Assalamu'alaykum sanak di palanta

  Jaweklah salam dari kampuang

  Tapakai wakatu agak sabanta

  malapeh rindu nan jo kampuang

  Sajak saparo tahun mahilang

  Nan surek ko lah ditulih juo

  dek manenggang hati Dagang

  Ditundo dulu mangirimnyo

  Sabab baa dek baitu

  galak jo tangih kok batuka

  bukan mambukak aib jo malu

  tapi mancari kato nan bana

 Buruak nak samo kito buang

  elok nak dapek kito bao

  disabuik saketek kisah Dagang

  katiko pulang bahari rayo

  Kanduang pulang barami-rami

  mambaok oto ciek surang

  lapang dado sanangnyo hati

  tabayang di rantau Dagang lah sanang

  Kami paleba sapanjang jalan

  kami palaweh pintu gaporo

  nak sampai bana oto ka halaman

  bialah "bungo" nak talendo

  Sajak kami mandapek kaba

  kanduang ka pulang jo oto surang

  ayam jo itiak sato ka pasa

  taluanyo sajo tingga di kandang

  Dek ulah sanangnyo hati

  barang nan indak kami adokan

  batuka galang jo timah pati

  untuang lai baju panjang langan

  Sapakan lamonyo bahari rayo

  kami hiduik bak Juragan

  pai ka lapau mambali lado

  jo oto juo kanduang antakan

  Labiah bak raso Batagak Panghulu

  siang jo malam baralek gadang

  lupo jo susah maso lalu

  takalo Dagang ka mahilang

  Babagai-bagai macam acara

  malam amal sambia bagurau

  panjek pinang pangguang gumbira

  sampai basaluang dalam lapau

  Dalam acara lelang kue

  Salo manyalo batanyo kaba

  bak cando koncek dalam embe

  malompek-lompek pitih kalua

  Baitu juo acara saluang

  bakandak lagu mintak dipantuni

  pitih bak cando ayam ka jaguang

  sabalun abih alun baranti

  Tangangak urang di lapau

  sakadai urang kanduang bayiakan

  kok cando iko sadonyo urang di rantau

  rayo lah baa tiok bulan

  Dagang dipuji dimulyakan

  kecek didanga kasadonyo

  kok ado di balakang nan mancibiakan

  itu tak lain dek iri sajo

  Lah sapakan Dagang di rumah

  mandeh baralek tiok ari

  Tamporo rampak labuahlah lanyah

  kami tarimo jo suko hati

  Lah tibo masonyo ka babaliak

  Cuti abih toko nan tingga

  tasabuik dek Dagang randang itiak

  taragak pulo jo palai bada

  Indak diulang duo kali

  mandeh carikan salero Dagang

  ampiang badadiah jo tangguli

  sampai jo tapai bapuluik lamang

  Apo di tabek lah babangkik

  di parak tunggua lah nan tingga

  kok lai ka ubek ibaraik sakik

  ka oleh-oleh tibo di Jawa

  Lah baliak Dagang ka rantau

  babaliak langang taraso kampuang

  tibo rusuah lah tabik galau

  dicaliak padi lah abih di lumbuang

  Lai bana Dagang baragiah

  pambali maco Dagang sabuik

  usah lai ka pambali siriah

  ka garam sajo indak doh cukuik

  Tapi dek Dagang lai manyabuik

  takalo kabaliak malam Sinayan

  ka dituka Cek, Bank batutuik

  dari Jawa sajo nanti dikirimkan

  Mandanga janji dari muluik

  lupo jo hutang sabalik pinggang

  isuak ko tibo urang manuntuik

  dilipek duokan bayia hutang

  Tapi apo ka disabuik

  Di Dagang janji bukan doh hutang

  Sajak Palembang ditutuik kabuik

  Jo surek surek takuik malayang

  Tarakhir kaba kami tarimo

  kadai Dagang disita urang

  untuak pambayia carteran oto

  nan Dagang baok wakatu pulang

  Kok bana itu nan tajadi

  lah bakicuah kami kironyo

  labiah rancak pulang jo padati

  cukuik jo rumpuik bayia sewanyo

  Kami sangko jambatan panyubarang

  kayu barakuak nan kami titih

  Sakitu sajo nan ambo sampaikan, bukan baniaik ka manyingguang, tapi

  iyo ka jadi pamikiran jo diinok manuangkan di badan diri ambo surang

  Wassalamu'alaykum w.w.

  Bandaro Labiah

Sumber : GROUP FB Rantaunet

http://www.facebook.com/groups/rantaunet/doc/251522641537115/