Assalamu'alayum w.w,

Niniak Mamak, Cadiak Pandai, Alim Ulama jo Budo Kanduang sarato nan Mudo Pandindiang Dunia, sarapek no, nan ado dalam cimbuak.net nangko sasuai jo papatah nan tuo-tuo :

kato asa kato bamulo
kato kudian nan batapek-i

karano lah diambiak kato jo mupakaik, dibaok bana jo baiyo, lah dapek bulek nan sagolong, picak nan salayang, aratino lah tibo golek dinan data, iyo satangtangan acara Bagurau Samalam Suntuak di Bogor, jadino akan diadokan pado Tanggal 24 Juni 2006 pukua 19.00 WIB sampai pukua 04.00 WIB  tanggal 25 Juni 2006, di Halaman RRI Bogor Jl. Pangrango  No. 34 - Bogor 16151 Telp. 0251-312450.

Acara nangko diniaikkan sebagai palapeh RINDU jo TARAGAK akan kampuang halaman kito dan mambangkik seni Budaya Minangkabau sarato basilaturrahim, karano pado acara nantun, akan ditampilkan :
- Randai,
- Saluang (saluang klasik dan Saluang nan dikolaborasikan jo alat musik lain sarupo Acordion, Organ, Talempong)
- Rabab
- Gamaik
- Pop Minang.

Kalau satantangan ka paisi "kampuang tangah", Insyaallah, akan ado macam-macam masakan, antaro lain :

- Sate
- Katupek
- Rakik Maco
- Katan
- Goreng Pisang
- Lamang Tapai
- Lupi
- Sarobaik (Bandrek J-Mix nan produksi urang awak)
- Sala lauak dan lai sabagaino,

kok indak tibo siriah langkok dalam carano, nyampang indak sampai surek salayang, kapado niniak jo mamak, cadiak pandai jo alim ulama, sarato bundo kanduang, baitu pulo jo nan mudo pandindiang Dunia, mintak ka nan basamo, nak habih cupak jo parbuatan, habih adat jo karilahan, iyo jo barito nangko ambo maimbau jo manjalang untuak mahadiri acara nantun. Sakitu dari ambo, rilah jo maaf kok ado na indak pado tampaikno atau tasabuk di nan bukan.

Wassalamu'alaykum w.w.
Bandaro Labiah

Hanya pengguna yang terdaftar yang boleh menulis komentar.
Silahkan login atau daftar.

Powered by AkoComment 2.0!