Kok pandai bamain kaco
 disinan tampak rupo diri
 Kutiko muluk babicaro
 Itulah gambaran hati

 Kok tak pandai mamainkan
 Mungkin tangan nan ka luko
 Hilang bantuak jo roman
 camin tak labiah pacahan kaco

 Itu ungkapan urang bijak
 Patuk dihinok dimanuangkan
 Dari ungkapan bicaro awak
 Disitu hati kanampak-an

 Santano muluk bakato duo
 Nyampang hati bicaro lain
 Muko tak labiah ibaraik kaco
 Disinan urang ka bacamin

 Muluk manih kucindan murah
 Batanam tabu di bibia
 Bak manabang baliak arah
 Kok balain bathin jo lahia

 Sakancang-kancang duto balari
 Kabanaran tibo dahulu
 Bara bana bamuo suci
 Di pandangan mato urang tahu

 Banyak dek kito nan basuo
 Musang babulu ayam
 Angguak bak cando ka iyo
 Di bathin wallau'alam

 Talunjuak luruh kalingkiang bakaik
 Dalam duo tangah tigo
 Maambiak kasampatan di nan sampik
 Manangguak dalam balango

 Santano pandai mambaco bayang
 Alam takambang jadikan guru
 Di nan sampik jalan malenggang
 Di lubang jarum pandai lalu

 Kok tasasak padang ka rimbo
 Tahantak singga ka hilaban
 Indak panik indak marabo
 Jo kapalo dingin disalasaikan

 Kok tagang buek malaua
 Nan kandua disentak lambek
 tangan mancancang bahu mamikua
 Usah ilakkan baban barek

 aia karuah usah pacamin
 Kok ingin mancaliak rupo
 lahia manunjuakkan bathin
 walau bukan kasadono

 Banyak contoh kok di caliak
 Antaro kadondoang jo durian
 Isi jo kulik batuka baliak
 Lah dibukak jaleh kanampak-an

TrackBack URI for this entry

Comments (0)

Subscribe to this comment's feed