Assalaamu'alaikum wa rahmatullaahi wa barakaatuhu

Katiko ambo ketek-ketek saisuak, nenek ambo sangaik bana bangih baliau kalau kami makan barimah, bakapantiangan nasi ka lapiak (kami saisuak tu makan
baselo di lapiak). 'Sataun mangko  ka pulang no go dek kalian, kalian pasando-sandoan sin no. Manangihno, mangaduno ka Tuhan Allah,  bangih Tuhan Allah ka awak. Jaan kalian pasando-sandoan tu nasi. Kalian pakecai-an, biko tacampak no jadi sarok. Badoso awak, lai jaleh dek kalian. Indak buliah
makan barimah-rimah.' Sarupo itu biasono baliau mambangih-i kami, sabagai pandidikan ka kami nan ketek-ketek supayo baraja kameh jo imaik, indak
mubasia, indak mambuang-buang nasi.

Kalau ado kajadian nan agak di lua daripado nan biaso, dek baliau diambiak pulo untuak bahan maajai kami. Misalno, katiko gunuang Marapi nan talatak
sabalah ka mudiak dari rumah kami mangalua-an asok, malatuih, baliau mangecek-an, 'Aa itu paringatan Tuhan Allah. Jaan kalian buruak laku juo, nan kamanjadian bangih Tuhan Allah,' baitu jano baliau.

Katiko ketek-ketek tu, kami iyo agak jaek-jaek. Ado 'pamainan' kami nan sangaik bana bangih nenek ambo tu mancaliak, yoitu maadu ayam. Di kami katuju bana mancaliak ayam balagotu, sampai salah ciek kalah. Biasono, kami bao ayam jantan, pai kami kalua masuak kampuang, mancarian lawan ayam. Kalau
basuo, kami ampok-an ayam jantan nan alah digili-gili saketek. Basabuanglah ayam tu agak sajamang, kalaupun indak sampai ado nan kalah, malakik urang
nan punyo ayam kalua manyumpah-nyumpah, bangih. Enek ambo biaso mangecek-an, 'Isuak, di ari kiamaik, kalian nan tukang adu ayam tu ka diaduno di ayam,
sampai badarah-darah sarupo ayam nan kalian adu,' jano baliau. Katiko ado di antaro kami nan manjawab, 'Kan indak baa bagai du du nek, nak balatiah ayam
tu saketek balago.' Baliau jawab,'Wak-ang diaduno di urang, bacakak sampai ba kalukoan lai amuah ang? Aa baitu pulo di ayam tu, sakik dino. Indak
buliah sarupo itu awak ka binatang. Binatangtu musti lo disayangi, nak jaleh bana di kalian,' kecek baliau.

Kato-kato baliauko tatap juo tangiang-ngiang di ambo sampai kini. 'Binatang tu musti disayangi....'

Sadiah bana ambo mancaliak urang mambao ayam bapuluah ikua, bakabek, sudah itu bagantuangan di bagasi sapeda motor. Panah nampak di ambo katiko sapeda motor tu baranti di lampu merah, ado ayam tu nan ampia mati dek mairuik asok knalpot. Pamandangan sarupoko, tiok ari nampak dan indak ado urang nan maraso bahaso itu sabuah 'kajahatan' taradok ayam-ayam nan malang tu.
takana-kana di ambo kecek enek ambo saisuak, 'bangih Tuhan Allah ka awak kalau awak buruak laku tu.' Antah baa, saraso iyo sadang bangih Tuhan Allah
tampak di ambo, jo caro mandatangkan panyakik flu buruang, malalui ayam-ayam nan tiok ari 'awak' aniayo jo indak manaruah sayang saketek juo ka binatang ketek nan malang tu.

Wassalaamu 'alaikum wa rahmatullaahi wa barakaatuhu

Lembang Alam

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!