadi batambuah si Kutar makan.  Kok paruik si kutar.. sabananyo lah sangkiah dek kanyang bana.
 
Kecek si Kutar  "paruik ambo ndi labiah capek maju dari pado karir ambo...dek kalio nan manyalinok ko..yo batambah tingga si karir ko jauh dibalakang".

  Nan kalio bantuak itu pulo...sabana..taraso..sabana pas agakan bumbunyo..nan kunyiknyo..ndak manyangek hiduang..kok daun limaunyo..pas pulo..ditingkahi dek daun salam jo sarai....
 
santanNyo dari karambia nan manjalang tuo..baminyak tangguang..lado digiliang jo batu lado..pusako rang gaek dari jaman awak ketek , bawangnyo dari bukik..tinggi nan tanahnyo subur, dagiang nan dikalio..dari Padang Panjang..dagiang dari   jawi nan tacilapak tadi pagi dipambantaian..dagiang as bana..yo lambuik..
 
"Onde ndi..yo ndak dapek nan kaambo kecek lai..yo..asli bagalintin pintin gulai kalio nan angku buek jo si Tamburin, dek gulai kalio nan angku hidangkan ko...yo...samba taluo mato sapi nan disampiang kalio tu..lah lupo ambo mancotoknyo" kecek si Kutar mati kakanyangan.
 
Ambo sandakanlah paruik...oiiii lah sasek ambo kok paruik nan disandakan kadinding..ko dek sangkiahnyo..dek kanyangnyo ndi..mukasuik ambo..pungguang  ambo..tu,   angkek lah lai mato sapi tu...ka ambo saluncuakan kaki ambo ko...
 
.waaak...waaaak..aaaakkkhhhh..basandawo si Kutar...dek bunyi sandowa si Kutar..lah tagalencek..kuciang nan sadang maintai kalio dagiang ko...Alhamdulillah itu sajo nan taloncek dari muluik si Kutar...
 
Lah lapeh tapurangah si Kutar...nan kaki tadi diselokan baliak, maota lamak sambia mangopi si Kutar jo si Andi
 
.ndi yo mokasih bana ambo jo hidangan nan mambuek ambo paniang lalek..ko. Apo carito awak lai ndi.... Nan angku yo..ndak asiang lai dek ambo...lah badusanak..dari ketek alun salasai lakek sarawa pendek awak..yo lah bakawan. Nan urang gaek awak bantuak itu..lah pinjam-maminjam bumbu dapua..kok ado nan kurang..ibaraiknyo lah saliang usai mausai dapua...rang gaek padusi..awak kok ado samba..nan lamak.
 
Rumah awak salemparan batu (ko katonya diganti sa campakan batu..indak sero didanga talingo..jadi padialah stek..masuak kato lempar)..salemparan batu..nan bisa mamacahkan kaco nako rumah masiang-masiang dek dakeknyo.
 
Kok basorak angku Tar..dari rumah tadanga lansuang dek ambo..ndi main takraw awak lai jo si Kadir. Kok mamuta lagu ze polis..angku dikamar balakang rumah angku..yo sampai..katalingo ambo ko. Kok babuah cubadak muko rumah angku..yo..pakak hiduang ambo..nan sadang duduak dibarando muko rumah ambo...bagitulah awak yo lah konco palangkin bana mah
 
Oi Kutar yo lah..lamo awak ndak basuo..tibo tibo..tagalencek se ambo..mandanga anak angku lah 5, nan ambo bantuak itu lho..lah 4. Ko awak baok jo anak bino kasadonyo makan ayam goreng kantuikke..bara kanai tu Kutar.....angku santiang nampaknyo ituang ma ituang pai makan-makan ko...tambah teh es..lah..tambah iko..lah tu lah angku sabuik kanai sagiko..ondeeeh kecek angku.
 
Kok bajalan-jalan awak awak sakaluarga.. ..awak hondoh..kasadonyo barombongan..bantuak urang maantaan haji..nan pai surang tapi nan mahantaan yo panuah ciek oto mikrolet....bantuak itu juo awak nampaknyo Kutar.
 
 SiKutar jo si Andi bisuaknyo pulang kampuang ka Sangka ..naik oto PO YANTI..satangah tampek duduak panuah dek rombongan si Kutar jo si Andi nan mambaok anak bininyo.
 
Tibo satokar ota nan kaliang tu..maminta ongkos
 
 Padialah ambo nan mambayia Kutar....untuak kapai..beko pulang ka Padang ...angku lai nan gratis..makasuiknyo ambo juo nan mantraktir..soalnya..ambo kamaota stek jo sitokar kaliang ko.
 
 Oi kaliang.
 
.apo da.
 
.nan ongkoih aman tu..etong selah bara kami kasadonyo..tapi sabalun ambo bayia..ambo yo penasaran...jo makasuik tulisan di nan manempel di oto ko
 
apo tu da..beko mati panasaran.lo uda..
 
tahu ndak angku kaliang..arwah penasaran ko bagantayangan..bantuak film zusana.. tahun lapan puluahan..tukang baso difilm tu..tabang hambua di bueknyo..nan urang rundo tabirik-birik lari..sampai tangga kain saruangnyo..ha..ha..ha..hi..hi..ha..ha. kok ndak galak do kutar

Dek ngerinyo arwah penasaran ko gentayangan...he..he..ko baru galak
 
 
Uda..bakilik-kilik nampaknyo..apo nan ka uda tanyo bia ndak mati penasaran..uda,
 
itu kutiang setiker (cuting stricker)  nan di oto tu SIANG BAWA YANTI..MALAM JUGA...apo makasuiknyo kaliang.
 
oh itu nan mambuek uda panasaran..uda pura-pura ndak tahu..nampaknyo
 
..indak-indak..kaliang...bukan kuro-kuro dalam parahu uda ....tantu..arati nan paliang jaleh kaliang nan tahu...
 
.nan oto kan lah jaleh dek uda tu bamerek YANTI...dek sopir ambo tu..bininyo banamo YANTI lo..he..he..uda pasti tahu..lah...malam-malam lah ndak manambang oto ko..tantu nan sopir ambo mambaok Yanti nan di rumah..tu...
 
oh..itu..................:) :)
 
.tapi tunggu dulu da..tantu ndak paguno ambo jadi satokar malamnyo lai ...babahayo karajo tu...ha..ha..ha
 
Lah padek bana tu..kaliang info tu..ka ambo kabakan ka konco2 ambo..nan arwah panasaran ambo ndak jadi bagantayangan lai doh, kalau bantuak itu bara kami kanai etong se..lai..nampaknyo uda yo pulang barombongan jo kaluarga...
 
giko se lah..dek ado anak uda jo konco uda tu nan bapangku jo induaknyo masiang-masiang..harago borongan se lah agiah se saratuih limo puluah ribu....baa lah pas kan rasonyo,
 
 Iyo kaliang ambo tambahkan lah stek bali rokok kaliang sapuluah ribu.
 
.nde tu yo batarimo kasih..kok ka baliak ka Padang ...naik oto ko liak yo da.
 
Aman tu, tapi saketek tanyo uda ...lah babini kaliang.
 
.alah da anak ciek baru..ndak saroman jo uda baduo ko..lah bisa ciek kesebelasan main bola nampaknyo,
 
 sia namo bini kaliang..
 
oh..itu..namonyo kok urang dikampuang mamanggianyo si RANI...
 
ciek pasan udanyo...
 
apo tu da...
 
lah naik pangkek bisuak si kaliang jadi sopir oto ko.... yo tapaso dirubah sakatek kutiang setiker tu manjadi SIANG BAWA RANI...MALAM. JUGA...he..he..he.
 
Onde uda ko..pandai bana nyo..batambah kaliang muko ambo dek uda..kekeh taruih galak ambo ma ota jo uda ko
 
Duo hari dikampuang si Kutar jo si Andi bajalan-jalan ka Pakan akok nan sadang rami-raminyo
 
Ndi ...mangopi ka lapau si upiak kamek lah, nan kecek urang kampuang kopi si kamek ko..sero..rasonyo, ambo yo agak curiga juo stek Ndi....antah kopinyo nan lamak..atau jaan-jaan dek siupiak nan punyo lapau di pakan akok ko nan rancak.
 
Tapi nampaknyo kaduonyo tar....lah ambo cubo yo nan kopi ko manyalinok nan si upiak ko yo kamek..he..he.
 
Kok bantuak itu..ndi.... taragak lo ambo mangopi di lapau si upiak kamek.
 
Lah tibo Si Kuatar jo si Andi di lapau upik kamek, cari tampek duduak nan agak mamojok mahadok sawah dibalakang pakang
 
Disambuik dek si Upiak kamek sambia senyum manih
 
Ooo uda Andi..duduak da...ka mangopi da.
 
.iyolah masak ka bamain layang2 bantuak si sutan rajo di langik nan ditangah sawah tu....
 
sia nan uda bawok tu..
 
oh itu kawan uda ketek..inyo marantau..ka batawi..kenalkanlah dulu.
 
Lah inyo unjuakan tangan dek si upiak kamek ...inyo jawek dek si Kutar
 
..namo uda Kutar
 
...nan ambo upiak da..tapi dek rang kampuang ditambahnyo kamek...
 
kok udah caliak upiak yo kamek..nampaknyo..he..he.
 
.marayu lo si Kutar
 
 Kopi juo da Kutar
 
..iyo samokan se lah jo salero uda Andi tu...
 
duduak la dulu cubolah kue nan masih Angek tu da ado..kue talam..pinukuik...lapek bugih..
 
Kopi angek nan barasok ko..lah tahidang...hawo dikampuang sadang dingin-dingin tangguang lho...kaubun-ubun raso kopi si upiak kamek ko..ndak ka karongkongan lai.
 
 Piak ka batanyo uda andi
 stek..apo tu da...
 
baa kok barani bana upiak mahampehkan  tadah galeh ka sutan rajo dilangik....itu carito urang kampuang nan angek uda danga
 
Ooo..carito sapakan nan lalu tuyo....baa juo lai da..lah tigo jam inyo duduak di lapau upiak. Tu baulah lo..inyo dikadai ko..mambuek langganan upiak takuik mangopi disiko kok ado si Sutan ko...tapi urang kampuang siko lah maklum se tu da nan si sutan rajo dilangik tu..agak kanai saangin..tapi ndak boco bana....
 
.oh..bantuak itu..baru jaleh dek uda..kecek urang katiko upiak berang...taburansang tu..nan si sutan maluncua se lai bantuak kuciang kanai lidi kalua lapau upiak
 
  Nan inyo da..bamain layang-layang se karajonyo satiok hari..ditangah padang.. ..apolai urang kasawah..lah salasai manyabik...tampek inyo bana tu, dikampuang ko inyo nan paliang santiang mambuek layang darek jo layang danguang..itu pancari bali rokoknyo.
 
Nan si sutan kok malam lalok disurau diujuang kampuang ko...tu kain saruang nan inyo salempang kan ..tu..pusakonyo bana..ntah lai ado inyo cuci..antah indak..baa kok ndak berang ambo da...pingsan beko urang nan mangopi dilapau upiak dek pakaknyo baun kain saruang si Sutan...akibaiknyo..langang urang pai minum ka lapau upiak..inyo namuah balamo-lamo duduak tu..sambia manunggu patang hari pai bamain layang-layang..makonyo upiak berang ka inyo...dek balamo2 duduak di lapau upiak
 
Tapi baa juo lai da..urang kampuang lah maklum lo..dek kanai saangin ko. Dek si sutan ko lo kampuang kami jadi dikenal..indak jo baun kain saruangnyo tu..tapi dek santiang bana mambuek layang-layang..lah kama-kama..marantau layang-layang inyo di sumatera baraik ko...malah da ado urang rantau dari Jakarta nan mamasan untuak koleksi.
 
 (Yo hebat lo si upiak ko ba pilosopi..ndak manghino urang bana...baa kecek pituah urang awak..nan buto pa ambuih lasuang..nan pakak palapeh badia....kok ado kelemahan seseorang tapi dibaliak tu tantunyo inyo baguno....mudah2an awak kasadonyo bantuak itu..jaan caliak buruak urang sajo)
 
Lah upiak ..nan kopi yo tingga dadak se..lai..nan kue iyo..lah kami cubo..ndak ado ka dikecekan lai..yo kamek kasadonyo..bantuak..upiak bana nan manih kamek...he..he
 
uda ko bisa se..
 
.ko..bayia nyo..mokasih yo piak
 
Tar..awak caliak lah sabanta..si sutan main layang-layang jo urang kampuang..sadang rami-raminyo nampaknyo..layang-layang diateh langik. Iyolah ndi..taragak lo ambo..mainan awak wakatu ketek dibalakang rumah di Padang
 
Nampaknyo itu nan si sutan tu Tar....nan bakain saruang baselempang..nan dicaritokan upiak kamek..ndak usah lah awak dakek  i.....inyo..dari jalan se lah awak manonton. Kok dicaliak..si sutan ko..yo ahlinyo bana jo layang-layang   ..caliak lah tu.. gaya tangan..jo badannyo..sadang mamainkan layang-layang...nan tinggi..merah..tu nampaknyo layang-layang  nyo.
 
Lah tapek lo rasonyo urang maagiah gala dikampuang ko SUTAN RAJO DI LANGIK
 
 
 
Salam-September 2006

Komentar

1. padek bana Ditulis oleh supiroto pada Jumat, 16 Mei 2008   salut ka angku nan pandai mabuek carito (ma ota), iyo sabana lamak rangkaiannyo  baa kok dicubo kumpuakan karya angku tu di ajdaikan buku atau publikasi lain yang bisa urang banyak nan mambaco.  ambo dulu suko mambaco cerpen atau carito karangan makmur hendrik, tapi kini lah indak ado , kok lai ado dicimbuak ko tapi indak naiak-naiak episodenyo tu do, itu nan ka ditungu0tunggu. dek lai ado ota (?) angku ko, lai ka paubek ati saketek (

2. padek bana Ditulis oleh supiroto pada Jumat, 16 Mei 2008   iyo sabana padek carito (ota ?) angku ko  pa ubek ati dek indak naiak-naiak jo episode si giriang-giriang perak, bukan ba makasuik marandahkan karya angku do, mohon maaf sabaleh jo kapalo.  tks

3. ado ota lain Ditulis oleh jepe pada Jumat, 16 Mei 2008 Angku Supiroto, dicimbuak ado juo..nan genre bantuak iko otanyo..caliak di Prosa judul 2+2 basambuang ciek lai. Kok taragak labiah banyak pai ka "lapau" ambo www.jupardi.multiply,com,,yo lah Angku Supiroto..ota tu palengah hari sajo...bia ndak sakik bana kapalo mandanga BBM ka naik ko. Salam-Penulis "Ota"

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!