nan

picak

saba

datuak

Pasambahan (3)
Caro Malegokan Kato
Oleh : Amiral Agus Rajo Lelo
Disadur dari buku Pasambahan/Pidato Alek Adat Minangkabau

Cara Malegakan Kato ada beberapa cara :
· Duduak surang basampik sampik, duduak basamo balapang lapang, dapek basamo dipaiyokan dapek surang di bulati, dek karano kami duduak baduo batigo, nak dibawo kato baiyo, mancari bulek nan sagolong, picak nan salayang, saba mananti malah datuak.

· Lariak kabadan diri ambo, nan bak umpamo buruang bondo, tabang sabondong ka udaro, panek malayang nyo malayok, panek maninggi nyo marandah, tatagun mancaliak rantiang lai kok suko di inggoki, ban nan kini iko, mayalang iyo diangguakkan, manyalang indak digeleangkan, nak diwalak rundiang jo baiyo, mananti datuak sakutiko.

· Lamak siriah balega sapah, lamo kato dipaiyokan, lamak makan dikunyah kunyah, ba'a nan kini iko, kok nan lamak samo didanga, kok nan rancak samo dicaliak, nak ambo cubo mampaiyokan nak mancari aia nan janiah sarato sayak nan landai sipaik mananti malah datuak.

· Dek bukik tumpuan kabuik, dek lurah tumpuan aia, kapadang barantang tali, karimbo bakarek rotan, disungai jalo bamain, tabiang ditingkek dengan janji, rimbo diolah jo mufakat, taga dek duduak dalam rapek limbago basidang dalam adat, ba'a nan kini iko, rantak nak nyo sadaram, lenggang naknyo sa ayun, suto jo turak nan salasai, nak samo naiak kaantakannyo, kato dilatak dalam bana, barih tasimpan dibalabeh, rundiang dibawo jo baiyo mananti sutan sakutiko.

· Lariak kabadan diri ambo, umpamo urang pai manyumpik, diambiak galah nan salapan, sarato damak nan baipuah lalu bajalan masuak utan, lah tibo inyo disinan, iyo dirimbo nan satumpuak, mamandang ilia jo mudiak, mancaliak kiri jo kanan, tampak saikua buruang nuri, sadang mangirai ngirai kapak, sadang balapeh lapeh arak, ba'a nan kini iko manyalang buruang nan katangan, dilegokan kato jo rundiang, sipaik mananti malah datuak.

· Tantangan sambah jo titah angku tadi, diamba gadang dianjuang tinggi, tapi dek adat kato baiyo, pusako gayuang basambuik, bajalan nak baiyo, bakato bak bamolah jo baliau angku nan duduak basamo, supayo rantak nak sadaram, lenggang nak sarayun, picak nak satapik, bulek nak sagolong, direntang kato jo rundingan, mananti datuak sakatiko.

· Tapek kabadan diri ambo, umpamo urang ba alang alang, dirawuik tonggak jo bingkai, lalu ditimbang samo barek, ditutuik jo karateh putiah, dibari baikua bakapalo, diagiah banang jo taraju, dilapeh sadang nan bak kini, io ka awan manggajuju taruih ka angin nan basiru, lah tibo inyo diateh, bagaluik galuik jo kabuik, babega bega jo awan, badan tinggi bunyi alah jauah, gamang tibo dingin lah datang, raso kakandua ditagangi, raso katagang dipakandua, kok putuih sadang bak kini, tagamang gumpalan ditinggakan, tapi ba ato nyo lai, samantaro banang kakumparan manjalang taraju, lapeh katangan kato di elok jo rundingan, sipaik mananti malah sutan

· Sapanjang kato datuak tadi, nan tatumpu ka ambo sananglah hati mandanganyo, pandai bana datuak babilang dari awa sampai akianyo, satitiak indak nyo hilang, sabarih indaknyo lupo, licin badindiang camin, kok datanyo balantai papan, aluihnyo mangulik dasun. Nah bak sibisu barasian, taraso lai takatokan tidak, jo kok talalai manjawabnyo, ampun jo maaf kami mintak, apolah sabab karanonyo, ambo rang ketek mudo mantah, angan angan banyak nan cewang, pikiran banyak nan ragu, biduak untuang pandayuang hati, niek nak sampai kalabuhan, ambo tak pandai mangamudi, alun sikola dihaluan, ba'a nan kapambarinyo, sasuai bak kato undang, kok tagamang mintak dijawab, kok licin lai batungkek, samantaro manjapuik jawaban nyo nak ambo baiyo, io kamamak nan salingka duduak, sananglah datuak manantinyo.

Kironyo pangka minta mambaco do'a keselamatan kapado kito, tapi awak indak bisa mambacaonyo, caro manjawabnyo :
· Alah tibo ulak dari datuak mamintak kapado ambo, nak minta disandakan ka nan gadang, digantuangkan ka nan tinggi, nak dibacokan do'a gak sapatah. Tantangan do'a ka dibaco, sasuai juo bak undang datuak, alang tukang bianso kayu, alang cadiak rusak nagari, alang alim rusak agamo, ba'a nan kini iko karano kito lai duduak jo nan tahu, tagak jo nan pandai, mako untuak mambacokan do'a, baiaklah kito mintak ka angku ……… samo ma amin malah kito.

Kalau ada sebuah pertanyaan yang nggak bisa kita menjawabnya (Palapeh kabek)
· Sapanjang kato datuak tadi, io pulo malah kironyo tapi dek kami sulik baputa di nan sampik, payah batenggang di nan tidak, dek lamo mungkin kok lupo, dek banyak mungkin kok ragu, ba'a nan kapambarinyo, nak jangguik pulang kadaguak, nak parmato kakapauknyo, sarancaknyo lah nan ka manjawabnyo, nan mananam nan mancabuik, nan punyo nan ma ambiak, pulang maklum bakeh datuak

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!