Assalamu'alaykum sanak di palanta
 Jaweklah salam dari kampuang
 Tapakai wakatu agak sabanta
 malapeh rindu nan jo kampuang

 Sajak saparo tahun mahilang
 Nan surekko lah ditulih juo
 dek manenggang hati Dagang
 Ditundo dulu mangirimno

 Sabab baa dek baitu
 galak jo tangih kok batuka
 bukan mambukak aib jo malu
 tapi mancari kato nan bana

 Buruak nak samo kito buang
 elok nak dapek kito bao
 disabuk saketek kisah Dagang
 katiko pulang bahari rayo

 Kanduang pulang barami-rami
 mambaok oto ciek surang
 lapang dado sanangno hati
 tabayang di rantau Dagang lah sanang

 Kami paleba sapanjang jalan
 kami palaweh pintu kaporo
 nak sampai bana oto ka halaman
 bialah "bungo" nak talendo

 Sajak kami mandapek kaba
 kanduang ka pulang jo oto surang
 ayam jo itiak sato ka pasa
 taluano sajo tingga di kandang

 Dek ulah sanangno hati
 barang nan indak kami adokan
 batuka galang jo timah pati
 untuang lai baju panjang langan

 Sapakan lamono bahari rayo
 kami hiduk bak Juragan
 pai ka lapau mambali lado
 jo oto juo kanduang antakan

 Labiah bak raso Batagak Panghulu
 siang jo malam baralek gadang
 lupo jo susah maso lalu
 takalo Dagang ka mahilang

 Babagai-bagai macam acara
 malam amal sambia bagurau
 panjek pinang pangguang gembira
 sampai basaluang dalam lapau

 Dalam acara lelang kue
 salo manyalo batanyo kaba
 bak cando koncek dalam embe
 malompek-lompek pitih kalua

 Baitu juo acara saluang
 bakandak lagu mintak dipantuni
 pitih bak cando ayam ka jaguang
 sabalun abih alun baranti

 Tangangak urang di lapau
 sakadai urang kanduang bayiakan
 kok cando iko sadono urang di rantau
 rayo lah baa tiok bulan

 Dagang di puji di mulyakan
 kecek didanga kasadono
 kok ado dibalakang nan mancibiakan
 itu tak lain dek iri sajo

 Lah sapakan Dagang di rumah
 mandeh baralek tiok ari
 Tamporo rampak labuahlah lanyah
 kami tarimo jo suko hati

 Lah tibo masono ka babaliak
 Cuti abih toko nan tingga
 tasabuk dek Dagang randang itiak
 taragak pulo jo palai bada

 Indak diulang duo kali
 mandeh carikan salero Dagang
 ampiang badadiah jo tangguli
 sampai jo tapai bapuluk lamang

 Apo di tabek lah babangkik
 di parak tunggua lah tingga
 kok lai ka ubek ibaraik sakik
 ka oleh-oleh tibo di jawa

 Lah baliak Dagang ka rantau
 babaliak langang taraso kampuang
 tibo rusuah lah tabik galau
 dicaliak padi lah abih di lumbuang

 Lai bana Dagang baragiah
 pambali maco Dagang sabuk
 usah lai ka pambali siriah
 ka garam sajo indak doh cukuk

 Tapi dek Dagang lai manyabuk
 takalo kabaliak malam sinayan
 ka dituka Cek, Bank batutuk
 dari jawa sajo nanti dikirimkan

 Mandanga janji dari muluk
 lupo jo hutang sabalik pinggang
 isuak ko tibo urang manuntuk
 dilipek duokan bayia hutang

 Tapi apo ka disabuk
 Di Dagang janji bukan doh hutang
 Sajak Palembang ditutuk kabuk
 Jo surek surek takuk malayang

 Tarakhir kaba kami tarimo
 kadai Dagang disita urang
 untuak pambayia carteran oto
 nan Dagang baok wakatu pulang

 Kok bana itu nan tajadi
 lah bakicuah kami kirono
 labiah rancak pulang jo padati
 cukuk jo rumpuk baya sewano

 Kami sangko jambatan panyubarang
 kayu barakuak nan kami titih
 sampai hatino anak Dagang
 kami baumbuak ba patangih

Sakitu sajo nan ambo sampaikan, bukan baniaik ka manyingguang, tapi iyo ka jadi pamikiran jo diinok manuangkan di badan diri ambo surang

Wassalamu'alaykum w.w.

TrackBack URI for this entry

Comments (8)

Subscribe to this comment's feed

ilhamul said:

	Takana kadiri sorang, jan lah sampai sarupo itu..
	report abuse vote down vote up

March 16, 2006
Votes: +0

rancha said:

	ondeh..iyo banyak juo nan tajadi bantuak itu..nan kini ruok tu lah malimbak dari galeh, kok dapek indak awak conto jadi anak dagang bantuak tu yo mak majo basa..tapi ijan sampai laruiuk jo ruok pulo....yo mak. :?
	report abuse vote down vote up

March 17, 2006
Votes: +0

St Rajo Mudo said:

Bana sadonya kecek mamak tu! Sabab sajak era pulang basamo manjadi trend, banyak sanak-sanak awak nan dari rantau bakalakuan macam tu. Lapuak lapak otanya, urang dikampuang dianggapnya bodoh min. Untuak itulah, awak sarankan ka sanak-sanak di rantau cubolah akses cimbuak.net ko. Banyak pangajaran disiko, urang barat (turih) se nan indak paham bana bahaso awak, suko juo 'datang' ka http://www.cimbuak.ne

report abuse vote down vote up

June 02, 2006
Votes: +0

mak manih said:

	Istighfar....Sesungguhnya,barangsiapa menyebutkan keburukan orang lain,maka ia adalah mengumpat.Meskipun apa yang disebutkan itu benar. Firman ALLah Ta'ala, artinya:"Celaka bagi setiap pengumpat lagi pencela." (Al Humazah :1) Bertolong tolongan lah dalam berbuat kebaikan.
	report abuse vote down vote up

June 03, 2006
Votes: +0

Tamu said:

	Kok lai ado bab nan kaduo, itu nan ambo tunggu. Dalam hal iko, sdr Yan Basa, indak Maupek jo mancela , tapi inyo mambagi pangalaman ka awak nan di rantau,Ukua bayang-bayang satinggi badan, itu makasuiknyo sabalun awak pulang kampuang, jaan sampai dek maojan tuah langek nan kalua
	report abuse vote down vote up

June 24, 2006
Votes: +0

inyiak jangkuang said:

kaduo duono batua .....tagantuang ka niaek urang nan ma ojok an a a nan kadi karajo an ... Niaek Mak majo basa pasti ndak ma upek doh . sdgkan Mak manih ma agiah nasiaek agar usah ma upek upek ... ( kalau lah sdg ba rami rami pasti ado sajo upek jo puji ...Puji bara sin ketekno ataupun gadangno pasti untuak Allah swt . sdg kan upek nan pakai tando kurang wak samo samo icia an sin di balakang ... Kan mantuh kiyoh ( kalau jo bahaso unto si Dya = alaisa kadza lik ? ) ......

report abuse vote down vote up

June 25, 2006
Votes: +0

Sutan Bagindo said:

	Salasai ambo mambaco isi nan ado dalam rubrik prosa tentang petatah-patitiah nan jo pantun....rasonyo tambah ilmu ambo tentang adaik budayo kito, terutamo dalam hal bertutur kato dan baso rang awak. Sekali lai, salut dan tarimokasih. Bahkan ambo nio mancubo pula mambiasokan dalam pertemuan-pertemuan ikatan keluarga minang atau kanagarian di Pekanbaru manggunokan petatah-patitiah dan pantun.
	report abuse vote down vote up

July 05, 2006
Votes: +0

Sutan Bagindo said:

	Salasai ambo mambaco isi nan ado dalam rubrik prosa tentang petatah-patitiah nan jo pantun....rasonyo tambah ilmu ambo tentang adaik budayo kito, terutamo dalam hal bertutur kato dan baso rang awak. Sekali lai, salut dan tarimokasih. Bahkan ambo nio mancubo pula mambiasokan dalam pertemuan-pertemuan ikatan keluarga minang atau kanagarian di Pekanbaru manggunokan petatah-patitiah dan pantun.
	report abuse vote down vote up

July 05, 2006
Votes: +0