|
 Kumpulan Pantun
Kok  garah iyolah alah ba-Escudo
Kok baiyo iyolah baiyo jo batido
Kok salah iyolah salah kami baduo
Kok bana iyo bana awak basamo
Tabaka rumah sarato badan
Samaso Nagari dalam parang
takana ranah jo parasaian
Luko Mandeh indak ilang-ilang
Panjaik pancucuak bulan
Tibo dibulan patah tigo
Di langik cando ka hujan
Tibo di bumi satitiak tido
Rumik manunjuak jalan
Lain dikato lain tasuo
Sakik maramuak badan
Basi binaso nan bacinto
Dari mano titiak palito
Dari baliak telong nan batali
Dari mano asa niniak kito
Dari puncak Gunuang Marapi
Anok-anok kok ka manangih
Indak manangih labiah rancak
Kok mahandok habih-habih
Bia habih sagalo manyasak
Mangango malaweh Ngarai Sianok
Marangkak maleh Jarum Jam Gadang
Marapi Singgalang dihimpok lindok
Patuih malatuih rarau sabana panjang
Bak mano Mandeh indak ka maratok
Basikareh mandareh si urang manang
Mambongka habih tiang sarato atok
Indak putuih-putuih raso nan ilang
Karatau madang di hulu
Babuah babungo balun
Marantau bujang dahulu
Di kampung baguno balun
Minangkabau bapaga gunuang
Puncaknyo malepai awan
Pado hati acok tasingguang
Eloklah kampuang ditinggakan
Dek budi baiak nan manyangkuik
Mangkonyo baso katasambuang
Kok nan tahu jo sakik hiduik
Cubolah jauah dari kampuang
Tiok manjauah tambah mandakek
Mandakek arek si pusako raso
Arok marapuah alah mampaharek
Lakek padek sagalo pinto upayo
Samantang pun ramuak mandalam
Kalua pantang sabana diparago-an
caliak mato urang mancucuak tikam
Di sinan nan mati manjadi diiduik-an
Salo manyalo panik jo tanang
Arok mandapek sarupo urang
Salo manyalo sampik jo lapang
Tiok mandapek ado nan ilang
Alah basibak angin lalu
Lalu mahoyak pincalang
Alah disibak maso lalu
Nan tasibak malu surang
Alam laweh tampek bakampuang
Kampuang usali indak tabuang
Rantau jauah tuahnyo tabayang
Tabayang surang siang jo malam
Bumi dipijak langik dijunjuang
adaik diisi limbago dituang
Dek badunsanak sagalo urang
Sagalo sampik manjadi lapang
Tali batali layang-layang
Dianjuang makonyo tabang
Tali batali kasiah jo sayang
Lahia batin iduik tatompang
Gadang niaiknyo mato aia
Nak basuo lauik gadang
Nan tasuo samparono galia
Satitiak tido tasubarang
Alah sungguah mato kaia
Pamanciang ikan gadang
Tapanciang torpedo andia
Andianyo alang kapalang
Alah balanyah sawah taruko
Taruko kito dilantak surang
Alah badarah taruko cinto
Cinto kito ditembak surang
Basilang kayu ditungku
Manggalagak aia masak
Basulang saraso samalu
Malu dunsanak malu awak
Indak lukah sumbarang lukah
Lukah di pintu tol sabana sero
Indak garah sumbarang garah
Garah Escudo padeh balado
Lapek iyo sabana lapek
Pambuek sabana kamek
Kiek-kiek padeknyo tapek
Dibuek naknyo jan sandek
Mangaji iyo dari alif
Mambaco iyo dari diri
Maetong iyo dari aso
Aso taraso awak basuo
Sahabih kaji jadi arif
Sahabih baco tahu diri
Diri saban diri basuo
Basuo diri nan tiado
Dilahianyo siriah di carano
Di batinnyo putiah hati kito
Bantuaknyo pitih nan paguno
Sabananyo kasiah nan tacinto
manggaleh indak manggaleong
Tando iyo bana awak lai bautak
'lah jaleh iduik tolong manolong
tando iyo bana awak badunsanak
Manggaleh bakarajo bantuaknyo
Mangakeh kareh sapanjang maso
Baitu jaleh urang iduik namonyo
Cameh lamo kabatuka ruponyo
Lapeh ijan iman usali bacahayo
Mandeh bapasan baitu sabananyo
Tabang ka langik
Basisilam ka lauik
Nan tapaguik sakik
Jo nan patuik-patuik
Nan pusako kato
Disubaliaknyo kito
camin taruih muko
Manaruko sarugo
Indak loncek maloncek-loncek
Iko namonyo silek sabana silek
Indak hampek mahampek hampek
Tanyato ado revolusi nan ampek
Kutang awak kutang barendo
Kutang urang kutang baremot
Utang awak iyo utang bausaho
Utang urang iyo antah bacomot
Indak hanyuik puntuang baro
Nan hanyuik wakatu tu bana
Indak disabuik nan labiah gilo
Patuiknyo bagilo ka Nan Bana
(Sumber : Adat Minangkabau)
Trackback(0)
 |
TrackBack URI for this entry
Subscribe to this comment's feed
