Dialek cimbuak

Kamanakan :
Mak ! ado nan ka ambo tanyo-gan ka Mamak, Jan bacan pulo Mak dek ambo banyak batanyo.

Mamak :
kadia no du ! Samantaro aden layi hiduik 'nko.
melah indak ado aden layi, tantu wak ang anjua anjah ka hilia ka mudiak mancari tampek batanyo.
meya na ka diang tanyogan kini ?

Kamanakan :
Mak ! Ado pameo urang mangecek-gan
          "Bak paisok urang Sikumbang ka sarak"
Meya mukasuik-no du, Mak ?

Mamak :
mantun ah ! Iko carito taisuak carito lamo. Urang Sikumbang antun ano ba alam leba balapang dado. Tasabuik layi di urang :
          "Salaweh tabia urang Sikumbang"
Mukasuik-no sagalo meya nan ka diambiak kaputusan, dipikiagan-no dalam-dalam, dipiyuahno talingo-no sariang-sariang, dimanuang dihinokgan-no.
Kok banda, pambagian urang Sikumbang. Itulah saisuak urang Sikumbang kalau ano ka mancarai-gan anak-umah-no, dibawo-no bapikia panjang, dibawo-no maisok, paisok-no ba-timpeh-timpeh.
Lah bakukuak ayam hari ka siang, dari sanjo indak ba-anti-anti maisok, pulang baliak pangana-no, ka bacarai atau indak.
Kadang-kadang tabayang di banak-no saulah laku anak umah-no. Kadang-kadang tabik jajok no bake nan lain ipa ambayan mintuo dll.
Indak anti-anti maisok, dek bapikia. Kok caro kini, lah habih paisok ampek limo bungkuih namun carai (thalaq) alun juo tasabuik-an.

Kamanakan :
Mak ! Apak etek ambo urang Sikumbang, pangulu bulo layi, katiko ano mancarai-gan etek ambo, ano indak maisok do.

Mamak :
Kan lah den kecek-gan ke ang, iko carito taisuak. Kini go alah saroman miang sado-no.

Kamanakan :
Taruihganlah carito-no, Mak !

Mamak :
Ciyek layi urang Sikumbang 'nko, ano :
               "Batali kincia"
Sarupo tali kincia masin jaik, ba-pauleh-gan ujuang jo pangka. Baputa-puta sinan ka sinan juo. Itu arati-no ano bapikia panjang ba-baliak-baliak ka maambiak suatu kaputusan. kaba-no taisuak manuruik data-data Angku Kali, urang Sikumbang jarang bana nan carai laki binyi.

Kamanakan :
o, mantun du, Mak !
Kok ambo satuju ambo, bia balapik-lapik paisok bapikia panjang kok mancarai-gan binyi. Ambo danga pitua Tuanku Ulama-ulama, carai atau thalaq antun suatu nan dibuliah-gan, tapi Tuhan Allah mambanci thalaq antun.

Mamak :
Urang pasukuan lain ado nan batali sarupo :
                "Tali alang-alang"
melah taraso angin agak kancang, di-oro-no tali alang-alang antun. Kok kandua lunak angin di-kumpua-no tali alang-alang antun.
Ado bulo nan batali sarupo :
                 "Tali papeh"
Ano batanang miang mananti-gan umpan papeh no dimakan ikan. Melah dimakan-no di ikan umpan papeh-no, ano bategang-tegang helo-mahelo jo ikan.
Dikecek-gan ke ang iko carito taisuak.

Kamanakan :
Kok di jaman kini, Mak. Tu mah di Pengadilan Agamo (KUA) mamutuih-gan thalaq atau carai, baru sah caraino manuruik undang-undang.
Mak ! Iko ado pulo papatah babunyi :
                  Ka sawah pangkua ba labiah
                  Ka makan pinggang tak sadang
Meya mukasuik-no du Mak?

Mamak :
Iko ma-ibarat-gan sasaurang nan gadang ota kian kamari, kecek banyak rancana sambuah, tapi karajo pamaleh, aka cancia, sanang-sanang miang nan katuju di no.
Parangai kuciang pabalua, aka ciluah. Pamaleh jo panyagan, barek ikua.
Kok urusan makan ano capek. Salero pa-amuah, dari pado takurang bialah talabiah.
Iko parangai nan paralu dirombak lakeh, apo layi jo nan mudo-mudo, supayo diaja rajin, capek kaki ringan tangan.
Kalau indak mantun, pabilo juo kampuang/desa ka maju jadi juaro, negara "lepas landas". Akibat-no kalau indak dirubah parangai antun, terjadilah pengangguran.

Kamanakan  ;
Mak ! ado bulo tadanga papatah :
               "Duduak sarupo urang ka manjua
               Tagak saroman urang mambali."
Meya arati-no du Mak ?

Mamak :
Iko manggambarkan sasaurang paimpin basifat manapiak, ano purak-purak membela managakkan keadilan, tapi nan sabana-no parangai-no marusak-gan jo mahancua-gan.
Sifat 'nko barbahayo dalam masyarakat. Dek parangai-no indak ikhlas antun, lamo-lamo ka-umbulan juo, jimek juo urang tahu parangaino dan akibat-no kalau indak amuah maubah parangai-no, patuik bana ano ditariak dari peredaran,

Kamanakan :
Iko ado pulo ciek layi Mak !
                "Pilin kacang nak mamanjek
                 Pilin jariang nak barisi"
Meya pulo tujuan-no du, Mak ?

Mamak :
Iko matamsilkan saurang pemimpin nan indak mampunyoi itikad baiak dalam mamimpin urang banyak. Ano bamukasuik anjik kapantingan diri-no surang miang, dino sa-barek-barek baban, labo  anjik-no diparalugan-no.
Tabi'at ko indak ka lamo batahan. Lamo-lamo tantu tatangkok tangan kacudiran. Hilang kaparcayaan uranng banyak keno.
Iko tabiat nan paralu dijauhi, kalau nak jadi pamimpin rakyat. Kalau indak mantun ondoh-poroh bagulimang doso.
Layi jaleh di ang du !

Kamanakan :
Layi Mak ! Tarimo kasi.

                                                                             -oOo-

Sumber : BSP 15 Juni 1986
Oleh : Andika
Disadur Oleh : Erwin Moechtar
T

TrackBack URI for this entry

Comments (0)

Subscribe to this comment's feed