Tadi kawan sakantua ambo maota wakatu makan siang dek Krisis Finansial Global (KFG) nan samakin taraso dampaknyo ka perusahaan nan produknyo diserap pasar lua nagari (ekspor). Kecek kawan ambo ko kok balaruik-laruik KFG ko Jepe lah bantuak Ayam dek Akuak mah babarapo perusahaan.

Ayam dek akuak?..apolah yo kabantuak itu bana yo..antah lah masih manduga-duga juo nampaknyo dunia usaha. Ingek tingkah ayam dek akuak ingek ambo wakatu ketek baa bana mode ayam kanai akuak ko, bantuak iko kiro-kiro..nan ambo paratikan.

Kok Ayam Jantan nan tageh kok lah kanai akuak inyo cigin maram sajo diateh kasiak sambia matonyo mangantuak-ngantuak bantuak lah bagadang duo hari duo malam sambia maangguak-angguak letoi lihianyo. Kok lah parah bana dikajuikan bananyo indak katagak dari maramnyo..tingga dibinjek sajo jenggernyo tu..

Nan si jago ko jaan disabuik tibo sehatnyo gilo mangaja ayam gadih batino sajo baapun mode ayam batino ko pokoknyo “falling love at the first sight” si Jago ko satiok batino nan nampak dimukonyo . Tapi kok kanai akuak sadang maramnyo ditanah menikmati akuaknyo jaankan mauber ayam batino nan lalu lalang dimukonyo, ayam batino nan dimuko iduangnyo bana indak baselero si jago ko “Broken Heart (baca :patah salero) at the first sight” mancaliak ayam gadih dimuko iduangnyo nan rancak.

Kok lah bantuak iko ayam paliharoan ambo wakatu ketek, ambo malapor sacapeknyo ka mande ambo…”Makkkk..ayam awak dek akuak tu”, Mande ambo biasonyo manjawek singkek sajo..”Asah pisau tu lai” itu ubeknyo. Indak mambuang wakatu ambo lai sacapek kilek ambo asah pisau dapuak, babarapo minik pisau ko lah tibo ditalihia ayam nan dek akuak ko. Tigo jam satalah tu kalio ayam lakek tangan mande ambo  ko lah tibo dimuluik ambo. Itu dulu jaman saisuk ayam diakuak ubeknyo pisau sajo, jaman kini kok ado ayam dek akuak jaan dicubo-cubo maagiah ubeknyo pisau sarancaknyo tanago maasah pisau tadi dialiahkan sajo untuak mambuek lubang, Ayam dek akuak jaman kini lah samo sajo jo panyakik nan mambahayokan kesehatan awak terkenal namonyo flu buruang.

Jaman dulu indak tapikia bana ayam sakik akuak ko, cepak cepong sajo ambo manyantuang kalio ayam dek akuak ko, buktinyo dulu awak sehat-sehat sajo mamakan ayam dek akuak ko.Jiko ayam kanai akuak ambo capek bana mah malapor ka mande ambo, jaweknyo yo “asah pisau capek” jaan sampai  talambek pisau lah tajam ka digesoh dilihia ayam ko,   ..eee..nan ayam lah bapisah nyawo jo badan, …kalio ayam hanyo sabateh mimpi kasudahannyo..jilek se lah pisau nan tajam tu lai…lalu ambiak cangkua buek lubang banamkan ayam nan “Broken Heart at the first sight”

KFG ko…apolah manjurus bantuak Ayam kanai akuak..nan ubeknyo pisau, danga-danga yo lah banyak korbannyo babarapo Perusahaan di Riau ko, ubek mengatasi KFG ko yo pisau sajo alah banyak kanai dabiah mah (baco :PHK), antahlah ambo (awak) baharok dan badoa sajo mudah-mudahan KFG ko capek balalu, indak mambuek perusahaan nan produknyo ekspor kanai akuak. Nan ambo tantu tetap “falling love at the first sight” aratinyo tetap sumangaik dan optimis manghadoi dunia karajo disektor swasta nan kamuko samakin barek tantangannyo. Mudah-mudahan si Barack Obama nan manuruik carito suka jo randang awak katiko tingga di Jakarta dulu dapek maambiak langkah-langkah menagatasi KFG nan manimpo Amerika dan berdampak global,  kok dibiakan balaruik-laruik bisa jadi denyuik ekonomi dunia saruman ayam dek akuak

Pekanbaru, 10 November 2008

TrackBack URI for this entry

Comments (1)

Subscribe to this comment's feed

bobi sujana said:

	...Rasonyo hal yang bantuak iko...bukan hal yang baru wak hadapi kanda...dulu waku krisis 97/98..labiah parah dari ko lai... Sistem kapitalis..yang ma usuang teori labo sabanyak2nyo memang ndak cocok di terapkan...tanpa menimbang segi buruaknyo...apo lagi instansi keuangan awak ndak rancak doh...mungkin lah kini saatnyo awak baraliah ka teori sari'ah...
	report abuse vote down vote up

November 24, 2008
Votes: +1