nan tujuan dari pasambahan satu halamanko, yaitu untuak maimbau paratian dunsanak nan mambaco, agak sabanta mangana kampuang halaman. Walaupun banyak diantaro awak nan lah hanyuik dirantau urang, namun nan namonyo kampuang halaman tu indak hilang didalam hati, kalau indak sampai mangirim wesel pulang, sakurang-kurangnyo mangana dalam hati.

Nagari awak tu bagunuang-gunuang, babukik, balambah (lurah), jarang nan data, jalannyo bakelok-kelok, pamandangan sabana rancak.

Disatiok lambah tu biasonyo mangalia sungai (caro awaknyo nan labieh tapek “batang aie”). Disuok kida (kiri, kanan) batang aie tu tabantang  sawah, lalu ado kampuang. Nan manonjol nampak dikampuang nantu adolah rumah adaik jo musajik.

Urang kampuang pai mandi kabatang aie, ditapi batang aie tu ado “tapian tampek mandi”. Kalau kiniko indak bak mandi sajo nan ado dalam biliek doh, jambanpun ado dalam biliek. Tapian tampek mandi tu sangaik bakasan dek urang Minang, kalau inyo kapai marantau, kato salamaik tingganyo adolah :

 “Tinggalah kampuang tingga halaman, tingga tapian tampek mandi”.

Tapian tampek mandi tu memang basajarah bagi kabanyakan urang awak, sulik dilupokan. Bagi dunsanak nan alah gaek-gaek kini, nan alah panah mangalami mandi di tapian tampek mandi, tantu indak kalupo baa awak baparangan-parangan air, mandi bakacimpuang dilubuak, basamo-samo, manggosok gigi jo daun banto, manggosok badan jo batu apuang, pokoknyo kasadonyo alamiah.

Mandi pakai kain basahan, nan laki-laki kain basahannyo dari pusek sampai lutuik, kalau nan padusi kain basahannyo dari katiak sampai katumik. Kalau urang kini mandi batalanjang bulekse dalam kamar mandi.

Nan paliang pantiang adolah acok urang bakanaian hati (jatuah cinto) dimulai dari tapian mandi. Dek karano acok “tampak-tampak saketek” kasudahannyo jatuah hati. Kalau batapuak lai indak sabalah tangan, kasudahannyo sampai kawin. Jadi memang romantis sakali tapian tampek mandi tu.

Nan bedo bana, buang aie gadang ditampek mandi itu juo, bacari tampek nan tasambunyi dibaliek batu gadang, lalu balapeh sajo disinan. Tapi indak jadi masalah, kotoran nan dikaluakan itu , indak akan sampai katapian mandi urang kampuang nan disabalah hilie. Sabab kotoran itu segera disantap oleh ikan, nan pado zaman dulu banyak tadapek disungai. Ado ikan garieng, ikan panjang, puyu, situkah, tali-tali, udang dan lain-lain. Kalau kini, sajak urang manyemprot tanaman jo racun serangga, ikan-ikan disungai alah abih mati, sabab aia alah panuah dek racun. Pantau, baluik disawahpun alah banyak nan mati, itulah akibat dari pado kamjuan tehnologi.

Komentar

1. Lagu (Tapian puti) Ditulis oleh satnova pada Selasa, 22 November 2005 Sejarah singkat,  Didaerah lubuk alung ado namo nagari sikabu,daerahnyo dakek bukik barisan,nah disinan ado tampek mandi nan rancak bakeh tampek mandi puti zaman dahulunyo.  Lagunyo:  Tapian puti aianyo janiah  Tampek mandi anak mudo-mudo  oii adiak kok nan jolong gadang  mari kito katapian puti.....  Tapian puti aia nyo janiah tampek mandi anak mudo.  oii adaiak kok nan jolong gadang mari kito mandi bakacimpuang.  trimo kasih .  satnova piliang

2. Tapian Puti Ditulis oleh cien pada Kamis, 24 November 2005 Apokah daerah ko dakek jo Lubuak Bunta ? Dulu sakitar thn 70 an ado tampek mandi juo di sinan (Lubuak Bunta)

3. tapian Ditulis oleh dahen pada Senin, 02 April 2007 Iyo maingekkan ambo pulang ka kampuang,kalau ambo pulang ka kampuang(pasaman barat),ambo pasti mandi di batang aie,tapi kini dek lah banyak pabrik sawit,batang aie di pasaman indak sajaniah wakatu daulu katiko ambo masih ketek

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!