|
 Hari senin atau sinayan kecek rang kampuang awak,  ambo bacarito/baciloteh jo bahaso ibu awak, lah litak surang se ambo bagaya anak gaul Jakarta tu..nan logatnyo kalau ambo lafazkan patah lidah ambo nan masih padeehhh alias asli minang tulen indak ado bocetnyo do ambo se nan bagaya2 sajo, tapi sekedar untuak gaya manulih sajo..kok basuo awak tantu bahaso minang nan manyalinok awak ma ota..sanak.
Apobuliah buek hari sinayan minggu kapatang libur nasional hari rayo umaik Hindu Nyepi, jadi masih taraso hawo di hari sinayan minggu kini nan mambuek awak sarupo lagu Bob Geldof..Tell me why ...I don't like Monday...
Nan ciloteh ambo ko..yo seputar urang awak (minang.... kalau di Jakarta disabuik urang Padang) nan santiang dan tahan bantiang mancari hiduik jo paruntungan di rantau/nagari urang.Urang awak ko yo pandai dirantau urang.
Malah Pandainyo...inyo pangkek duo manjadi "Pandai-Pandai"..Kok..ka "bodoh" juo cukuik sakali rasonyo mah dirantau urang . Tibo dinagari urang dari kampuang..kok kanai atua cukuik sakali sajo dek urang..nan kaduo inyo lai maatua urang lai...
Tambah lo..jo rumus nan dibawok pai marantau......IYO...urang awak ko yo agak babeda jo IYO suku nan lain.
kok suku nan lain IYO nyo..Ngge..ngge,,ngge iyo sabana NGGE....tapi IYO urang awak "Iyokan keceknyo..laluan nan diawak".....onde..ya..padiah mah aratinyo".
Ado juo nan labiah..mantap..modal marantau ko dibawok dek urang awak "Taimpik ndak diateh, takuruang ndak dilua"..walah..kalimaik ko bisa konotasinyo positif dan negatif yo tagantuang situasi dan kondisi untuak apo digunokan..kok contohnyo sanak carilah sorang.
Tapi nan jaleh kalimaik diateh cando main bola (he..he..nan bola ko ado taruih di carito ambo..mah)...Yo..main manang taruih aratinyo Jaan kan ka Kalah podo (Seri) se indak namuah....waik yo...
Adaptasi jo lingkungan urang awak ko di nagari urang,,jaan ditanyo lai......harus diakui paliang capek bana bainteraksi social jo masyarakat tempatan, indak paralu itungan bulan, cukuik saminggu sajo inyo lah ado kontribusinyo diaktivitas social dima inyo tingga..lah sasuai lo mah pasan urang tuo sabalum inyo marantau "Ingek nak kalau di nagari urang Dima bumi dipijak disinan langik dijunjuang".
Awak sabagai urang minang cukuik bangga juo, buliah dikatokan jarang tadanga konfllik horizontal yang berbau SARA di nagari urang nan malibatkan Suku Minang, nan tadanga yo suku lain contoh nan paliang heboh tantu di Sambas Kalimantan Tengah..yo ngeri bunuah mambunuah dan parang antar suku.
Nan urang minang yo indak sato do..malah suku tempatan melindunginyo....luar biasa..ko mah labiah jauhnyo tantu urang minang di Kalteng tu bisa maharagoi dan tenggang rasonyo tinggi,,,inyo pakai " Kok manyubarang dirantau urang jaan sampai titian patah" (kok dinagari surang..tantunyo...jaan pulo mamatahkan titian dikampuang)
Iyo dirantau urang tu inyo pacik bana " Masuak kandang Kambiang mangembek, masuak kandang harimau mangaum"..tapi mudah2an kok lah jadi harimau tantu karajonyo indak manggaretak kambiang se tiok hari...halaaaah.
Sabagai contoh ambo mambaco Koran Kompas Minggu kapatang di Rubrik Kuliner urang awak marantau ka Bali, buliah dikatokan Bali jo Minang batulak balakang dari segi Agamo dan latar budaya, tapi urang awak masih ditarimo jo tangan tabukak dek urang Bali. Nan urang awak ko mambuka rumah makan namonyo "lapau" yo..aman-aman se inyo bausaho lai banyak pelanggannyo.
Masakan nan manjadi andalan RM Lapau ko adolah randang dagiang jo Ayam tu nan spesial Buntuik Asam Padeh,
Kok ado sanak bajalan-jalan ka Bali paralu dicubo makan di RM urang awak ko. Jaan makan sajo yo batanyo-tanyo sejarah inyo marantau stek baa kok bisa sampai ka Bali..tu..masuak lo ota ka masalah social adaptasi urang awak di Bali...tantu ambo sangaik baminat bana laporan wisata dunsanak nan cando iko.
Lah panjang...nampaknyo sakapua siriah dari ambo, nan carito utamo alun juo...yo..lah ambo caritokan baa duo tambah duo bisa manjadi salapan....simak elok-elok dek sanak
Urang awak pai marantau bakanyo iyo gelar sarjana nan inyo dapek di Universitas kampuang halaman ranah minang.Nan urang awak yo nampaknyo indak badagang sajo di rantau urang tarutamo kota besar sarupo Jakarta banyak nan bailmu bagala Sarjana baik tamatan didalam nagari (Sumbar) maupun dilua Nagari tarutamo pulau Jawa nan manjadi Karyawan profesinal diberbagai bidang baik Swasta maupun Negeri.
Banyak awak danga urang awak lah Megang Banget alias Mamacik Bana di Rantau urang dengan berbagai profesi memegang jabatan tinggi.
Awak sabuik la namonyo si Udin (maaf ko namo fiktif sajo, kalau ado nan samo namonyo jo warga milis yo kebetulan belaka iko pasan Pak Dosen awak Abrar sabalun ..baciloteh inyo pastikan dulu namo ko..fiktif..). Si Udin tibo di Jakarta iyo gigiah inyo mancari info dima perusahaan nan mambuka lowongan karajo sasuai jo latar belakang pandidikannyo.
Lah dapek nan katuju, si Udin mamasuakan lamarannyo, saminggu satalah lamaran sampai di perusahaan tu si Udin kanai panggia untuak wawancara.Sasuai jo wakatu disurek panggilan tu si Udin lah barado dikantua perusahaan nan mamanggianyo.
Lirak lirik suok kida tampek si Udin manunggu yo banyak mah pasaing waden si Udin mambathin, ciek demi ciek (bahasa bakunya satu persatu kale) di panggia dek bagian Personalia yang batugeh mawawancarai. Tampek wawancara nampaknyo indak tatutik bana dapek didanga materi wawancara walau sayuik-sayuik sampai ditalingo.
Nan si Udin..nampaknyo inyo pasang talingonyo tinggi-tinggi bantuak antene radio otomatis mancari sinyal,,,kiro-kiro cando itu lah..manyimak urang nan sadang wawancara.
Nan palamar partamo lah duduak dimuko urang nan batugeh untuak wawancara, ditanyo sagalo rupo pokoknyo bamacam-macam.."Nampaknyo urang subarang mah gumam si Udin mandanga logatnya nan medok tenan.
Partanyaan nan paliang pantiang diajukan dek urang perusahaan, bia ndak banyak bana tercemar carito ko jo bahaso lain kiro-kiro bahaso minangnyo sarupo ko " Yuang (Diak) bara 2 tambah 2 hasilnyo dek waang (kamu)...
Bapikia si Mas dari Jawa ko sabanta..tunggu pak..ambo (saya) ituang dulu jo jari tangan..ambo, lah inyo pisahkan jari kalingkiang jo jari manih, tu inyo baok lo kasampiang jari tangah jo jari talunjuak nan jempol inyo kalipekan..baretong inyo cando anak TK ciek..duo..tigo..ampek...
Lah jaleh mah Pak..2 tambah 2 ko..yo Ampek...Pas
Wawancara salasai..tunggu se hasilnyo diumumkan, tibo giliran salanjuiknyo,,anak mudo nampaknyo inyo masih Angek (diateh kompor kali) mah...baru tamaik kuliah..nan jaleh indak urang Minang..suku lain pokoknyo. Masuak lo pertanyaan inti wawancara...Bara dek waang 2 ditambah 2..
Maaf pak ambo ituang dulu..tapaso ambo buka sapatu ambo dulu, lah sibuk lo inyo mamisah-misahkan jari kaki nyo (Jaan sanak. Protes bantuak iko .oi Ndi tukang ciloteh..kan bisa jo jari tangan..paja tu maetong.......oppss..gw punya gaya..jadi dengerin aja ya sanak)
Ampek Pak.........iyo ndak labiah..indak kurang..pas bana..
ok lah..lah salasai wawancara..masuak giliran barikuik..nan pertanyaan inti samo sajo bara 2 tambah 2, tetap pelamar nan lain manjawek ampek.
Tibo giliran si Udin nan tapanggia, untuak wawancara, iyo stel yakin ..pede bana si Udin duduak dimuko urang nan mananyo inyo, indak nampak saketek alah juo..inyo nervous alias manggaretek pangka pahonyo gitu lho...
Lansuang ka pertanyaan inti..Udin yo...Yo..Pak, .........bara 2 tambah 2 dek waang Udin...
Ambo jawek lansuang pak..indak paralu mamilin-milin tangan jo buka sapatu ambo mah
2 ditambah 2.....SALAPAN Pak..(Masuak rumus si Udin dari kampuang..itu tadi Pandai pangkek duo..pandai pertamo yo..ampek..tantunyo pandai kaduo ampek juo..yo lah..si Udin Pandai-pandai dirantau urang)
Haaah...Salapan..baa condo itu Din..iyo tampil beda waang ruponyo dari nan lain..
Makasuik ambo Pak..2 + 2 = 8 ambiak dek apak ampek dek ambo Ampek..baa kiro-kiro Pak
Agak tapurangah urang nan mawawancara mandanga jawek si Udin ...agak dalam mah nampaknyo jawek anak ko, baitu kecek dalam hatinyo.
Yo lah Din..mokasih salapannyo..nanti kami pertimbangkan 4 dek kami 4 dek waang, tunggu sajo hasilnyo nanti kami kirim surek ka alamaik..jaan pindah-pindah kos dulu ndak di Jakarta ko..paniang kami bisuak lah dianta surek tapi angku indak disinan, tapi jaman lah canggih...bara no HP Waang Din...
Ambo pakai FREN pak...oh yo rancak mah provider tu himaik pulsa cocok untuak urang nan sadang mancari karajo..
Makasuik ambo FREN ko lain pak..satiok ambo manilipun...pai ka kawan ambo sa Kost nan alah bakarajo...Fren..fren.. (kawan..kawan)..pinjam sabanta HP angku tu....halllaaaaah..din..din.
Salasai wawancara hari tu..bagian Personalia rapek paripurna jo nan punya perusahaan, Baa bagian personalia hasilnyo tanyo Bos perusahaan ko..Nampaknyo ado surang Bos si Udin namonyo urang minang agak dalam pilosopi jaweknyo 2 tambah 2...haah..baa caritonyo manarik ruponyo....si Udin manjawek salapan..ambiak ampek dek awak..ampek dek inyo.....waw..spektakuler mah cando Gol Van Basten di Piala Eropa 88 jawek si Udin tu..(ruponyo Bos Perusahaan ko panggilo Bola juo...... sama ama gw..he..he)
Iko nan awak cari mah kecek Bos..aratinyo perusahaan awak bisa maju alias baruntuang .....labiah jauhnyo modal awak 2+2 bisa dek si Udin ko manjadio Salapan, tapi nego jo inyo..kok bisa anam dek awak duo dek inyo...ambo raso fer bana mah..kan awak nan punyo kapital. Ambo jatuahkan pilihan si Udin sajo ditarimo bakarajo di perusahaan awak..capek angku hubungi inyo..jaan lupo nego tu. ......Siap..Bos..ambo asap mamanggianyo.
Lah dipanggia si Udin baliak, inyo tamui kapalo Personalia tu. Salamaik Din..angku ditarimo bakarajo di Perusahaan kami tapi permintaan Bos nan punyo perusahaan ko..kok dapek..iyo duo tambah duo..tu lah cocok mah salapan..tapi anam dek kami....duo dek angku...lah fer tu mah Din.
Kaji manurun tu mah pak......salaman awak ambo tarimo tambah-tambah nan unik ko........ndak baa do..pak...tantunyo ambo agiah panawaran dulu..ibaraik jua bali mah bakarojo tu Pak..ado stek tawar manawar..lah pas harago barang ko mangko ka jadi jua bali (Si Udin masuak ka rumus... Iyo kan dek urang laluan dek awak..yo..santiang mah si Udin marantau)
Sip Din..ambo jawek salam angku...Deal awak..............makasuik apak..ajak lo si Del adiak ambo bakarajo disiko..inyo masih kuliah Pak di Padang duo tahun lai tamaik.........he..he..Din..ko carito lamo mah...makasuik ambo sepakat awak Ijab Kabul bagabuang di Perusahaan ko.........Oh..itu pak secara kebetulan sajo tu mah dek ambo punyo adiak namonyo si Del di Padang,,yo agak tasirok dado ambo........... Ha...aaaa...ketahuan yo Din..nan si Del ko bukan sumbarang Adiak mah...kecek urang Padang Adiak basuo Gadang,....... nan si Udin tasipu malu tabuka cokinyo...tapaso inyo iyokan.....nan iko IYO subana IYO mah....asli..lho
Iyo..iyo..Pak..Insya Allah ka calon pandampiang hiduik ambo nanti..bia lah salasai inyo kuliah dulu, samantaro ambo bakureh dulu mangumpuak kepeng bakarajo di perusahaan apak ko...........Niek nan rancak mah Din..bisuak lansuang masuak, meja untuak aangku lah kami siapkan........Tarimo kasih Pak..salam ka Bos nan maminta anam tu..
Onde..mande tusde..Waden indak suko do hari Sinayan ..mande.....weleh-weleh
Pku 25 Maret 2007
Trackback(0)
 |
TrackBack URI for this entry
Subscribe to this comment's feed
