Sialek :
Dilauik ombak badabua
alun jo riak manyampaikan
Bapesong angin ka kiri
Ikan di lauik lah marupo
Mambayang mangkuto Retno Ali

Niniak jo mamak sadang batutua
Dek urang nan tidak kadangaran
Antah tasauak di limbago
Antah taracak dalam dulang
Mintak diulang buah panitahan
Nak tantu tando jo ujuiknyo
Undang nan rapek ka pambari, Sutan

Sampai … Sutan ? Kok itu iyo tu Sutan, dilambak pulo nan bak kian, ditingkah pulo bak pamatang, ditingkah sapatah undang Sutan, tingkahnyo pulo dari hambo :

Timua nan duo jo salatan
Sapiah balahan tigo jurai
Sajurai ka Banua ruhum
Sajurai ka pulau perak
Antaro Tiku jo Pariaman

Kalau baitu tanyo Sutan
Tarang lah buliah dikatokan
Nyato lah lahia dek rang banyak
Kok indak diulang buah panitahan
Jawabnyo sajo diadokan, Sutan

Sialek :
Malatuih rangkiang di halaman
Nan ketek eca barbeca
Intan jo padi manjaremek
Indah sakali moh ruponyo
Pucuak jo arai panyudahi

Kalau baitu kato Sutan
Undang nan tuo lah didanga
Adat labuah diulang pasa
Adat kato diulang sunat
Adat baitu dahulunyo
Minta diulang buah panitahan, Sutan

Sipangka :
Satu Bodi Caniago
Kaduo Lareh Koto Pili
Batu Batikam tampek badiri
Tampek mangaji adat jo pusako

Kalau baitu kato Sutan
Dek lamo banyak nan lupo
Dek lambek banyak nan ragu
Kok indak diulang buah panitahan
Jawabnyo sajo diadokan, Sutan

Sialek :
Baju baguntiang Sutan Said
Siba batanti kaduonyo
Ragi baturab suto putiah
Pakaian anak rajo basa

Kalau baitu kato Sutan
Hilanglah akal sakutiko
Sungguahpun rahib sambah Sutan
Kalam diminta tarang buliah
Mintak diulang juo buah panitahan
Nan tantu tando ujuiknyo
Undang  nan dapek ka pambarinyo, Sutan

Sipangka :
Maurah Tambo Rajo Bantan
Tasuo ameh camin dilariak
Jadi tabukak hati pangana
Dapeklah tambo ka ibarat
Batamu rajo banyak undang

Kalau baitu kato Sutan
Bakato lanteh ka bakain cabiak
Kok angguah anggak mangana
Di ateh kato samupakat
Kok indak diulang buah panitahan
Jawabnyo juo hambo adokan, Sutan

Sialek :
Badeta batiak barendo
Babaju guntiang Pitalah
Siba batrab jo cokolat
Buatan Jawo jo Patani
Diikek lalu disaruangkan

Sabanyak kato Sutan cako
Kato nan balun dipaiyo patidokan
Kapado sipokok sipangkalan
Kok bajalan nak babateh
Kok balayie nak bapulau
Kok bakato na basudah
Bawolah kato jo mupakat
Kapado baliau nan hadia duduak
Jangan maragu hati juo, Sutan

Sipangka :
Kok itu … iyo Sutan, iyo pulo malah kironyo.
Binjai banamo tanah Langkat
Kudo bararak nak ka Medan
Kato dibawo jo mupakat
Tagak mananti malah Sutan

Lalu dibawalah kata mupakat

Sipangka :
Ditarok kain hirun manih
Dibawo Sutan mudiek Padang
Batamu muluik samo manih
Lai mah kato ka baulang

Ulangnyo dari hambo :
Ka rimbo manjarek bakiak
Kanailah buruang balang tigo
Masuak ka sangka ameh
pamenan puti pulang mandi
Dan lagi pintak hambo
Kapado niniak dengan mamak
Sarato dunsanak saudaro
Sirieh mintak dicabiak
Pinang minta di gatok
Itu nan pintak sipangkalan
Supayo  nak sanang hati kami, Sutan

Sialek :
Rajo Amat  rajo  nan saleh
Juduan Puti Lunak Lambok
Anjuang batiek aso-aso
Sabab dek puti dilautan

Kalau baitu pintak Sutan
Jikok sirieh ka dicabiak
Jikok pinang nan ka digatok
Samo sato Sutan Juaro
Nak samo sanang paratian, Sutan

-oOo-

Sumber : Sumarak Nagari : Alur Pasambahan dan Pidato Adat Minangkabau
Disadur Oleh : Erwin Moechtar  

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!