Malayang pulo surek ka duo
Dari kampuang kami kirimkan
Kok nyampang dagang sakik talingo
Batin kok lai mandangakan

Tangah malam pukua duo baleh
Tasintak ayah tajago
Ayah caliak di pandangi mandeh
Sadang ba urai ayie mato

Lah malang mandeh baparak
Tumbuah sarumpun babuah ampo
Malang bana kami baranak
Anak banyak larek sadonyo

Indak manulak nasib suratan
Bukan manyasa pado untuang
Anang angkek nan urang gadangkan
Labiah bak cando anak kanduang

Buruaknyo nasib kok di sabuik
Jarieh bak raso sio sio
Bak batu jatuah kalauik
Hilang ndak tantu lubuaknyo

Lai dicari bijo nan baiak
Di piliah pulo tanah ka ladang
Lah tibo musim ma ambiek
Buah jatuah ka parak urang

Kami tapaga karambie condoang
Tungguanyo sajo nan baratoki
Ka ditabang tanaman joloang
Di biakan maracun hati

Santano lai babuah labek
Lai kasanang urang ma ambiak
Tapi kok cando ampo barek
Tampan ka jadi umpan itiak

Itu di kami nan ma mabuak
Bukan manuntuik jaso baparak
Dagang kok cando antimun bungkuak
Ka karuang lai, dihituang indak

Guno tak lain ka panambah
Panukuak barang nan usak
Ka ta makan  antah lah antah
Antah ka busuak dek taleak

Sadang kuat urang katuju
Tanago abih uranglah anggan
Nasib bak cando ganja batu
Sayang malakik oto jalan

Dek ameh sagalo kameh
Dek padi sagalo jadi
Kayo abih jaso kok laleh
Isuak dagang ba ibo hati

Sabalun nan baiak kito kaji
Nan Buruak dulu kito baco
Usah turuikkan kato hati
Dayo syetan banyak caronyo

Banci bukan berangpun bukan
Hutang dek kami ma ingeki
Ibarat talalok kami jagokan
Jan sampai tasintak harilah tinggi

Sabab baitu kami sabuik
Jan sampai dagang bak kudo baban
Dek harok rumpuik sarajuik
Sabendi urang dagang ba elokan

Ingek ingek sabalun kanai
Bakulimek sabalun abih
Rantau jauah dagang kok sansai
Tabayang kampuang taserak tangih

Satinggi tinggi tabang bangau
Ka kubangan juo ka hinggoknyo
Ka ujuang dunia tampuah lah rantau
Nan kampuang usahlah lupo

Kok latieh tabang malayok
Tagarak di hati nak baranti
Caliek caliek ka bakeh hinggok
jarek sarupo jo jarami

Caliak batang pandangi dahan
Rantiang badagok nan ka dipilieh
Sabalun kuku di cacahkan
Kana jarek ka mancakiak mariah

Kok lai kanai parangkok gatah
Kanai bulu dapek Rarak i
Tapi kok kanai di banang lawah
Tampan bakujuik sampai mati

Ibarat urang manggaleh
Usah lah untuang nan kito baco
Kok labonyo bialah tandeh
Nan pokoknyo jan tabao pulo.

Kami ndak bosan kamanyabuik
Walau dagang ka sakik hati
Tangguang jawab kami samaso hiduik
Ka di tanyo nyampang kok mati.

Duo buah surek kami layangkan
alun talakik dagang mambaleh
Mungkin dek banyak kasibukan
Atau mukasuik nan kurang jaleh

Jo saba kami mananti
Jawaban surek dari rantau
kaba barito nan kami cari
Indak usah kami disilau

Lereang marapi,2308 1994.
Y.Jambak


(besambuang)

Sumber : blog.yantojambakblogspot.com dan http://gurimdampusakoblogspot.com

TrackBack URI for this entry

Comments (1)

Subscribe to this comment's feed

awis_Sutan Mudo_wisnedi said:

" Karatau Madang diulu ,babuah babungo balun, Merantau bujang dahulu dirumah baguno balun " Kata kata diatas merupakan suatu saran sebagai pemompa semangat untuk anak anak muda yang bersal dari daerah minang untuk pergi merantau ,baik itu untuk belajar disekolah sekolah ataupun perguruan tinggi disana ataupun berusaha berdagang ataupun bekerja untuk memenuhi kebutuhan hidup.Ya karena masih muda dan sekalian untuk menambah pengalaman dinengeri orang. Terkadang budaya ini sering menimbulkan dilema apalai dizaman globalisasi sekarang dimana adanya kemungkinan mereka salah jalan dan lepas kendali apalagi jika mereka berhadapan dengan masalah pelik dan tak ada tempat mengadu,..kalo dulu kita kita merantau ikut mamak atau saudara dekat.. sekarang anak " Gadih " aja maunya ngontrak kamar sendiri . biar bebas katanya.. Semoga dengan adanya Surek dari kampung ini akan selalu mengingatkan kami... jan sampai bosan yo mak....

report abuse vote down vote up

December 29, 2009
Votes: +0