Assalamu'alaikum W W

Dunsanak salingka 4 lapau, ketek indak basabuik namo gadang indak baimbau gala. Nak babarito ambo saketek.

nan ka jadi buah barito ka bakeh dunsanak, indak lain daripado alek nan di buek Mak Bandaro Labiah di Bogor ari Sabtu malam akaik tanggal 24 Juni 2006 kapatang. "BAGURAU SAMALAM SUNTUAK".

Sabagai urang Mudo, Salut... Salut. dan Salut ka Mak Bandaro Labiah nan berhasil jo sukses mengadokan acara bagurau nan lalu. Di tangah auih no urang MINANG rantau terhadap suguhan kesenian tradisional, baliau jo dunsanak kito di BOGOR manyiram an aia sajuak sataguak surang ka bakeh kito.

 

Indak paralu barapek mancik jo bamupakaik karo bagai raso no Mak  Bandaro ko untuak ma adoan alek nan di banak ambo tamasuak alek meriah urang Minang di BOGOR. Dari sinan, Mak Bandaro lah mampacaliak an ka  kito baraso urang awak bisa diajak bakarajo samo bukan hanya karajo  basamo-samo.  (Antah lah kok di nan lain)



Saluang, Rabab, sarato Randai dan dak lupo jo ditingkahi dendang lagu  Minang klasik jo modern nan di iriangi orgen sarato talempong.  Pertunjukan kesenian tradisional minang di tanah rantau.  Indak sekadar kesenian, kok salero condong ka nan lamak pun tasadio.  Sate, lamang tapai, bahkan pical rang kapau bagai bisa ditemui di sinan.

Sakali lai, ANGKEK TOPI ambo ka TUAN ZULHENDRIF AVISENA St BANDARO LABIAH

Sampai ambo baranjak pukua 03.00 pagi dari lapangan RRI BOGOR nantun,  masih rami juo urang nan manoton jo mandanga bunyi saluang. Aratino,  masih ingin urang mandangakan tingkah bunyi saluang nan mambuek pangana dakek ka kampuang.

 

Dan mereka datang ka lapangan RRI Bogor tun sajak pukua 18.00 sanjo.  Kok di caliak dan di diperkirakan, rasono sekitar 5000 an urang lai  nan tibo ka acara alek bagurau nantun.
Indak tatampuang urang rami di halaman RRI Bogor nan sabanano sangaik  gadang, mungkin paralu dicarian galanggang nan gadang untuak acara  salanjuik nyo.



Tanpa harus mambuek proposal, mamintak dana kasiko kamari, pun indak  paralu mangadu ka ORGANISASI MINANG nan gadang di PUSEK. Mak Bandaro  sarato dunsanak urang Minang di BOGOR sukses jo acara no. 
Bukak kulik tampak isi, kebersamaan urang awak di BOGOR harus di akui.

Acara nantun memang hanya sekadar HIBURAN, tapi makna no sangaik  dalam. Taragak bakumpua, taragak bagurau, taragak makan lamak, taragak  mandangakan kesenian tradisional Minang. ado sado no.  Bahkan, di acara tu kok ka ingin di manfaatkan untuak sosialiasi  PROGRAM organisasi atau apopun lah isitilah no, sangaik mungkin.
(KAMPANYE BULIAH DAK???)

BIllahi Taufiq wal Hidayah

wassalam W W

Arief Rangkayo Mulia

TrackBack URI for this entry