Sipangka :
- Niniak mamak hambo, ka pai tampek batanyo ka pulang tampek babarito, umpamo kayu gadang di tangah padang, ureknyo bakeh baselo, gadang batangnyo tampek basanda, rimbun daunnyo tampek balinduang, tampek balinduang kapanasan, tampek bataduah kahujanan, bari maaf hambo dalam buah pasambahan.
- Juaro sialek, sambah tibo bakeh Juaro !

Sialek :
Sambah di Allah, manitahlah Sutan.

Sipangka :
Sungguahpun Sutan saurang bakeh hambo manibokan salam jo buah pasambahan, nak sarapek nyolah niniak jo mamak, sifat tarhalia ateh rumah nangko, usah kadibilang kadiatap gala, sambah sajo dimuliakan, pambilang paatap gala, laikoh tampat samparono sambah tibo bakeh Sutan ?

Sialek :
Sambah di Allah, manitahlah Sutan.

Sipangka :
Sambah nan hambo tibokan, titah nan hambo antakan, iyo juo bak undang dalam pasambahan.

 Malatuih badia dari hulu
 Kanailah buruang di udaro
 Malayang lalu ka subaliak
 Bungo disakah tuan Pilat
 Disakah lalu dibawonyo
 Asiangkan meja jo kurisi

Maagak di hari nan kapatang, iyo baturuik dek juaro, mambawo siriah nan sacabiak, mambawo rokok nan sabatang, kahadapan niniak dengan mamak, sarato karib jo kabiah, ipar jo bisan, nak manghadiri pakarajaan nangko.

Baapo di hari nan sahari nangko, kok nan jauah alah tibo, nan dakek datang mananti, sakarang alah bahadri. cibuak badantuang, janjang batingkek, bandua batampuak, duduak sahamparan tagak saedaran, manimbang sapanjang adat mangaji sapanjang alua, alah ciek jo duo, duo jo tigo, alah banamo basalasai. Sungguahpun baraso basalasai :

 Pulau Makah tanahnyo aman
 Timbalan rajo banua Ruhum
 Buliah mangkuto sabalah Arab
 Sabab lah warih dek panghulu
 Lah kakal sakarang kini
 Di darek lalu ka lautan
 Itulah rajo alam nangko

Niniak jo mamak duduak bahadapan, sarato saudaro hambo, barapolah juaro baringan tangan, Cerek cangkia lah takarang, hidangan sudah di pabuek, baiyo batido malah Sutan, kapado niniak dengan  mamak, jamba talatak minta di parenai, supayo nak sanang hati sipangkalan, Sutan. Sakian sambah tibo ka hadapan Sutan.

Sialek :
Sampai … Sutan ? (lebih dahulu Sutan pamenan minta maaf kapado ninik mamak, alim ulama, cerdik pandai, serta orang yang patut yang hadir pada jamuan itu)

Ma … Sutan Pamuncak, sambah kumbali ka Sutan, kapado Sutan saurang bakeh hambo mangumbalikan salam jo pasambahan, usah kadibilang ka paatap gala, laikoh tampek samparono sambah kumbali bakeh Sutan ?

Sipangka :
Sambah di Allah, manitahlah Sutan.

Sialek :
Sambah nan hambo tibokan, titah nan hambo antakan, jadi papatah dinan tuo, jadi  undang di nan cadiak, ibarat kito anak mudo :

 Tarantang suto di Kinamat
 Dicalut nak rang Ampang Gadang
 Anjalai badarai-darai
 Badarai ka dalam padi
 Talatak ateh pamatang
 Sunat kato dek baulang
 Pasa jalan dek batampuah
 Kawi kato adat lazim kato syarak
 Buah panitahan Sutan dianjuang tinggi diamba gadang.

Apolah nan jadi buah panitahan Sutan cako :

 Bukan carano nan balariak
 Dilariak papan ado talatak
 Di Padang di Indogir
 Di rumah Juaro Mudo

  Maagak di hari nan kapatang
  Iyo baturuik dek juaro
  Mambawo sirieh nan bacabiak
  Mambawo rokok nan sabatang
  Ka hadapan niniak dengan mamak
  Sarato karib jo kabiah, ipar jo bisan
  Nak mahadiri pakarajaan nangko

Pun baatoh hanyo lai :

  Tinggi karambia nan sabatang
  Pucuak dikanduang awan mego
  Disakah anak bidodari
  Disakah lalu dibawonyo
  Kok nan di hilia alah datang
  Nan di mudiak alah tibo
  Nan dakek datang mananti
  Sakarang alah bahadiri.
 
Adopun di hari nan sahari nangko, kok jauah biaso di jalang, hampia biaso dituruik, janjang alah batingkek bandua alah batapuak, lapiak alah takambang, duduak sahamparan tagak saedaran, rajo sadaulat panghulu saandiko, manimbang sapanjang adat mangaji sapanjang alua, alah ciek jo duo, duo  jo tigo, alah banamo salasai.
Limbak dari pado nan itu , iyo juo bak undang dalam pasambahan.
 
 Pulau Makah tanahnyo aman
 Timbalan rajo banua Ruhum
 Bulieh mangkuto sabalah Arab
 Sabab lah warih dek panghulu
 Lah kakal sakarang ini
 Di darek lalu ka lautan
 Itulah rajo alam nangko

 Niniak jo mamak duduak bahadapan
 Sarato saudaro hambo
 Barapolah juaro baringan tangan
 Cerek cangkia lah takarang
 Hidangan sudah dipabuek
 Baiyo batido malah Sutan
 Kapado niniak dengan mamak
 Jamba talatak mintak diparenai
 Supayo nak sanang hati sipangkalan

Kan baitu bana buah panitahan Sutan ?

Sipangka :
Iyo bana

Sialek :
Yo ma … Sutan

Ambiak cerek nan  barangkai
Dipaluik aka bio-bio
Sahalai putuih ka pangabek
Labiahnyo ambiak ka kulindan

Dipaiyo dipatidokan
Dipaukua dipajangkokan
Disauak aia nan janiah
Dimintak kato nan bana
Kapado baliau nan hadir duduak
Sabalah Sutan manantikan

Laikoh di dalam adat nan bapakai, di dalam cupak nan baisi, nan baitu Sutan ?

Selanjutnya di bawa kata dengan mupakat

Sialek :
Ma .. Sutan Pamuncak, di hari nan cako Sutan saba jo panitahan, hambo marenjeng kato jo mupakat, bakato baliau nan hadir duduak.
Nan jadi buah  barinyo dek baliau bakeh hambo, di hambo maantakan bakeh Sutan sapanjang parmintaan Sutan nan ka tangah, iyo bak undang dalam pasambahan.

Sumber : Sumarak Nagari - Alur, Pasambahan dan Pidato Adat Minangkabau 

 

TrackBack URI for this entry

Comments (0)

Subscribe to this comment's feed