Sasudah ambo maninggakan Kampuang Halaman salamo duo dekade, ambo Pulang  kampuang untuak partamu kali awal tahun 1985 . Indak tahu apo nan ka ambo rasokan ka manjajak kumbali Tanah Kampuang Halaman.

Perasaan bimbang, anxious, tu sangat mampangaruahi ambo sajak barangkek dari San Francisco maninggakan kawan-kawan nan maantakan ambo di San Francisco Airport. Ambo tabang ka Singapura jo Singapore Airlines. Lesu, bimbang, mangana baa lah kaadaan Kampuang Halaman Kini. Sasudah penerbangan panjang, wakatu Singapore Airlines ka mandarek landing di Changi Airport, Singapore, tibo-tibo aia mato ambo mancorek bacucuran ka muko jo dado, indak dapek ambo tahan,manciguik-ciguik surang mambaruik muko jo dado... Sampai airplane mandarek baranti habih, ambo mandoa, alhamdulillahi rabbilaalamiin...

Apo nan manjadikan aia mato ambo mancucua balinang jo hati sadiah otomatis tanpa kontrol? Ambo duduak dakek jendela sabalah kanan.
Wakatu hampia landing, di sabalah kanan tampak pamandangan nan manakjubkan  mengharukan hati. Pohon-pohon karambia disabalah kanan sangat banyak, gerakannyo marato diambuih angin agak kareh basumangat mempesona. Pohon karambia jo  daun-daunnyo ko malambai-lambai basamo-samo!

Salamo duo puluah tahun di Rantau urang ambo indak panah mancaliak batang karambia.  Apo lai mancaliak pohon-pohon sakali banyak saroman itu dengan geraknyo nan manyaik hati, melambai-lambai rasonyo manyaru ambo ka maso silam ka "dunia lain" nan ambo
tinggakan. takana lagu kami maso ketek di SMP Bukittinggi maso revolusi dulu di Kampuang, "Nyiur Melambai". Maso ketek di Kampuang acok ambo manyanyikan dan mainkan lagu tu jo harmonika malam-malam di bulan tarang di lampok dan pondok padi di sawah sambia maunyian padi sasudah mairiak. Kini, Nyiur Melambai sabana melambai dihadokan mato ambo di Changi Airport, Singapore nan moderen, mambuek aia mato ambo mancoroh tanpa disadari. Baru tahu awak indak di Rantau Jauah lai. Awak lah di "dunia lain"  nan salamo ko lah lamo ditinggakan!

Singkek carito; sasudah ambo sampai di Jakarta, disambuik kawan-kawan lamo dari Chicago nan lah pulang duluan. Ambo lah diingekkan, kok sampai di Jakarta ambo ka basuo jo baliau-baliau nan kabatulan kapai ka Makah Umrah. Kawan-kawan lah maisaratkan ka basuo jo urang gadang-gadang tu di VIP Room. Dengan isarat tu nan ambo tarimo dari kawan-kawan, ambo lai pakaian formil, jas hitam badasi. Di Jakarta babarapo hari dan sudah tu bakunjuang ka kawan-kawan lamo dan kawan-kawan baru untuak adaptasi ambo lah di "dunia lain" dan misti manyasuaikan diri. Tibolah kawan maantakan ambo ka Airport Jakarta, wakatu alun ado Cengkareng lai; tabanglah ambo ka Tabiang.

Ambo sampai di Tabiang jo jadwal pesawat nan mandarek kaduo. Ambo kalua elok-elok, turun tanggo pesawat, lai badasi bajas hitam pulo, jenjeng biola di tangan kida, maengong suok kida mancaliak menghayati keadaan lingkuangan kuliliang. Sampai di tanah landasan, ambo madok ka kiblat duduak basimpuah mancium tanah Kampuang Halaman. Sudah tu ambo maengong kuliliang mangambangkan tangan jo dado, badoa alhamdulillah lah tibo di Ranah Minang, Kampuang Halaman nan Den Cintoi.

Bajalanlah ambo lambek-lambek manjenjeng biola jo emosi nan bahagia bacampua sadiah jo duka, anxious ka mancaliak kaadaan salanjuiknyo.
Lah mandakeki gedung terminal tampaklah urang banyak manunggu panumpang nan datang. Tapi dek ambo nan terakhir bajalan, hampia-hampia di terminal ambo mandapek kejutan nan indak disangko-angko.

Duo anak gadih bapakaian adat, bakain kuluak batanduak, mampasambahkan Siriah jo Carano ka ambo dengan penuh ramah dan khidmatnyo. Tapancua pulo aia mato ambo. Di antaro anak gadih nan baduo ko ado saurang Ibu mamperkenalkan ambo ka duo anak gadih ko dan manyambuik ambo dengan salam dan rangkuhan, Selamat Datang Sjamsir. Kami sangat emosi. Kecek Ibu tu, "Ampek Puluah Urang tamu Uni dari Lua Nagari sadang di rumah, tapi dek mandanga Sjamsir ka mandarek, Uni tinggakan sadonyo untuak manjapuik Sjamsir." Tarimo kasih banyak Uni, kecek ambo. "Uni jo Uda pun baru tibo tadi pagi dari Jakarta jo pesawat nan partamu. Kok kami tahu, awak samo-samo sajo tadi."

Sudah tu kami bajalan lambek-lambek, manuju suatu pintu ruangan.
Baliau bukak pintu itu jo kunci nan ditangannyo. "Kunci ko cuma Uni nan mamacaiak, kamar ko cuma dibukak dengan izin Uni", "Silakan masuak Sjamsir," kecek baliau. Baliau tunjuakkan kurisi itu Pak Harto nan biaso duduak kalau baliau kamari. Kironyo kamar tu Kamar VIP.

Duduak lah ambo maengong-engong di VIP Room tu, maota sabanta balapeh angah jo aia sejuk jo jajan nan dihidangkan. Sudah tu, sedan lah manunggu di lua, kami barangkek, langsuang ka Jalan Sudirman 18, Gubernuran. Di sinan Pak Gubernur lah manunggu. Kami basalaman barangkuhan. Ambo langsuang dibawo ka kamar makan, kami batigo banostalgia pulo ka maso-maso perkenalan kami dan tanyo-batanyo tantang kawan-kawan ambo nan lah lamo indak basuo. Ibu nan manjapuik ambo sacaro pribadi ka Airport Tabiang tu iyolah Uni Juz Azwar Anas.

Sekian, sekitar sejenak kenangan di Airport Tabing.

Salam,
-- Sjamsir Sjarif
July 20, 2008
Santa Cruz, CA, USA

TrackBack URI for this entry

Comments (5)

Subscribe to this comment's feed

ade said:

	Bana kato papatah minang...satinggi-tinggi alang malayok...suatu saat ka turun juo.... sajauah-jauah urang minang marantau...suatu saat ka pulang juo.... Untuak sanak nan di rantau urang...nan lah lamo indak manyilau kampuang..kok dapek...silaulah kampuang kito....kok sukses dirantau urang.....bangunlah kampuang jo nagari kito...
	report abuse vote down vote up

August 27, 2008
Votes: +0

Sutan zamzamir chaniago said:

kalau maingek maso lalu, dan mambayangkan maso nan akan datang dibandingan jok maso kini, mambuek hati kito indak manantu apo lah nan katajadi, ambo sangaik batarimo kasih bahwa mamak sjamsir sjarif masih tidak pernah malupokan ranag minang kito, mamak maliek pado 23 tahun yang lalu, kini lah banyak nan barubah mamak di ranah minang ko, ado parubahan kearah positif dan adojuo barubahan ka arah negatif, kami minta bantua dari mamak untuk melanjutkan perubahaan karah positif dan mengurangi perubahan ke arah negatif, kami sangat membutuhkan pandangan dr mamak nan bisa mambuek perbandingan natara generasi serta maso nan pernah di lalui tersebut. janguak lah kampuang baliak mamak lah lamo batinggaan...dusanak kito selalu marindukan kadatangan mamak...

report abuse vote down vote up

August 27, 2008
Votes: +0

Zulkarnain Kahar said:

	No place like home pak Sjamsir.
	report abuse vote down vote up

August 27, 2008 | url
Votes: +0

Muzammil said:

Assalamualaikum mamak Sjamsir Sjarif carito mamak sangat berkesan di ambo... alah lamo mamak maninggakan kampuang halaman..akhirnyo di suatu saat mamak bisa juo manyilai kampuang tu baliak... baa kecek pak zamzamir... dek mamak urang nan diduluan salangkah ditinggian sarantiang... pai tampek batanyo pulang tampek babarito... mungkin ado nan dari mamak bisa mambangun minang kabau ko saroman dahulunyo.. kami nan umua alun satahun jaguang... kok ilmu masih sa ujuang kuku.. tantu..kami paralu banyak baraja jo nan tuo"... itu sajo nan dapek ambo sampaikan.. kok ado kato nan ndak tampek latakno pontak jo maaf dr ambo.. wassalam

report abuse vote down vote up

August 27, 2008
Votes: +0

manye tanjung said:

	Assalamu'alaikum Pak syamsi, yo hebat Pak Syamsir marantau, pulang di japuik dek Ibu Juz aswar ANas...bilo bailak ka kampaung liak pak,.... - Sarupo pulo yo pengalamn ambo tahun lalu dengan urang Medan lah lamo di New york, namo liau H.Achyatr Hanif MA, MScm, tigo puluah tahun marantau di new york jadi orang sukses lo liau. - selamat yo pak semoga lebih sukses Wassalam (Kampia)
	report abuse vote down vote up

August 27, 2008
Votes: +0