Alam Roh (3)

Assalamu'alaikum.w.w
      
 .... kito sambuang agak saketek......
 
Socrates mangatokan roh tu jauhar, bukan 'aradl. Makasuiknyo roh tu tagak surang (berdiri sendiri), kalau 'aradl adolah sifat (misalnyo panjang, biru, muda dlsb).

'aradl indak adoh kalau ndak ado jauhar.
.....aah payah bana pulo beko mangaratinyo.....
nan jaleh roh tu tagak surang. Tapi indak dapek diliek jo mato doh dek karano indak basanda ka benda.  Itu sababnyo kalau kito bincangkan Allah ta'ala agak susah, sabab indak panjang, indak pendek, indak kida indak suok, indak muko indak balakang,  nan awal nan akhir...... susah. Sabab kito masih bapikia bahaso Allah swt. tu makhluk sahinggo indak tajangkau dek
aka.
    Nah, Roh itu ciptaan Allah swt.  Sementara pandangan Socrates roh itu ado semejak azali.
Bententangan jo Imam al Gazali nan mengatokan roh itu ciptaan. Memang Socrates alun  islam lai, tapi saketek banyaknyo ado point-point nan batua dari inyo. Roh tu indak tasusun dari benda doh, jasad berubah roh indak, jasad rusak roh indak rusak doh. Roh tu rajo nan mamarintah jasad. Roh tu mulia jasad tu hina. Roh punyo sifat Ketuhanan.... ....Tapi inyo ciptaan Tuhan.
    "Fa idzaa sawaituhu wa nafakhtu fihi min ruh hi, fa nauu lahu saajidiin."
Apabila telah siap kejadiannya dan aku tiupkan roh Ku (roh ciptaan Ku). (Kan ndak nabi Isa sajo nan ditiupkan roh do kan...?, kasado manusia).
      Roh kito bakaik langsuang  jo Allah swt. Roh kito mencintai Allah swt. Kalau roh lah indak mencintai Allah swt. lai, bermakna roh kito alah manyaleweng. Kalau nyo jaek berarti nyo manyaleweng. Roh ko indak hancua, jasad nan hancua. Kalau nyo bagalimang doso, nanti inyo ndak kan dapek tampek nan bahagia do. Kalaunyo beramal ibadat, inyo akan bahagia. Bilo nyo badoso, penyesalan, penderitaan lah nan kamalingkuik-i mereka. Kecek Socrates kalau nyo tanpa doso, inyo akan berada di alam bahagia, alam Ketuhanan. Sabananyo mati ko alun berakhir sagalonyo lai doh. Mati ko transit samantaro nyo ko. Pandapek Socrates ko.... ado saketek sabanyaknyo kebenaran nan takanduang.
      Sabananyo roh tu dicipta oleh Allah swt., yang berarti baru bukan azali.
Tapi hakekat roh itu ndak dapek diketahui dek manusia do, dan jangan dibicarakan.
Di Barat ado paham Spritualism nan mangatokan mereka dapek bahubungan jo roh-roh urang nan alah mati. Iko adolah khurafat gadang, Indak ado roh urang mati tu bisa bahubungan lai doh, nan ado nan nyo buek tu adolah jin. Jin nan menyamar manjadi manusia tu (Jin Karin namonyo, elok-elok, jan diagiah namo anak Karin,..Karina).
      Kito baliak baliak...., roh tu ado dalam jasad salamo manusia tu masih iduik. Bilo lah nyo cabuik dek malaikat, mako tinggalah jasad. Wakatu dicabuik roh tu .......sangaik-sangaik sakiknyo........
Bapisahnyo roh jo jasad tu talalu-lalu sakik. Indak tau awak baa ruponyo doh.
Dikecekkan sakiknyo tacabuik nyao tu sarupo kambiang iduik dikubak kuliknyo.
Dunsanak bayangkanlah... Kambiang iduik dikubak kuliknyo, ndak ka maraung kambiang tu.?......
Baitulah sakiknyo mati ko. Tu sababnyo kito handaknyo selalu bado'a ka Allah swt.
Supayo diringankan katiko sakratul maut tu. Sarupo bunyi ayat,...... "wan naziati gharqaaa..."
        Dan demi malaikat mencabut nyawa orang kafir itu dengan keras.
 Nyo rangguikkan dek malaikat, kok istilah awak nyo, nyo elo jaee an sajo dek malaikat, baralah ka sakiknyo tu.....
                       "wan nasithati nasthaa.."
        Dan demi malaikat mencabut nyawa orang beriman itu dengan lembut.
.....Nan lai lambuik pun sakik juo......
Ingek  katiko Nabi Muhammad saw. katacabuik nyao nyo. Katiko tu Jibril ado didakek nabi. Katiko malaikat Izrail mancabuik nyao Nabi, Jibril indak maliek ka Nabi doh.
Aa kato Nabi pulo,
"Wahai Jibril sampai hati engkau tidak memandang muka aku wahai Jibril".
Jawek jibril,...."yaa rasulullah, tak sampai hati aku melihat wajahmu ketika hendak tercabut  nyawamu yaa Rasulullah".
"Wahai Jibril, sakit mati ini wahai Jibril,....wahai Jibril sakit mati ini wahai Jibril".
 
"Allahumma ainni 'ala ghamaratil maut"
Ya Allah tolonglah aku waktu menghadapi mabuknya mati ini.
 
Inna lil mauti sakharat.
Sesungguhnya mati itu memang ada mabuknya.
 
Itu sababnyo Ummul mu'minin 'Aisyah ra. mangatokan,
  "Memang aku tidak cemburu melihat orang yang senang matinya,     karena rasulullah pun payah matinya".
 
Sakit mati tu, Nabi sampai maambiak aia dalam mangkuak untuak manyapu muko baliau, manandokan sakiknyo mati tu. Sampai Nabi mamohon do'a ka Allah swt.
"Yaa Allah kumpulkan seluruh sakitnya mati ini dari ummatku biar aku tanggung sendiri"
 
Dapek tuan-tuan bayangkan sarupo itu bana sayang Nabi ka awak-awak ko, Bialah nyo tangguang surang sakiknyop mati tu. Tapi do'a ko indak dikabuakan dek Allah swt. do.
Jadi awak ka manangguang sakiknyo mati tu nantik sorang-sorang. Baa rasonyo ndak jaleh.
Dan sayang indak ado urang mati, sudah tu nyo babaliak baliak mancaritokan baa sakiknyo mati tu.
Kok adolah nan sarupo itu, mungkin musajik-musajik panuah, indak cukuik satingkek, 25 tingkek pun ndak cukuik musajik doh. Saratuih tingkekpun alun cukuik lai. Kok ado nan baliak baliak dari mati tu.
 
.......  lah panjang pulo....barisuak kito sambuang....
 
Wabillahil hidayah wat taufiq
 
Wassalamu'laikum warahmatullah
 
Khairi Yusuf, St. Sinaro