Alek : Dt. Rajo Lelo
Pangka : Dt. Rajo Intan
  Bukak kato/ sambutan sasuai jo kehadiran undangan

Alek :

Sambah sujuik jo simpuah, sabarek bunka na piawai, naraco luruih main daun, indak basisiak jo basibak, indak baatok jo barampai, ketek nan indak basabuik namo, gadang nan bukan baimbau gala, ujuiknyo sambah nan taserak bakeh hadirin sadonyo.
Sambah kapado………..diteruskan kehadirin sasuai pangkek dan jabatan masiang masiang.

Kalaluannyo :
Apolah nan ambo imbaukan ka datuak kini, satantang kami kok nan datang, nan sarantak langkah turun janjang, sarayun lenggang dinan data manuju rumah tanggo datuak, dek elok baso nan datang, dek baiak budi nan mananti, lah tabukak pintu bakeh lalu, lah takambang lapiak tampaik duduak, makan sudah minum salasai, auih lapeh, paruik lah kanyang, nan kini, nasi alah baransua jadi dagiang, aia alah baransua jadi darah, karano hari barembang patang juo. Kok lai kiro kiro nak mamiliah, paratian ndak bakandak, sasuai nan bak kato urang
 
 

Bukan kamiri nak urang bonjo
 Ladang nak urang koto gadang
 Bukan kami kamari sajo
 Makasuik hati pai maminang

Adapun nan kalaluannyo, danga dek datuak sabuah lai
 

Disiko lai basurek nahu
 Batitiak diateh kasau
 Disiko lai babalam mau
 Mukasuik hati ndak mancakau

Tapi kok mancaliak diateh rupo, satantang caro urang kini, indaknyo titiak dari langik, malah manbosek dari bumi, tingga dikito marestui.
Alah lah bauriah bak sipasin, babaun bak ambacang, tantangan hubungan,
 Kamanakan datuak si …..
 Jo kamanakan kami si …
Ba'a nan kiniko, kok talinyo nak samo kito irik, kok tangkainyo nak samo kito jinjiang, janji nak samo kito pacik, mintak jawaban dari datuak, tolong labuahkan jo bicaro, nak samo sanang dalam hati, sajuak didalam kiro kiro.

Jawab
Datuak Rajo Intan….dipaiyokan saganap pankalan sarato yang patuik patuik

(Biasanya dalam pelaksanaan melamar selalu diadakan tukar cincin atau timbang tando)

Alek……………….Dt. Rajo Lelo
Mandanga jawaban datuak tadi, sajuaknyo raso bakipeh, sanangnyo raso babuai, lah samo sanang dalam hati, sajuak taraso paratian, tapi nak samak nyo sakali angkuik, rimbun nyo nak sakali tutuah, sakali manggaruak puro, duo tigo utang tabayia. Sakali marangkuah  dayuang, duo tigo pulau talampau. Manuruik caro nan biaso, tapakai didalam adat, tasabuik di undang undang, batali dapek di irik, batangkai buliah dijinjiang, pacik arek nan jan juo, ketek tando gadang buatan, panahan duduak bakisa, dek mato paliangan setan, dek hati paliangan Allah, nak saikek sakabek arek, nak nyato babua mati, kok rupo nak samo kito caliak, bantuak nak samo kito pandang bagulinggang mato rang banyak, allah Ta'ala kasasinyo, sagitu pintak pinto kami.

(diadakan rundingan, kemudian hasilnya dikembalikan sesuai hasil rundingan dan kesepaktan ke sipangka)

Dt. Rajo Intan………kato dikumbalikan
Manyimak rundingan dari datuak, itulah kato sabananyo, alah batenggek di pusako, alah taracak dilimbago, kok ka ateh alah taambun jalan, kabawah alah takasiak bulan, ampun lah ambo dek pangulu, ciek salah baribu ampun, panghulu banyak nan sati, urang gadang banyak nan batuah. Pado marusak tamaik lalu, nan dituju lai itu juo, tak kalo sumua kadikali, rantiang ka dipatah, panghulu badiri dalam nangari, mandirikan adat jo pusako maadokan barih jo balabeh. Ma iyo kini jalan tabantang nan kito tampuah cupak tatagak nan kito isi, diundang ado tasabuik di adaik ado tapakai, namun tumbuah sarupo iko kini, sandi andika dalam kampuang, inggiran silang jo salisiah, mamak tampuak tangkainyo, kok karuah mamak manjaniahkan, kusuik mamak manyalasaikan. baa tantang pamintaan datuak tadi, alah ditilungkuik ditilantangkan, alah rapek sagalo mamak, ba iyo iyo ibu jo bapak, mancari bulek nan sagolong, picak nan salayang, alah dapek kato nan sasuai, rundiang nan saukua, kok katehnyo alah sapucuak, kabawah alah saurek, dek bana nan di pabuek, tapakai didalam adat, lamaran datuak kami tarimo, lah kasanang hati datuak.

Oleh : Amiral Agus Rajo Lelo, disadur oleh Dewis Natra
Sumber : Buku Pasambahan/Pidato Alek adat Minangkabau

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!