Udin :
Assalamu'alaikum, inyiak Basa !

Basa :
Walaikumsalam Din, meya kaba, Din?

Udin :
Kaba baiak nyiak, lai sihaek miang, Inyiak ?

Basa :
cando iko sihaek-no. Maklumlah awak alah gaek 'nko. Li ba'a tiago kini-go, Din?

Udin :
Lai…. lapeh makan , inyiak.

Basa :
Kalau mantun, kabau ditangah sawah lapeh juo makan-no , ayam dilaman pun lapeh juo makan-no.

Udin  :
Alah …..inyiak! bakarajo kareh jo mampagunokan utak  baa nan kadapek pitih banyak.

Basa :
Tapi ba'a bana wa-ang bakarajo kareh dapek pitih banyak, kalau wa-ang rokah babalanjo nan indak bakatantuan indak jo paretongan, amuah tamakan pokok, dietong galeh balabo kiro pokok nan tamakan.

Udin :
Iyo du inyiak, awak paralu bahimaek, hati hati mangaluagan pitih, ado nan ambo tanyo-gan bake inyiak.

Basa :
meya du?

Udin :
Saisuak kaba-no urang awak cimbuak, banyak ba apa basi dima-dima-no. Banyak nan bapitih, Coga tamasuak urang nan barado.

Basa :
Iyo pendek-no dima nagari nan rapek panduduak-no, ado apa basi urang awak cimbuak sinan.

Udin :
Kaba-no saisuak, oto jo truk alun bara lai, pengangkutan jo kureta api, bendi pidati.

Basa :
Itulah apa basi urang awak cimbuak mambuek bendi jo pidati. Kok bendi samo jo oto sedan, kok pidati samo jo truk pa angkuik barang. taisuak di tahun duo puluhan, alun bara oto. Nan ba oto tuan luak jo tuan kumandua bulando, sadang angku dotor jo angku damang babendi bugih.

Udin :
Inyiak ! Kaba-no ado carito, urang nan mamelok-I sumbu pidatino patah, ditanyo-gan bake mak nangkodoh: "Bara upah-no duh ?" dijawaok Mak Nangkodoh "Bayia miang lah bali baro". Ba'a carito-no du nyiak ?

Basa :
Mantun nah. Itu jawaok nagkodoh galia bijaksano, bak kecek urang kini "jawaok diplomasi". Kalau bali baro miang ka bara lah pitih-no, urang tau nangkodoh antun salapan anaknyo, ketek-ketek nan kadibari makan, tantu urang bapikia nak mambayia. Kadang mungkin urang tabayia maha, dek indak dikecek-gan-no jumlah pitih-no. diagak urang miang mambayia nan patuik.

Udin :
Inyiak! Kalau mantun urang awak cimbuak kini-go banyak jadi tukang jaik (tailor). Kok ditanyo-gan urang "bara upah baju jas open jo sarawa pintolon" kok dijawaok-no "bayia miang lah bali banang"  ba'a du inyiak?

Basa :
Indak mungkin du! Baju jas open, kain lapisan saten jo ganjalan bahu, lapisan sarawa pintolon tantu disadio-gan-no, bali banang miang dibayia tauncang lah atiak tailor awak. Indak jalan jawaok diplomasi.

Udin :
o, mantun Inyiak!

Basa :
Bialah baju guntian kaliang jo baju guntiang cino di upah-gan, indak juo bisa dijawaok " bayia miang lah bali banang" Tapi kok maupah sarawa kotok atau kodek kain saruang palakaek, mungkin indak ba'a di jawaok "bayia miang lah bali banang"

Udin :
Babaliak carito awak ka bake nangkodoh apa basi. Kaba-no taisuak urang awak cimbuak nan manjadi nangkodoh mampunyoi apa basi, banyak nan bapitih.

Basa :
Iyo nangkodoh nan mampunyoi apa basi banyak nan hebat, sarupo apa basi mak salam di payakumbuah, apa basi mak sariun di padang, apa loyang mak Dt. Bareno di alang laweh Padang dll.

Udin :
Kini-go karano oto alah sambuah masuak kampuang-kampuang, bendi jo pidati alah indak ado lai, tantu apa basi indak bara nan kadirajo-gan -no., kok ka lai karajo nan ketek-ketek mambuek alat pertanian, pangkua, tajak, ladiang, ruduih, sabik, kapak dll.

Basa :
Kok ado juo apa basi, dirubah jadi manjadi bengke oto, dicari muntir nan mamimpin bengke antun. Tantu apa antun taruih jalan, mamelok-I oto nan rusak.

Udin :
Jadi kalau mantun, apa basi nan salamoko dalam sejarah jadi kabanggaan urang cimbuak, kini-go tingga kenangan nostalgia miang, makin lamo makin habih. Tingga lai apa basi ketek-ketek.

Basa :
Itulah kemajuan zaman ka arah teknologi canggih.

Udin :
Parmisi pulang inyiak, iko saketek pambali timbakau anjik inyiak.

(Udin mamasuakkan pitih ka sakuih baju inyiak basa)

Sumber : Bulettin Sungai Pua No. 36 - Februari 1991
Disadur : Dewis Natra

TrackBack URI for this entry

Comments (0)

Subscribe to this comment's feed