Kamanakan :
Mak ado nan paralu ambo tanyo-gan bake Amak.

Mamak :
Mea nan ka diang tanyo-gan ?

Kamanakan :
pakaro sajarah kampuang awak nan paliang manonjol, yaitu

Komprensi Perantauan

Sungai Pua di tahun 1932 di jaman Bulando, kok dapek amak carito-gan ba'a asa-no mako tajadi "konprensi" antun, dan apo hasil-no dan ba'a kagiatan urang urang dahulu, nak dapek pulo kami nan mudo mudo maniru dan manuladani.

Mamak :
Sanang bana hati den wa'ang batanyo tantangan urang Sungai Pua taisuak nan bakarajo dijaman pamerantahan Bulando indak katuju dini awak maju, kok buliah ongok amiang taruih, dialua-no jan ado nan cadiak. Kini-go di jaman merdeka, awak bakarajo dibimbiang pamerintah jo dibari-no pangarahan bahkan ado nan dibantu jo pitih bagai.

Kamanakan :
Iyo mak !

Mamak   :
Tanyo ang carito taisuak tahun 1932, tapek-no Komprensi Perantauan Sungai Pua antun diadokan tgl 16-21 Februari 1932 di Sungai Pua, mungkin apak biyai waang alun layi.
Duo tigo tahun sabalun itu 1929/1930 wakatu itu zaman malaise pitih sarik bana, urang manggaleh iyo bana maadu ujuang pinjahik, Pamerentah Bulando berhemat "basanekeng" (bezuiniging) pagawai sarupo guru-guru diparanti-gan di agiah "wachtgeld" uang tunggu 80% dari gaji, sikola banyak diansua-ansua manutuik, karanno berhemat.

Kamanakan :
Iyo, Bulando indak ba'a dino awak indak sakola, pandia taruih amiang.

Mamak :
Urang kampuang awak wakatu itu sangaek padiah hiduik. Biyai-biyai awak manganyam sumpik mansiro sampai malam hari, hasil-no indak cukuik untuak sahari makan. Baitu bana padiah hiduik wakatu itu.

Kamanakan :
Samo jo resesi ekonomi kini, mak?

Mamak   :
Labiah parah layi wakatu itu, saluruh dunia dilando pinyakik malaise antun. Dibandiang dahulu elok juo hiduik urang kampuang awak kini.

Kamanakan :
Kiniko Alhamdulillah jahik manjahik layi maju, lah banyak nan jadi haji.

Mamak :
Panghulu-panghulu/niniak mamak sa Limo Jurai Sungai Pua mamikia-gan susah hiduik antun, diadogan karapatan untuak mancari jalan mangurangi susah hiduik urang kampuang, diado-gan paraturan: anak kamanakan indak buliah naiak oto kapasa Bukit Tinggi, kok kamamakai kendaraan juo pakailah bendi. Mukasuid niniak mamak kalau naiak oto pitih sadonyo kalua, tapi kalau naiak bendi, pitih babaliak baliak ka awak. Coitu jalan pikiran niniak mamak wakatu itu. Sayangnyo wakatu itu niniak mamak talupo bakonsultasi jo nan mudo-mudo cadiak pandai. Maaf den, mangecek alah caro alas indak caro cimbuak lai, kan indak ba'a du ?

Kamanakan :
Indak ba'a doh mak labiah jaleh dikami jo caro alas antun.

Mamak :
Kalau sakironyo niniak mamak bagumik jo nan mudo-mudo, mungkin paraturan antun indak tajadi, dicari jalan lain untuak kalua dari kasulitan ekonomi antun.

Kamanakan :
Diantaro niniak mamak tu tantu ado nan bapikiran maju mak?

Mamak   :
Niniak mamak nan bapikiran maju banyak pai marantau, baitupun nan mudo-mudo masih banyak nan basikolah. Niniak mamak nan dikampuang sabagian gadangkan buto huruih, indak mambaco koran, alun ado radio jo TV.

Kamanakan :
Jadi baak jeno pemuda yang bapikiran maju wakatu itu mak?

Mamak   :
Mereka indak satuju jo larangan naiak oto ka pasa (Bukit Tinggi), barundiangnyo di Bukit Tinggi, apobilo peraturan itu indak dicabuik inyo basadio malanggar peraturan antun.

Kamanakan :
Kuaiak samangaik pemuda-pemuda antun mak?

Mamak   :
Inyo batekad tatap naiak oto kapasa Bukit Tinggi walau apo sajo nan katajadi. Suatu wakatu di Bukit Tinggi saurang nan mudo manggaleh langsuangse naiak oto, saolah-olah indak ado paraturan. Pemudatu dihadang samo hulubalang pagawai Kapalo Nagari, ditempeleng-no pemudatu.

Kamanakan :
Kok sampai manampeleng hulabalang antun, nan naiak oto indak anak-anak, padagang nan alah barumah tanggo alah dewasa.

Mamak  :
Oto jalan taruih kapasa sambia manambah panumpang mulai dari tanah lapang taruih kalimo suku, bantuak indak ado larangan. Sampai di Bukit Tinggi nan kanai tampelengko langsuang mangadu ka kantua polisi, malaporkan bahwa inyo kanai tampeleng hulubalang jo banyak saksi mato sawaktu naiak oto disimpang Balai Panjang.

Kamanakan :
Ba'a jadinyo mak ?

Mamak   :
Polisi mahimbau hulubalangtu, sataruihnyo di proses verbal dan dibawo kapangadilan. Kaputusan di pangadilan hulubalangko dikanaikan hukuman pinjaro satahun.

Kamanakan :
Jadi ba'a ka adaan sasudahtu mak?

Mamak   :
Mandanga hulubalang iko masuak pinjaro niniak mamak jo panghulu-panghulu nan mambuek peraturan iko jadi takajuik sambia mangaretek. Baliau-baliauko disesali oleh nan mudo-mudo anak kamanakan, manga indak barundiang dulu jo nan bakapantingan naiak oto, sabalun dikaluakan paraturan. Sadang Bulando se kalau ka mambuek undang-undang dirundiangkan dulu jo wakia rakyat "Volksraad" (dewan rakyat), disitu duduak wakia wakia rakyat dan sasudah disapakati jadi undang-undang. Sasudah kasustu panumpang oto ka Bukit Tinggi sarupo biaso. Jadi wibawa niniak mamak dikalangan nan mudo mudo samakin hilang, sampai ado nan maimbau "inyiak ngangak".

Kamanakan : Jadi ba'a kalanjutannyo mak ?

Mamak   :
Ditahun 1930 ateh inisiatif niniak mamak nan mudo-mudo jo niniak mamak di parantauan, diadokan rapek niniak mamak saluruh limo jurai Sungai Pua. Hasilnyo antaro lain mambantuak suatu organisasi "Persatuan Penghulu Penghulu Limo Jurai" Sungai Pua. Salanjuik-no mamutuihkan bakarajo untuak mahilangkan jurang (gap) antaro niniak mamak jo pemuda-pemuda. Malalui pertemuan sambari ceramah jo diskusi antaro niniak mamak limo jurai Sungai Pua jo maajak nan mudo-mudo ikuik sato mambarikan buah pikiran, sabaliaknyo mamak ma adokan kursus adat untuak nan mudo mudo.

Kamanakan :
Sia pengurus organisasi tu mak ?

Mamak   :
Tapiliah jadi pengurus Persatuan Penghulu Penghulu Limo Jurai Sungai Pua :
Pelindung/Penasehat  :  Dt. Majolelo Walinagari Kapalo Koto
                                   Dt. Rangkayo Nan Gadang Walinagari Tangah Koto
Ketua                      :  Habib Dt. Gaduang Basa
Wakil ketua               :  Malisi Dt. Labiah Nan Putiah
Sekretaris                 :  Murad Dt. Putiah
Wakil Sekretaris         :  N. Dt. Tan Bandaro
Bendahara                 :  Moh. Nur Dt. Tungga
Komisaris Komisaris      : Yahya Dt. Sidubalang
                                   Dt. Sinaro Kayo
                                   Dt. Palindih
                                   H. Karap Dt. Batuan Nan Hitam

Sasudah organisasi tu bajalan hampia satahun alah mulai ado saliang pengertian dan bajalan baiak, dalam sabuah rapat pleno Niniak mamak sa Limo Jurai basamo tigo jiniah, oleh pemuda pelajar dan niniak mamak nan mudo-mudo dikamukokan saran supayo diadokan suatu musyawarah atau komprensi keluarga Sungai Pua nan ado diperantauan. Rapat antun manyatujui dan manyarahkan ka nan mudo pemuda/pelajar untuak mambantuak badan penyelenggara komprensi antun. Surek kaputusan antu ditando tangani dan cap jempol karano buto huruih, hampia 70% dari niniak mamak nan hadir.

Kamanakan :
Jadi sia nan mambantuak badan penyelenggara komprensi antun mak ?

Mamak :
Niniak mamak nan mudo-mudo sarato pemuda/pelajar, kamudian tabantuak Panitia Penyelenggara Komprensi (organizing committee) nan susunannyo sabagai barikuik :
Pelindung       : Dt. Majolelo (Walinagari Kapalo Koto)
                       Dt. Rangkayo Nan Gadang (Walinagari Tangah Koto)
Ketua            : Murad Dt. Putiah
Sekretaris      : Kamaluddin Ibrahim
Bendahara      : Syamsuddin Joyo
Komisaris        : Kusai St. Mantari
                       Syahruddin Ibrahim
Beberapa bulan sabalun komprensi disosialisasikan masalah komprensi ko ka parantau parantau.

Kamanakan :
Apo indak ado Sub Panitia, mak ?

Mamak : 
Ado, alah dibantuak Sub Panitia nan ka mambantu persiapan komprensi, antaro lain : manganai tampaik, alat untuak sidang, hiasan gedung, spanduk. Sub Panitia iko disarahkan ka PERMI Sungai Pua nan dipimpin Umar Dt. Garang sabagai katua, Hisabuddin Taher sabagai sekretaris. Kemudian sub panitia kosumsi, disarahkan ka Jamiatus Syura  jo Ittihadun Nisak, Sub Panitia Sungai Pua nan dipimpin oleh Abdul Munir Muin Dt. B. Nan Bareno sabagai katua dan Abdul Malik Ibrahim sabagai sekretaris. Dan Zanzam jo Saniah sabagai pambantu. Sub Panitia olahraga pertandingan sepak bola salamo komprensi disarahkan ka Abdul Gani Arsyad sabagai katua, Kamaluddin St. Rajo Ameh sabagai sekretaris dibantu Lutan St. Panghulu, H. Dt. Panghulu Rajo, Rasyidin Pakiah Kayo, Rasul St. Muncak, Agus St. Batuah dll. Sudah antun diado-gan juo api unggun oleh kapanduan (Pramuka) sa Sungai Pua nan dipimpin oleh Hasan Yunus Dt. Nan Sati dari kapanduan Elhilal. Untuak bagian kaamanan dipimpin oleh Inyiak Haji Idris, Abu Jahil St. Marajo, Dt. Palindih, Tara St. Mudo.

Kamanakan :
Ba'a soal dana Mak?

Mamak :
Paralu dinyatokan bahwa untuak biaya permulaam panitia komprensi, sarupo ongkos administrasi, percetakan dan lainnyo, alah ditarimo bantuan uang nan agak banyak jumlahnyo labiah kurang ciek rupiah ameh dari pedagang nan kanai tampeleng hulubalang antun. Salain itu panitia manabik-gan Buku Agenda Komprensi jo mamasang iklan iklan dari pangusaha Sungai Pua dan diedarkan sacaro cuma-cuma, isinyo antaro lain :
Maksud dan tujuan komprensi
Acara rapek rapek
Namo anggota panitia jo tugaih masiang masiang
kamus ringkas bahaso asiang
Iklan perusahaan jo toko-toko Sungai Pua.

Dikulik agenda ditulis motto dari komprensi : 
Allah tidak akan merubah nasib satu bangsa, sebelum bangsa itu sendiri merubah nasibnya (Al-Quran)  

Mencintai tanah air itu sebagian dari iman (Hadits)

Hujan ameh dinagari urang, hujan batu dinagari awak, namun nagari awak juo nan dicintoi.(Pepatah)

Kamanakan :
Jalan-no komprensi ba'a mak?

Mamak :
aden bajanji pulo jo etek waang, bisuak den sambuang baliak caritoko dih, kan lai ndak ba'a doh ?

Kamanakan :
Kok mantun jadi lah mak…!!!

Sumber : BPS No 17 November 1986
Disadur oleh : Dewis Natra

TrackBack URI for this entry

Comments (0)

Subscribe to this comment's feed