|
Kato Pusako (26) Manggunokan Wakatu |
|
|
|
|
Written by A.B. Dt. Majo Indo
|
|
Thursday, 22 December 2005 |
|
Hari sahari dipatigo
Malam samalam diparampek
 nan barisuak bukan kini
Nan kini bukan kapatang
Hari sahari dipatigo
Sapatigo untuak usaho
Sapatigo untuak makan
Sapatigo untuak baibadaik
Malam samalam dibagi ampek
Sabagian untuak makan
Sabagian untuak baibadaik
Sabagian untuak bapikie
Sabagian untuak tidue
Â
Manilantang lalok mambilang kasau
Manungkuik lalok maetoang lantai
Mahereang lalok maetoang dindiang
Duduk marauik ranjau
Tagak maninjau jarah
Sakali mambuka puro
Dua tigo utang lansai
Sakali mandayuang biduak
Dua tigo pulau talampau
Dek rajin pandai nan datang
Dek malu buruak nan tumbuah
Hari pagi mananti patang
Dikana diri sarato tubuah
Kacang paringek di dalam parak
Dikarek pandan jo durinyo
Awa dikana akie tidak
Alamaik badan kasangsaro
Labiahkan jago dari lalok
Labiahkan rajin dari maleh
Labiahkan lapa dari kanyang
Labiahkan rusuah pado suko
Labiahkan hino dari mulie
Labiahkan saba dari berang
Balabiah kanyang hilang aka
Balabiah lalok hilang pangana
Balabiah maleh datang hino
Balabiah berang hilang mulie
Balabiah sidiak hilang midiak
Balabiah suko hilang budiman
Malang cilako rajo ganggang
Tuak tabali tunjang hilang
Hari pagi dibuang-buang
Hari patang dikaja-kaja
Gigi tangga rawan murah
Awak tuo gadihlah musim
Ditakan paruik dikampihkan
Hiduik baparuntuangan
Mati di tangan Tuhan
Hiduik dikanduang adaik
Mati dikanduang tanah
Sumber : buku Kato Pusako oleh AB Dt. Majo Indo
Trackback(0)
 |
|
Last Updated ( Saturday, 24 December 2005 )
|
TrackBack URI for this entry
Subscribe to this comment's feed
