Pantun-pantun Batagua

(menegur sapa calon mempelai pria yang baru datang)

Pantun-pantun ini biasanya diucapkan oleh perempuan tua yang menyambut kedatangan calon pengantin pria ditangga sebelum naik ke atas rumah calon pengantin wanita untuk melangsungkan acara akad nikah. Diucapkan sambil menaburkan beras kuning.

Assalamu'alaikum
Kami manyapo marapulai tibo

Bismillah mulo disabuik 
Alhamdulillah mairiangi
jo bareh kuniang kami manyambuik 
Tandonyo sajuak di dalam hati

Sarancak iko malah ladang
Lalang sahalai tak basuo
Sarancak iko urang nan datang
Gamang lah kami nak manyapo

cubadak di tangah laman 
Dijuluak jo ampu kaki
Usah lamo tagak di laman 
Iko cibuak basuahlah kaki

Urang Matua manjua lapiak
Badagang inyo ka Ampek Angkek
Kok mandua mintak ditampiak
Kok janjang iyo mintak ditingkek

Pantun-pantun Menyambut Anak Daro - Marapulai
(Diucapkan sebagai komentar oleh pembawa acara pada waktu pengantin dan rombongannya disambut dengan tari galombang sepihak dan tari pasambahan sirih di halaman rumah, maupun untuk acara resepsi di gedung)

Langkah banamo si ganjua lalai
Bia bainsuik katibo juo
Lamo dinanti kinilah sampai 
Tibo marapulai jo anak daro

Disonsong tari jo galombang
Sarato siriah dalam carano
Baitu adaik di ranah minang 
Sampai kini baitu juo

Tantang marapulai jo anak daro
Konon disabuik rajo sahari 
Karano itu marilak kito 
Samo manyambuik tagak badiri

Kilek baliuang alah ka kaki 
Kilek camin alah ka muko 
Alah tabayang sanangnyo hati
Alah tasembai sajuaknyo raso

Putiah kapeh dapek diliek 
Putiah hati bakaadaan 
Di lahia galombang nan basilek
Di bathin tagak kasabaran

Sungguahpun balam nan mangirai 
Barabah ilang dalam samak 
Sungguahpun salam ka marapulai 
Sambah tahunjam ka urang banyak

limpapeh rumah nan gadang
Malangkah si ganjua lalai 
Pado pai suruik nan labiah 
Samuik tapijak indak mati
Alu tataruang patah tigo
Ditatiang carano basiriah pinang
Niaik manyonsong marapulai 
Kandak balaku di nan buliah
Nan samo sanang di dalam hati
Nan samo sajuak di kiro-kiro

Janjurak bungo janjuri
Di lingkuang pulo bungo malati
Siriah galak pinang manari 
Baitu bana sanangnyo hati

Siriah taaunjuak di carano 
Sacabiak iyo mintak dikunyah 
Pinang sagatok mintak dimakan
Dalam mukasuik nan dicinto 
manih nan lakek diujuang lidah
Paik nan luluih karangkuangan

Sarantang jalan ka anjalai 
Urang bajalan malam hari
Tibo di lauik diranangi 
Satantang nak daro jo marapulai 
saroman bulan jo matohari 
Lah samo tarang manarangi

Baranang ranang urang mamukek 
Sanang mamapeh di lautan
Ikan tapanciang ciek jo duo
Sasanang sanang urang maliek
Sananglah mandeh marasokan
Anak surang kinilah baduo

Jikoknyo buliah pintak jo pinto 
Iyo juo bak bunyi pantun :

Jikok dapek kain baragi
Usahlah urang manyasahkan 
Jikok dapek kawin sakali
Hanyo tambilang mamisahkan

Mudiak buayo bapasangan
Mudiak nan lalu ka Singkarak
Nan bak kasau jo bubuangan 
Putiah pangarang baru rarak

Pantun untuk acara Babako-babaki
Diucapkan oleh perempuan juru bicara keluarga bako sebelum menyerahkan barang-barang pembawaan mereka.

Assalamu'alaikum Wr.Wb

Sairiang balam jo barabah 
Barabah juo tabang di muko
Sairiang salam nan jo sambah
Sambah kapado kaluarga anak pusako

Malatuih badia si tengga
Bunyi manggaga ka udaro 
Takajuik kami mandanga
Anak pusako ka barumah tanggo

Si kaduik manjua lamang
Lamang dijua ka Muko-muko
Takajuik bacampua sanang
Sanang bacampua jo ati suko

Tandonyo hati nan suko 
Lah datang kami basamo-samo
Di lurah urang lah mandaki 
Di bukik urang lah manurun
Nan patah datang batungkek 
Nan buto datang batuntun

Datang bukan sumbarang datang
Datang baradaik kato urang 
Ditapiak bandua ditingkek janjang
Langkok jo siriah sarato pinang

Tumbuah di sarupo kini nangko 
Rupolah samo dalam camin
Sayang nan indak ka babedo 
Kasiah nan indak ka balain

Kok ringan kami sato manjinjiang
Kok barek kami sato mamikua
Indak kayu janjang dikapiang
Indak kapeh dibosai kasua

Putiah kapeh dapek diliek
Putiah hati bakaadaan
Pambaoan kami mintak dijawek 
Gadang jo ketek dipatenggangkan

Kok satitiak tolong lauikkan
Kok sakapa tolong gunuangkan
Itulah sambah kami sampaikan 
Talabiah takurang mohon maafkan

Wabillahi taufik wal hidayah 
Wassalamu'alaikum Wr. Wb

Sumber : www.minangnet.com

TrackBack URI for this entry

Comments (3)

Subscribe to this comment's feed

ilhamul said:

	Assalamu'alaikum Wr.Wb.. Batanyo cek Pak... Kan lai buliah disalin pantun ko??
	report abuse vote down vote up

March 03, 2006
Votes: +0

IdeDoel said:

	Asaamu'alaikum, ..... Rancak bana isinya bagi kito nan baru kagadang ko... Tapi... ado nan indak dimangarati (mudah2an salah ketik) karano salah tulih bisa salah aratinyo. Yaitu Baik ka 4, barih ka 2, "Kok mandua minta ditampiak".. Apo nan dimasuik "mandua" indak punyo anak, atau salah tulih dari nan dimukasuik adolah "bandua".... Maaf Mamak...
	report abuse vote down vote up

March 10, 2006
Votes: +0

yoki said:

	ko rancak bana ntuak nan ka kawin ko ..
	report abuse vote down vote up

September 21, 2007
Votes: +0