Iyo ko balai kami cako
Tasabuang di ayam biriang nan kulabu
Iyo talalai kami cako
Jalan babelok tampek lalu.

Sarancak nangko lah ladangnyo
jo apolah ka kito tabeh
Barang tatabeh ditabehkan
Baranglah jalo dijalokan
Kanailah anak tali-tali.

Sarancak nangko lah datangnyo
Jo apolah ka hambo baleh
Barang tabaleh dibalehkan
Barang nan ado diadokan
Kok indak kama ka pai

Badaga batang sitindiah
Sicuko di dalam padi
Tadanga Sutan manyiriah
alang sukonyo hati kami

Ayam hitam pandai baranang
Kaki nan dapek dek buayo
Duduaklah niniak dinan tanang
Nan tagak hambo mambaleh pidato

Anak rang di Simpang Gaduik
Singgah ka pakan mambali rokok
Nak lalu ka Koto Tuo
Hati lah ganta-ganta takuik
Darah di dado badabok-dabok
Niniak mamak manyuruah juo.

Pun baato hanyo lai :

Janjorak bungo janjanri
Kambanglah bungo parautan
Siriah galak pinang manari
Anak rajo di kampuang Sutan.

Siriah si Alai  nak rang Kamang, siriahnyo udang tampak hari, tampuak nan bagai kuku balam, buahnyo intan jo padi, bungonyo jarang basuo, buahnyo elok ka tiruan, batangnyo elok ka tinaman, gagang mangguluang di rumpunnyo harimau mangaum di ureknyo, labah badayun di daunnyo.
Daunnyo intan jo padi, bapantang masiak dek paneh, bajamua ka biliak dalam, satahun dalam pangguluangan, usah ka letak letai tido, usah ka layua batambah hiduik, tampuaknyo baitu juo, ruponyo batambah mudo, iyo baitu rang disiko.
Lorong pulo pado pinangnyo, pinang dasun dibalah duo, pinang nan di kida rumah, tingginyo jambo-jamboan, satahun tupai mamanjek, salodang hanyo nan jatuah, garagak ka banda Cino, pinang tuo ka Banua Ruhum, siriah basusun pinang batani, talatak dalam carano.
Carano manyarano Reno Ali, kaduik ameh kadam aso-aso, kadam baturap Koto Tangah, rampuak bak bungo kacubuang, rimbun bak bungo Kalikih, gagun bak gagak ka hinggok, congkak bak tiuang ka tabang, lantiak bak alang bamian, iyo bak nantun bana susun siriah rang disiko.
Lorong pulo pado gambienyo, gambianyo haluih caro Sikayang, dihabuih dengan pucuaknyo, pucuaknyo merah bukan alang-alang, gadang sangsaro ditangguangnyo, baapik bakompo pulo, elok dimakan tangah malam, gagang dikunyah sadang pahik, sapahnyo jatuah ka dalam siram, tingga di bibia hanyo merahnyo, iyo bak nantun gambia rang disiko.
Lorong pulo pado sadahnyo, sadahnyo haluih bagai ambun, satahun dipanggang Bugih, samusim dibaka Cino, bakipeh jo ambai-ambai, babasahi jo ayia bungo, baturap jo pati santan, dipalik jo  ujuang jari, bakisa ka jari manih, sakadan sakati limo, diharagoi, antah satimbang jo lautan, iyo bak nantun sadah rang di siko.
Lorong pulo pado santonyo, santonyo halui bagai ambun, ditanam di tanah Ruhum, pakiriman Sutan dari Batam, capuaknyo panau bidodari, di sayik si Santi Alam, nan mahampai si Santi Kayo, saheto panjang jelainyo, bajamua ka tangah padang, lambok bak ambun tangah malam, isokkan anak rajo-rajo, isokkan Sutan jo Bagindo, sajangka dilolak api, usah kaluak lambang lai tido, asok mandulang ka udaro, diharagoi tidak taharagoi, antah satimbang jo nagari, iyo bak nantun santo rang di siko.

Rak kato rembang lah kato
Larak kato dipandangi
Elok kato dimpani

Apolah ka panyimpani :

Rang Padang mahanyi banang
Dihanyi mako dilipek
Dilipek lalu dipatigo
Indak pandai marantang panjang
Elok dikumpa naknyo singkek
Ambiak sakiro ka paguno.

Sumber : Sumarak Nagari - Alur, Pasambahan dan Pidato Adat Minangkabau

TrackBack URI for this entry

Comments (0)

Subscribe to this comment's feed