|
Niniak mamak basa batuah, pangulu alam Minangkabau, cadiek pandai suluah bendang dalam nagari, alim ulamo  jo tuanku, nan tahu jo halal dan haram, urang mudo pamenan kampuang, bundo kanduang samo didalam. Pokoknyo sado dunsanak nan balingka duduak; pasambahan tibo didunsanak !
a-lah nan ka manjadi buah sambah sakali nangko, sasuai jo nan tasurek dikapalo jamba diateh adolah : “binguang tagie, cadiek bajua-a”, yaitu suatu kakobeh atau tabi’aik nan jadi pakaian sahari-hari disabagian kalangan masyarakat samaso kini.
Kali jawa dipulau rimbang
Anak ruso mati badabiah
Kalau gawa mintak ditimbang
Kok salah ampun nan labiah
Dimusim samusim nangko, dimaso tahun bak kini, ulah dek sorak rang manggaleh, lamak rayuan tukang gaduah, cabualah balai dibueknyo. Modernisasi kato rang kini, gengsi kalau indak dituruikkan, takuik dianggap katinggalan jaman. Sado nan lamo manjadi kuno, malu kalau dipakai juo. Padohal kalau dihinok aniengkan, kalau dipikie dalam-dalam nan dikatokan kamajuan dek urang kini, sabananyo adolah satu kamunduran. Makin modern urang kini, makin jauah dari sipaik manusiawi, makin dakek kapado sipaik hewaniah.
Kalau dibilang diuraikan, dietong sandi nan lah tingga, panjanglah kato kadisabuik, elok dikumpa nak nyo singkek, diambiek sajo duo buah contoh barikuik :
Partamo, Dimaso zaman dahulu, kutiko kabudayaan awak masih tinggi, alun masuak pangaruah asiang, kalau ado bagian badan nan masih tagolong aurat padusi bapatampak-an ditangah jalan, bapatontonkan kaurang banyak, tandonyo “urang indak sandereh”.
Mungkin urang tu alah sintieng batuka aka, atau urang misikin, nan bajunyo alah cabiek-cabiek, indak ado pitih pambali baju nan bisa manutuik aurat. Kalau kiniko iyolah tabaliek bana dunia, makin banyak aurat nan indak tasaok, makin santiang, makin tagie mamakainyo dan samakin tagie urang mancaliak. Baju disangajo senteng kateh dan sarawa senteng kabawah, nan ditangah bapadia se. Ado pulo sarawa baru sangajo dilubangi satantang lutuik, laki-laki padusi samo sajo. Pado hal sado alah-e urang tahu bahaso makin banyak badan nan tak batutuik, makin dakek awak ka binatang.
Nan kaduo : Panghinaan nan paliang mamalukan dan paliang marandahkan dijaman saisuak adolah “disonggengi padusi”. Kalau kiniko makin banyak padusi nan manyonggengi urang dan makin banyak urang nan suko disonggengi padusi. Tuo mudo tagie bana mancaliek acara itu ditelevisi. Jadi lai batambah maju awak namonyo atau malah batambah mundua dibandiang jo jaman dulu. Tapek kalau dikatokan urang kini “binguang tagie, cadiek bajua”. Tobaiklah lai, salagi angok masih ado !!! |
1. pa taba se iman tu
Ditulis oleh chacha pada Rabu, 30 November 2005
batua itu pak sutan sati...bantuaknya urang tuo kita talalu mangakeh mancari pitih , sahinggo anak-anak jadi lupo parhatian...
saran ambo.. pa banyaklah anak-anak kito ka surau jaan pa lapeh se anak-anak dari perhatian kito.. urang tuonya..
baitu juo urang tuonya.. jaan talalu mangakeh bana cari pitih... ingetlah hiduik nan ka mati... | 2. Action nyo nan paralu
Ditulis oleh Abak pada Sabtu, 09 September 2006
Untuak awak nan manyadari hal nan disampaikan di ateh atau pun artikel lain nan sarupo, kalau dek ambo kesimpulannyo ,labiah banyak mangamukokan permasalahan sosial nan timbua akibaik dari kemajuan zaman. Kini tugas kapda angku-angku nan cadiak pandai untak mancari jalan kaluanyo. Ambo berharap ado penulis lain nan akan meagaihkan solusinyo.
Jaan talalu baraok ka pemerintah sajo, sabab pangalaman ambo pribadi, untuak mandukuang putra daerah untuak maju di tingkek nasional, cuma bisa mandapek kekecewaan. Caliak riau... masuak di audisi API berkat dukungan pemda , maju di audisi DAI juga 100% dukungan pemda. tapi pemda awak.....itu adolah hal hal positive
maliek kenyataan iko, ndak disesali kalau urang awak nan cadiak pai maninggakan kampuang nan tabangkalai.. |
Hanya pengguna yang terdaftar yang boleh menulis komentar.
Silahkan login atau daftar. Powered by AkoComment 2.0! |
