|
Udin :
Assalamu'alaikum,  etek Reno !
Reno :
Alaikum salam ! E . Si Udin
kama amiang ang indak manyumbua-nyumbua ?
Udin :
aden pai ka Jawa, taguluik barangkek, indak talakik singgah ka Etek, lai sihaik miang Etek ?
Reno :
cando iko sihaik no !
Udin :
Aden ka Jawa, singgah ka Banduang, takajuik den, cucu Etek nan kuliah sinan, sasudah luluih ujian dapek titel sarjana ; ano tahu-tahu kawin jo urang sinan.
Reno :
I sarau, anto mantun !
Udin :
Indak ado urang awak nan tahu, konco-no nan salapiak sakatiduran jo no, takajuik bulo, tahu-tahu lah baralek miang no.
Reno :
Jadi ibu-no indak diagiah-no tahu ?
Udin :
Indak, tumah aden nan maagiah tahu ka bake ibu-no.
manggaruang ibu-no mandanga-gan kaba antun.
Reno :
Jadi atiak-no ansanak nan tuo, indak bulo diagiah-no tahu ?
Udin :
Indak nampak-no, aden mangirim surek keno maagiah tahu, den kecek-gan keno sado-no urang awak sinan indak nan tahu, lah baralek urang tahu-no.
Reno :
Atiak-no nan mambalanjoi-no tioj bulan, sajak-an apak-no maningga, indak bulo diagiah-no tahu. Indak mangarati den, anto cando itu parangai-no cucu den antun !
Udin :
baa jano awak, ano nampak-no saulah, tapi parangai-no sarupo kuciang pabalua. Banyak kawan-kawan-no tapurangah dek takajuik, sarupo hari paneh garang, tahu-tahu tibo patuih sabuang manyabuang jo hujan labek.
Reno :
Baa miang jano kawan-kawan-no ?
Udin :
Kawan-kawan-no indak bulo amuah mancikarawai urusan pribadi-no.
Bih haniang miang sado-no, indak ado nan batanyo.
Reno :
Kadia-no du diagiah tahu-no ibu-no jo atiak-no, nak jan tajkajuik miang ano.
Udin :
Mungkin badatak atino nan baso indak ka buliah di ibu-no baitu juo ataik-no nan mambalanjoi-no tiok bulan, jadi basipakak miang ano, baa nan takadia miang-lah dima tibo-no. Nampak-no nan jadi anak umah-no antun lai urang elok-elok, mahasiswi sadang kuliah.
Reno :
Kok di Etek, indak baa doh, kok indak sa-suku bana, asa lai ugamo-no samo jo awak, ugamo Islam. Nan paralu diagiah-no tahu ibu-no jo atiak-no, dek karano apak-no indak ado lai. Karano itu tampek ano pai batanyo pulang babarito. meya na ka dikarajo-gan basitinah jo nan tuo-tuo.
Udin :
Baral ka rancak-no, kalau baiyo batido jo nan tuo-tuo, kok bakandak-no, tantu diusaho-gan mancari-gan palapeh-gan kandak-no antun.
Reno :
Ala Din, kok bakandak atau batanyo bagai no, urang Sungai Pua nan ma andak-no, nan sarjana; ado, nan cando aia caro Inggirih-no; ado, nan malin Ustadzah; ado, nan kayo apak biyai-no; ado, nan sarupo bintang pilem rancak-no; ado. Pendek-no, tingga mamiliah amiang. Urang Sungai Pua lah banyak nan maju jo nan moderen, indak bulo katinggalan jo urang nan Jawa antun !
Udin :
Nan rancak-no tantu urang awak Sungai Pua diutamo-gan, karano pargaulan sakampuang, persamaan salero makan dll.
Reno :
Di den indak baa doh, kok tapaga karambia condong, apo buliah buek, lah jodoh-no. tapi nan pralu baiyo batido jo nan tuo-tuo. Jan dilongkahi miang nan tuo-tuo antun mintaklah pitunjuak jo nasihaek keno.
Udin :
Itulah Etek, banyak nan mudo-mudo kini indak mangarati baa adab bake nan tuo-tuo.
Reno :
Mungkin juo nan tuo-tuo talupo bulo manunjuak jo maaja nan mudo-mudo, atau sarik wakatu anjik batamu jo nan mudo-mudo, karano urangsalalu sibuak jo urusan-no surang-surang.
Udin :
Kini-go dima-dima alah ado parkumpulan nan mudo-mudo, kok dapek diado-gan partamuan sakali-sakali untuak mampalajari adat kampuang awak, jo maundang nan tuo-tuo, maado-gan tanyo jawab masalah adat kampuang awak.
Reno :
Rancak bana du !
Udin :
Parmisi dulu Etek, aden ka pai ka pasa, Assalamu'alaikum.
Reno :
Alaikum salam !
Sumber : Buletin Sungai Puar edisi no. 23 Januari 1988
Disadur Oleh : Erwin Moechtar
Trackback(0)
 |
TrackBack URI for this entry
Subscribe to this comment's feed
