|
 Iko lamaknyo  ambo bakarajo acok batugeh ka lapangan, kalaulah ambo dihadoi pilihan manjadi urang lapangan atau urang kantua, pilihan nan paliang ambo suko tantu manjadi urang lapangan tapi status urang kantua.Ahaa iko lah samoloh mah carito ambo jo kawan sakolah ambo satantang piliah mailiah jo todongan pistol aia ka kapalo “Makan gulai ikan hiu nan lamak atau bapoto jo Luna Maya” tantu paliang top pilihan makan gulai hiu baduo Luna Maya sambia bapoto. Biasolah kawan iko permainan kato-kato, tamasuak pelajaran humor no 8 mah anggap sajo bantuak itu.
Buliah dikatokan 22 hari hari karajo efektif dalam sabulan 65 persen ambo baputa-puta dilapangan. Kok dilapangan ko meja kursi ambo banyak modenyo, mulai dilapau makan, dirumah tokoh masayarakat, di rumah masyarakat badarai, dikantua Bupati, dikantua DPRD, dikantua instansi teknis terkait, dikamar dan lobi hotel sampai nan indak ado meja kursi alias duduak baselo sajo di lantai hutan. Lamak nomor 8 (itu juo baru nomornyo) kok ambo masuak kantua agak bebas saketek, bos-bos inyo padiakan sajo kami-kami dilapangan ko kok maota-ota atau rapek ketek-ketek diruangan nan jaleh tugeh jo tangguang jawab apo nan dikarajokan dilapangan Insya Allah beres. Kok ado kendala nan sangaik krusial dan indak bisa diputuihkan baru malapor ka Bos.
Nah nan paliang lamak jo sero dilapangan ko (nan indak lamak atau banyak masalah nan dihadoi jo masyarakat dan aparat tantu ado juo) bantuak kini dikampuang-kampuang atau pedesaan sadang mamuncak musim durian. Biasonyo ado sajo tokoh masyarakat atau masyarakat nan badarai maajak kami pai ka ladangnyo makan durian jatuah.
Durian jatuah indak ado lai iko nan paliang Te O Pe rasonyo, baa bana mode, jenis dan varietas durian local ko, kok nan jatuah lansuang dimakan rasonyo tatap lamak dan manyalinok. Kami duduak didangau-dangau ladang masyarakat nan punyo batang durian ko, bali aia mineral agak sakarton. Sambia mangalai-ngalai dilapiak dangau-dangau tu tibo-tibo,,,Bum balambin durian..Bum..Bum..balambim lo disuduik nan lain. Lah agak banyak balambim baru dikumpuakan di dangau., tukang kumpua ko yo harus mamakai helem bia indak taimpok kapalo dek durian nan balambim katiko mangumpuakan durian nan alah jatuah.
Kok durian nan baru jatuah ko..mmmm..iyo paralu saketek tanago mangupaknyo jo ladiang untuak mandapekan rasonyo nan lamak bin kamek. Tando-tando durian nan baru jatuah kuliknyo masih tagang, durinyo tajam kok diguguah durianko bunyi gariang indak lambok do bab..bab..bab..tapi kiro-kiro bunyinyo dianalogikan sajo bantuak iko Ting..ting..ting..kinclong.
Lah dikupak durian ko sasuai jo ruehnyo, onde durian ko talatak pas bantuak anak kuciang baru lahia lalok sambia manyusu dikatiak induaknyo, aromanya mambuek gerakan tangan sacapek kilek manyemba dari kawan nan lain ingin marabuiknyo. Bajadilah cepak cepong kami manyantuang durian jatuah ko, iyo lamak ibaratnyo lamo raso “nek” nyo. Kamulai raso nek minum aia mineral ulang baliak cepak cepong. Kok lah mambana indak talok lai tingga manyanda sajo di tonggak dangau tu sambia kaki maunjua.
Kok sakalian makan siang lamak juo dimakan jo nasi Angek, iko kebiasaan panduduak suku Mandailiang makan durian, kok urang awak jo katan.
Ambo kadang-kadang yo jadi maleh mambali durian local nan dijua dikota (pinggiran jalan) akibat ado pembanding nan labiah paten yaitu durian jatuah. Acok kuciwa mambali durian nan di kota ko. Iko dapek dimaklumi durian jatuah ko dari kabun mahondoh pondoh masuak kota jo tru-truk lalu diecer ka pedagang kaki limo pinggiran jalan, lah bara hari lo sampai ka tangan awak minimal 2 hari sajak jatuah. Durian ko capek tajadi fermentasi (agak asam) nan marubah rasonyo. Indak padek bagalintin lai tapi lah baraia lembek, rasonyo mambuek awak nek.
Tando-tando durian nan kurang sero ko, kulik lah agak lunak, duri indak tajam, ditokok durian ko bunyinyo lambok..bab..bab lalu ujuang durianko lah rakah. Mangubaknyo indak paralu tanago ekstra kadang-kadang dirangkah sajo jo tangan dikulik nan lah tabuka diujuangnyo. Kok lah parah bana istilah urang lah masuak angin, masam sajo rasonyo, biasonyo dijadikan asam durian atau tempoyak.
Jadi kok ingin juo makan durian nan lamak bin kamek yo durian jatuah solusinyo, nan ambo rasokan awak saketek nyaman diparuik mamupuah durian ko bara talok, minum aia putiah banyak-banyak. Untuak saketek “sugesti” indak dimabuak durian tuangkan aia di seluang kulik durian ko, tapi ambo pikia ado batuanyo juo sebab dikuliknyo ko ado “anti racun” dimabuak durian barupa butir-butir air nan manempe atau bisa jadi diselaput kulik bagian dalam ko mengandung zat-zat tertentu nan dapek menetralkan bia awak indak di mabuak durian.Tapi baa ka baa nan rancak tu makan jaan bakalabihan bana sedang-sedang sajo, kok salero jo nafsu kadang-kadang jo barang lamak ko suko indak terkendali lah dimabuaknyo awak baru sadar.
Alhamdulillah lah bara kali ambo ka lapangan ko makan durian jatuah yo alun ado dimabuak durian lai, nan mabuak tu kami ingin maulang baliak pai makan durian jatuah ko ka ladang masyarakat..Durian jatuah yo “nggak ada matinya” dari segi rasa pokoke Te O Pe De.
Pku, Jam 10 Malam ka Lalok 11 Nov 2008
Trackback(0)
 |
TrackBack URI for this entry
Subscribe to this comment's feed
