Kaik bakaik rotan sago, takaik diaka baha
Sampai kalangik tabarito, tibo dibumi jadi kaba.

nan kamanjadi barito dan kaba dalam pasambahan sakali nangko adolah nan tasangkuik jo kakobeh marantau urang awak. alah  tabarito sampai kalangik dan manjadi kaba dimuko bumi, bahaso urang Minang tu parantau. Labieh-labieh dek anak nan mudo-mudo, jarang nan bamukasuik nak tatap manjadi urang tani atau bausaho dikampuang.

Kalau nak barubah nasib, pailah marantau kanagari urang. Tujuan dari marantau itu ado duo, yaitu mancari pitih dan manuntuik ilmu.

Karantau madang dihulu, babuah babungo balun. Marantau bujang dahulu dirumah paguno balun. Nan dimukasuik jo “dirumah paguno balun” adolah alun amuah urang maambiaknyo sabagai manantu, sabab alun ado bapancarian. Jadi anak-anak mudo nan alun paguno tu, pai marantau dulu. Kalau nanti inyo alah kayo dirantau urang, pulang  sakali-sakali, mako banyaklah urang mamparabuik-an untuak di ambiak jadi manantu. Pai marantau itu kabanyakan hanyo bamodalkan “tekad” sajo. Kadang-kadang pitih untuak mambali tiket kapa sajo indak ado. Inyo manyalingkik naik kapa ditangah urang rami manyamar sabagai tukang angkek. Kasudahannyo sampai juo di Jakarta. Sia nan kadituju di Jakarta, dima tampek mandapek, indak jaleh. Pokoknyo pai marantau, baa beko satibo dirantau urang, dicari pulo aka.

Wakatu kapa barangkek dari palabuhan Taluak Bayua, iyo taibo juo hati, kadang-kadang sampai manangih, aia mato jatuah badarai. Mako kalualah dari muluiknyo ciloteh urang Minang : “Di Taluak Bayua den tamanuang, den lapeh pandang bakuliliang. Tabayang rantau nan nan kadihadang, dimakoh badan beko manompang”.

Ciloteh itu mambayangkan ba-a bana kareh ati urang Minang pai marantau. Indak tantu tampaik nan kadituju, antah dima badan kalalok sampai di Jakarta, baa mancari iduik  dinagari urang. Itu kasado alah-e, nanti pulo dipikiekan, baa nan takadie-lah, pokoknyo pai marantau dan aka indak ilang.

Biasonyo diateh kapa sajo akanyo alah mulai jalan. Dicaliek-caliek diateh kapa tu kaluarga nan ado baurang gaek, ditolonginyo urang gaek tu maambiek makanan, maambiek aie, pai katoilet dan banyak jaso baiak nan dikarajokannyo. Salamo 2 hari 3 malam diateh kapa, cukuik wakatu untuak mayakinkan  kaluarga urang gaek itu bahaso inyo adolah urang baiak-baiak, patuah, rajin karajo, jadi diateh kapa sajo alah dapek diinyo induak samang, untuak tampek manompang nanti Jakarta. Padoman hiduiknyo adolah petuah atau nasehat urang gaek-gaek sabalun inyo barangkek.

Kalau jadi anak kapulau, hiyu bali, balanak bali, ikan panjang bali dahulu.
Kalau jadi anak marantau, ibu cari dunsanak cari, induak samang cari dahulu.

Sajarah manunjuakkan nan bahaso urang Minang itu pado umumnyo berhasil dirantau urang, pandai manyasuaikan diri, dan akhirnyo manatap dinagari urang.

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!