Home
Daftar Anggota
Galleri
Resep
Restoran Minang
Games
Download
Kamus Minang
Chat
Bursa Iklan
Radio Online
Weblink
SPTT Cimbuak
Cimbuak Toolbar
Menu Situs
Berita
Artikel
Prosa
Tokoh Minang
Adat Budaya
Agama
Kolom Khusus
Pariwisata
Berita Keluarga
Giring2 Perak
Berita Yayasan
Pituah

Nan babarih nan dipahek
Nan baukua nan di kabuang
Jalan luruih nan ditampuah
Labuah Pasa nan dituruik
Milis Minang
Rantaunet
Surau
Aktivis Minang
Media Padang
PosMetro Padang
Advertisement
Pantun pidato/Pasambahan : Pantun Siriah PDF Print E-mail
Written by R. St. Tandiko dan M.I. St. Rajo Batuah   
Sunday, 29 January 2006

Sipangka :
Rajo Amat Pandeka Kaliang
Rakanan si Rajo Nando
Balahan sutan di Makasar
Sahabat sutan dari Deli

Alamat siriah ka baguntiang
Hambo maantakan carano tibo
Lai barisi nan taanta
Nak mintak Sutan parenai

 

Sialek :
Buruang nan sikua dalam parak
Sayok bacampua jo kulabu
Taradok ka rusuak rumah

Siriah jo pinang balun tampak
Carano baapo kakao, Sutan
Sadah jo gambia balun tantu
Baapo jano kami ka mangunyah, Sutan

Sipangka :
Tabanglah buruang ka parateh
Dipikek rajo dari hulu
pamenan puti di Sipinang
Sahabat sutan dari Deli

Carano kami nan ka ateh
Bukakan malah dahulu
Lai barisi sadah jo pisang
Nak mintak Sutan parenai

Sialek :
Talayang kapa dari Aceh
Batingkap bamega-mega
Ukie baturap jo dulamak
Itulah kapa Rajo Deli

Carano Sutan nan ka ateh
Bialah talatak sajo
Di hadapan niniak dengan mamak
Baiko kami parenai, Sutan

Sipangka :
Sambilan buruang dalam naneh
Manolah buruang si gereja
Saikua buruang putieh kapalo
Puti malihek balun tampak
Carano kami nan ka ateh
Bukakkan malah dahulu
Nak tampak dek niniak dengan mamak

Sialek :
Batiup angin dari tenggara
Sadang si Lela main silek
Main dansa batapuak tangan
Puti malihek jatuah pinsan

Carano taanta dek sipangka
Batutuik lagi ba pangabek
Bialah talatak sajo
Untuak pamenan hati jo mato
alah kasanang hati Sutan

Sipangka :
Landailah karambia tuan
Dalimo rangkah buahnyo
Pipialah gambia dek Sutan
Lah lambok dalam carano

Sialek :
Lah hilia kureta Solok
Manuruik darisi banyak
Tibo sakali di jambatan
Jikok carano kami singkok
urang balimo badunsanak
Alahkoh hasia sadonyo, Sutan ?

Sipangka :
Ramilah pasa kampuang Cino
Di simpang jalan ka Panganak
Tampak urang manjua pisau
Pisau dibali Rajo Cino

Kok itu dek Sutan nan jadi buah tanyo
Urang balimo badunsanak
Siapokah tak namuah pai
Jikok takurang jo timbakau
Timbakau kan lai Sutan bawo.

Sialek :
Anak rang Koto Tiagan
Nak lalu ka Koto Tuo
Dialieh pulo partanyaan
Di mano asalnyo  siriah nangko, Sutan ?

Sipangka :
Taganang ayie di kubangan
Hanyuik cikarau mudo-mudo
Sutan mamintak katarangan
Karakok asa mulonyo

Sialek :
Bidodari mamasang kudo
Mahadok ka panurunan
Urang banyak akan mamandangi
biopari Sutan Juaro
Dialieh pulo partanyaan
Barapo halai siriah sagagang, Sutan ?

Sipangka :
Takilek kapa di lautan
Lah hilia ka mudiak Padang
Rajo mamandang dari balai
Mambawo barang nan gaib
Tagak bandera nak baparang

Jikok itu Sutan tanyokan
Ko pandai Sutan mambilang
Bilang bintang ateh langik
Paparkan kasiak di pantai
Sakitu siriah sagagang, Sutan

Sialek :
Ramilah pasa Ateh Akal
Tampek urang bajua bali pinggan
Rami manjalang pukua tigo
Sutan tabilang lanjuik akal
Dialiah pulo partanyaan
Di mano asa pinang mudo, Sutan ?

Sipangka :
Padang Sarai ikannyo banyak
Ikan  nan datang di muaro
arai batungkuih jo kalupak
Di sinan asa pinang mudo, Sutan

Sialek :
Tampaklah kapa di lautan
Nakhodoh tagak di muaro
Dialiah pulo partanyaan
Apokoh tandonyo pinang mudo, Sutan ?

Sipangka :
Badantam badia dari bukik
Mandarum sampai ka muaro
Badaga lalu ka lautan
Harum manih ruponyo kulik
Itu tandonyo pinang mudo
alun kasanang hati Sutan

Sialek :
Tarantang kawek dari pasa
Di kida jalan ka Sapiran
Masuak ka gaduang  sikatari
Sutan tabilang lauik akal
Dialieh pulo partanyaan
Di mano asa sadah pensi, Sutan ?

Sipangka :
Ramilah pasa Bukit Tinggi
Tiok jorong bajanjang batu
Taruih sakali masuak pakan
Kononlah asa sadah pensi
Di danau di lauik Sumpu
Di sinan asa sadah pensi
Alah kasanang hati Sutan

Sialek :
Maningkok lalu manampan
Sianjuang di ujuang rumah
Batingkap bamego-mego
Kok siriah nan kami kunyah
Kok pinang nan kami gatok
Di mano asa gambia nangko, Sutan ?

Sipangka :
Tampaklah kapa di lautan
Takambang lahia tiang tujuah
Lakeklah kunci tujuah pasak
Nakhodoh tagak di muaro

Jikok itu Sutan tanyokan
Di dalam Luhak Limo Puluah
ado nagari Sarilamak
Di sinanlah asa gambia nangko.

Sialek :
Rang darek mamancang kabun
Tumbuah di kida rumah Japan
Bungo nan tidak kambang lai
Tampak nan dari Balai Tangah
Jaleh nan dari Koto Tuo

Bakabek lagi basusun
Batutuik dalam carano
Taanta ka tangah-tangah
Ka hadapan niniak jo mamak
Apo bana kasalahannyo, Sutan ?

Sipangka :
Rang darek mamancang kabun
Tumbuah di hadapan rumah Japan
Bungo nan tidak kambang lai
Tampak nan dari Koto Tuo

Di simpang jalan ka Mandahiliang
Tibo sakali di muaro
Bakabek iyo basusun
Batutuik dalam carano
Taanta ka tangah rapek
Ka hadapan niniak jo mamak

Gadang bana kasalahannyo
Pinang mudo dapek cilako
Tampuak tangga badan babalah
Sabab dek siriah nangko juo, Sutan

Sialek :
Kudo anak urang di Kuran-kuran
Tolong dek Sutan manyasokkan
Manangih sadah di kapuran
Tolong dek Sutan mantokkan

Sipangka :
pitih sapitih dalam peti
Diambiak pambali pasak
Labiahnyo pambali paku
Iyolah ranyah sadah pensi
Awak di hadapan niniak jo mamak
Baapo saranyah nangko bana
Suruah ka lauik lah dahulu

Sialek :
Kok siriah ka kami cabiak
Kami manaruah kakurangan
Pinjami baapo kami pisau
Untuak pambalah pinang mudo

Sipangka :
Anak itiak sikumbang itiak
Kaduo sikumbang hijau
Makanlah pinang bagigik
Indak dapek manyalang pisau

Sialek :
Anak rang di Sawah Tangah
Nak lalu  ka Kurai Taji
Kok siriah kan kami kunyah
Cakua di mano paharumi, Sutan

Sipangka :
aia tirih kualo Padang
Labuahan biduak urang ka haji
Habih manih sapah dibuah
Apo gunonyo cakua lai

Sialek :
Biduak ameh sampannyo ameh
Urang sampomo kaduonyo
Siriah habih pinang lah kameh
Carano baapo kakaonyo, Sutan

Sipangka :
Si Upiak Sidayang Ameh
Anak rang darek lauik Cino
Siriah habih pinang lah kameh
Carano babaliak pado nan punyo.

Sumber : Sumarak Nagari : Alur Pasambahan dan Pidato Adat Minangkabau
Disadur Oleh : Erwin Moechtar  

Trackback(0)
Comments (2)add comment

Adventurer said:

kok lai bisa dijalehkan pasambahan tu di pakai dek daerah mano diminag kabau, sabab kan lah tasabuk walaupun kito samo rang minang tetap ado ado perbedaanbak pepatah, lain lubuak lain ikannyo lain padang lain belalangnyo

rarimo kasih
 
report abuse
vote down
vote up
July 12, 2007
Votes: +1

vival_m2 said:

lain lubuak lain ikan nyo
lain padang lain balalangny
lain cupak
lainlo pamakaiannyo
lkok di piaman
tantu balain pulo
 
report abuse
vote down
vote up
July 12, 2007
Votes: +2

Write comment
You must be logged in to a comment. Please register if you do not have an account yet.

busy
Last Updated ( Sunday, 29 January 2006 )
 
< Prev




Member Area
Yayasan Palanta Cimbuak
Yayasan Palanta Cimbuak
Dari Awak, Oleh Awak, Untuak Kampuang
Nio berpartisipasi? Silakan klik disiko
Cimbuak Features

Cimbuak Chat


Cimbuak Chat


Free Email


Free Email
Yayasan Cimbuak
Situs Terbaik
Online Sekarang
We have 11 guests and 3 members online
Generated in 1.09201 Seconds