Dari sekian banyak pakaian adat Pangulu di Minangkabau, Karih nan tasisik di pinggang merupokan pakaian utamo, sahinggo indak dapek dipisahkan antaro pangulu ji Karih. Nan mampasisik karih hanyolah pangulu, anak kamanakan indak dibanakan mampasisiknyo, walau apo pun pangkaiknyo. Satiok lakuak karih tu ado namo sarato arati nan tasandiri.

urang

 Baitulah rangukuman kato-kato dalam malukihkan karih, nan dapek diaratikan:

 1. Ulu Karih sibintang timua, dinamokan hari nan indak ado kalam. Makasuiknyo, dalam manjalankan tugasnyo, pangulu indak mangana siang jo malam. Indak mahiraukan hujan atau paneh, indak dingin dek hujan, indak Angek dek paneh. Dalam manjalankan tugas dan kewajibannyo, pangulu indak tahalang dek rintangan, kegelapan atau kebuntuan fikiran. Dalam melaksanakan tugasnyo, pangulu menggunokan pikiran nan janiah, indak marabo-rabo atau taagak-agak, bak bunyi patunjuak adat. "Kok tasuo jo adat, disalasaikan jo adat. Jikok tasuo jo undang, disalasaikan jo undang.

 Di Minangkabau alah ado tadapek hukum atau undang-undang, baik hukum perdata maupun hukum pidana, bak kato papatah: "Cupak jo gantang alah tatagak. Limbago adat alah batuang. Hukum adat alah balukih."

 Sakironyo tajadi masalah di kalangan anak kamanakan nan manyangkuik hukum agamo Islam, mako untuk mamutuihkan masalahnyo, pangulu paralu babincang, musyawarat dan mancari mufakat jo Tuanku dan Ulama. Bilo kato sapakaik alah dapek, barulah pangulu manjatuahkan hukum, sasuai jo bunyi papatah: "Syarak mangato, adaik mamakai. Syarak nan kawi, adaik nan lazim."

 2. Ulu Karih Bungkuak ka muko. Dinamokan manakuakan diri. Makasuiknyo, pangulu mesti marandahkan diri terhadap Allah Subhanahu wa Ta'ala, Rasul dan semua ajaran-Nya. Indak dibanakan pangulu malakukan pakaro nan batantangan jo agamo Islam, takabua dan sombong. Karano pangulu tu dianggap macam saurang Imam dalam pasukuan jo kaumnyo. Jiko pangulu mambuek kasalahan, mako pangulu tu akan dihukum dek pangulu-pangulu lain. Hukumannyo adolah pangulu tu indak lai dibao duduak samo randah, tagak samo tinggi. Kok urang barepak inyo ditinggakan. Hukuman itu akan baakhia, apobilo pangulu tu mambaia hutang ka nagari, denan caro malingka carano, manyusun siriah ka balerong adat dalam nagari. Hukuman adat nan macam iko dinamokan. "Lato basasah, kuman bagantiak. Salah ka Allah mintak ampun. Salah ka manusia mintak maaf."

 Hukum adaik dijatuahkan ka saurang pangulu, karano baliau alah malangga sumpah setia. Itulah sababnyo saurang pangulu diingekkan jo papatah: "Barundiang di dalam barih. Bakato di alua patuik. Batanam di dalam paga." Urang-urang tuo Minangkabau manyabuikkan dalam gurindamnyo: "Limbago jalan batampuah. Itu karajo niniak mamak. Sarugo di Iman taguah. Narako di laku awak."

Basambuang. ...

TrackBack URI for this entry

Comments (0)

Subscribe to this comment's feed