|
 Carito ko adolah  baa sepotong kisah dari beribu-ribu urang awak (Minang) sukses marantau dan bausaho di nagari urang. Sarupo pituah Mande ambo katiko ka marantau lapeh SMA dulu di kota Padang “Kok pai marantau jaan di arok mambaok modal harato pusako tinggi atau randah nan manjadi hak Mama dikampuang, urang Minang tu modal pokok marantaunyo ndak labiah ndak kurang tulang Salapan Karek jo Ilmu”
Nah iko contohnyo dari banyak urang Pariaman nan marantau ka Pekanbaru jo modal tulang salapan karek dan ilmu nan rato-rato kebanyakan badagang, manggaleh, bausaho disektor jasa disampiang tantunyo bakarajo disektor Pemerintahan. Kito sabuik sajo nan balapau los lambuang untuak sarapan pagi ko lapau Lontong Katupek Ajo. Lapau Ajo ko talatak persis dimuko Masajik Raya An Nur Pekanbaru, buliah dikatokan mulai dari jam 6.30 sampai jam 9 pagi yo sabana rami urang pai sarapan pagi ka siko apolai hari Minggu urang sahabis baolah raga pagi di halaman masajik An Nur nan lapang, lansuang pai sarapan ka siko. Apo nan mambuek rami pengunjung pai sarapan ka lapau ajo ko…tantu ado nan istimewa. Nah nan istimewa tu adolah katupek lontong ajo nan bagulai cubadak, paku atau dikombinasi kan kaduonyo, rasonyo kecek urang Jakarta “ngangeni”, nan bikin kangen tu padehnyo yo sabana padiah nan mambuek ubun-ubun, kapalo, lihia dan kaniang awak bakaringek sasudah manyantuang katupek gulai Ajo ko. Ambo caliak rato-rato masakan Piaman memang agak padeh dari kebanyakan pusako kuliner daerah minang lainnyo, dek urang Piaman tarutamo gulainyo suko mamakai lado ketek atau disabuik juo lado padi/kutu. Rato-rato nan sarapan disiko yo 80 persen urang Minang, mungkin suku lain bantuak Sunda atau Jawa dek padeh gulai lontong ko mambuek paruiknyo bakacamuak indak bakatantuan satalah makan katupek gulai ko atau bisa juo inyo takuik bakaringek disatiok kapalo jo lihia, intinyo padeh bana oiiiiii. Dilapau ajo ko disadiokan juo lontong gulai toco kok iko padehnyo standar sajo, rasonyo mambuek lidah bagoyang-goyang juo, mungkin iko pilihan buek suku lain nan pai sarapan pagi kasiko tapi sentuhan padehnyo indak manggigik sarupo gulai cubadak jo paku.Disampiang katupek lontong, ajo ko juo manggaleh sarapan pagi khas urang Minang sarupo Lupih, Bubua kacang padi, dan bubua sum-sum dari tapuang bareh. Minumannyo nan “Minang banget” apolai yo Teh talua kental pakek manyalinok nan ruoknyo labiah tinggi dari pado galeh.(iko indak bahaso tersirat, fakta) Disampiang tu disadiokan pulo “topping” katiko awak makan katupek ko, toppingnyo tu sebuah pusaka kuliner urang Piaman nan terkenal Sala Lauk. Ambo raso ateh namo urang Minang pasti tahu jo sala lauk ko, atau bahaso ambo paliang ekstrim “Baranti sajo jadi urang Minang kok ndak kenal jo Sala Lauk Pariaman” saking populernyo ado mah lagu Elly Kasim tantang sala lauk ko. Katupek Gulai padeh Ajo ko porsinyo yo agak jumbo mah, panuah puncak piriang tu, nah kok lah tahidang sembalah agak ampek buah sala lauk nan sagadang bola pimpong, lalu serakan diateh piriang tu, itulah topping katupek gulai lontong ajo ko. Minggu kapatang lapeh subuah ambo baolahraga jo istri dan anak-anak dipelataran Masajik An Nur ko, salasai bajalan-jalan, balari-lari ketek dan main bola jo Zidane anak laki-laki ambo, barundiang ambo jo anak istri kama pai sarapan. Sabananyo ambo lansuang sajo mangecek awak pai sarapan ka lapau Ajo. Mandanga lapau Ajo ko lansuang demo anak ambo nan tabayang dek anak-anak ko padeh katupek ko nan mambueknyo setelah makan paruiknyo “mules” minta ka balakang. Lalu nan di demonyo lai ka ambo, urang bagadincik panuah di lapau tu, lamo manunggu pasanan sarapan kadang-kadang indak dapek tampek duduak. Baa lai ambo surang, inyo barampek dapek lo suaro dari mandenyo tantu kok voting lah jaleh ambo kalah, kandak anak ambo ko sarapan lontong pecal jo soto urang Jawa di gobah nan lamak juo. Tapaso ambo cari “win win solusi”, nan ambo yo taragak bana katupek gulai ajo nan padeh ko diagiah sala lauk toppingnyo. Akhirnyo disepakati , kami pai ka lapau Ajo ko, katupek untuak ambo dibungkuih sajo 8 buah sala lauk Katiko ambo sampai di lapau Ajo ko, . Ondeee..Mak..yo sabana rami urang dilapau Ajo ko, basorak-sorak “awak dulu Ni”…bato Ni ambo dari tadi kok dulu urang dari ambo”, tolong duluan ambo Ni sabungkuih sajo nyo”, “Maa ampek bungkuih pasanan ambo tu Ni lamo ban amah dari tadi ambo pasan” Uni dan duo urang nan manyanduak pasanan urang ko untuak makan ditampek jo nan dibungkuih yo sibuak malayani, ndak tantunyo lai “first come first serve”. Syukurlah ambo lai dapek jatah sabungkuih katupek gulai nan raso padehnyo “ngangeni”, sempat talambek kandas, mungkin nan tingga lontong gulai toco jo bubua sajo. Samantaro urang sibuk manyemba sala lauk nan talatak di plastic ware, ambo pun ndak lupo manyemba sacapeknyo, 8 buah lah masuak kantong asoy, kok talambek juo licin mah plastic ware sala lauk ko, kok taragak juo jo sala lauk ajo nan sero ko, ahaa..jilek sajo minyak tu kok baruntuang ado “sebeang-sebeang” nan tasiso di dasar palstik ware ko..he..he Samantaro urang nan dimeja makan indak kalah hebohnyo sipak sintuang, cantuang cantang manyantuang sagalo makanan sarapan pagi nan tasadio di lapau Ajo ko. Ondeee yo sero bana apak nan dipojok tu mairuik teh taluo nan baruok, sambia mamatiak rokok jisamsu sabatang, nan badan diri lah tokongkang rabah dikursi jo kapalo bakaringek ..waiyo..yo lamak e lai..Katupek Gulai padeh Ajo ko..brrrrrrrr..brrrrrrr..padeh..oiiii !!! Lah dapek pasanan ambo katupek indak batalua kanai Rp 6.000 tambah sala lauk 8 buah Rp 4.000, pas ambo kanai Rp 10.000 untuak sapaket ko, lalu ambo bergerak lai ka lontong pecel dan soto urang Jawa di gobah nan diinginkan anak-anak ambo untuak sarapan. Sampai disinan ambo minta piriang ka Mbak panggaleh ko, lalu ambo tuang kan Katupek ajo ko samantaro istri jo anak ambo lah mamasan sarapannyo. Tibo ka manuangkan tooping kapiriang ko jo sala lauk, lhaaaa..kok tingga duo sajo sala lauk ko, onde mande ruponyo sadang ambo manyetir oto, lah disantuangnyo dek anak ambo sala lauk ko 6 buah, baa lai untuang lai anak surang, kok urang lain ambo kadukan ka Polisi ha..ha..ha, itu dek ndak rela bana ambo kahilangan sala lauk nan lamak ko. Nan Ajo jo keluarga besarnyo ko dek modal tulang salapan karek jo kapandaiannyo (ilmu) mambuek katupek gulai khas Piaman nan padeh ko jo sala lauk, tantunyo lah sejahteranyo kini lah tabuek rumah tabali oto dek hanyo manggaleh sarapan pagi. Itulah sapotong kisah urang Minang nan marantau mancari iduik dirantau urang nan modal dibaok dari kampuang tulang salapan karek jo ilmu.  Lapau Katupek (lontong) Ajo, latar belakang Mesjid Raya An Nur-Kota Pekanbaru 
Kesibukan maambiakan pasanan urang “Ambo dari tadi kok alun juo Ni, bato Ni urang nan datang dulu lo mah nan balayani ingek Ni kecek urang Kurai Taji “First Come First Serve”
 Bungkusan Katupek Gulai nan ampek tu, rasonyo ambo ingin manyemba sabungkuih sajo bia capek dapek, poto ko katiko ambo baru sampai di lapau ko, akhirnyo yo tapaso saba manunggu, caliak pariuk gulai lah jauh kadasar paruik gulai ko, talambek ,,kandasssss ndak dapek lai, cabuang diateh gulai sarapan Bubua  Ha..ikonyo topping katupek gulai Ajo nan padeh…Sala Lauk, kok talambek kandas licin tampeknyo..ohhh taragak juo, jilek lah minyak-minyak jo karak-karak sala lauk nan didasar plastic ware ko..ha..ha..ha  Iko katupek gulai padeh Ajo (Gulai kombinasi Cubadak jo Paku) nan tapaso ambo santuang di kadai lontong Urang Jawa di Gobah, porsinyo jumbo, baduo ambo maabihkan jo Istri ambo, cubo caliak topping sala lauk duo sajo lai, lah disantuanganak ambo 6 buah lai. (ahaaaa..lai manjijia aia liua sanak tu..apolai Ajo Suryadi di bulando..antah bilo ka mangicok Katupek Gulai Piaman ko..tiok Minggu) Photos taken By Jepe (Pocket Camdig – Panasonix Lumix)
Trackback(0)
 |
TrackBack URI for this entry
Subscribe to this comment's feed
