|
 Duo tahun labiah si Udin bakarajo di Perusahaan Swasta di Jakarta,  nan wakatu wawancara duo tambah duo dek jaweknyo salapan nan agak dalam aratinyo si Udin manyingkiakan pasaingnyo.Nampaknyo si Udin dalam bakarajo yo lai professional sesuai jo baban tangguang jawek nan dipikuanyo di Kantua, jo kawan-kawan koleganyo si Udin capek beradaptasi dan disanangi dalam bagaua.
Kebetulan nan Bos Perusahaan ko panggilo bola, jadi inyo punyo klub bola di perusahaan ko, si Udin lah satolo jadi pengurus teras di klub Bola perusahaan tampek inyo bakarajo, disampiang tu si Udin punyo bakat lo dalam sipak manyipak kulik bulek ko..inyo pengurus marangkap pamain di klub.Posisi si Udin di sayok kiri Timnyo, kalau di Chelsea ampia samo perannyo jo Arjen Roben nan suko mangilik-ngilik lincah berkelit di sayok kanan daerah pertahan lawan.
Si Udin punyo spesialisasi tendangan bebas pulo, kalo lah frikik di lua saketek daerah babahayo lawan sabalah kanann inyo dek kida biasonyo si Udin nan maambiak tendangan ko, acok juo inyo mancetak gol kalau batandiang liga antar perusahaan di Jakarta .
Baitulah si Udin hari ka hari inyo lalui mancari hiduik jo peruntungan di rantau urang, di Jakarta inyo mangontrak rumah atau kos jo kawannyo nan banamo si Syamsul.Suka Duka hiduik di Jakarta nan kareh si Udin jo si Syamsul bahu mambahu ibaraiknyo ringan samo dijinjiang kok barek samo di pikua tatungkuik samo makan tanah tatilantang samo makan angin, kok si Udin dalam kesulitan si Syamsul manolongnyo baitu juo sabaliaknyo.
ado persoalan pribadi biasonyo si Udin jo si Syamsul saliang Curhat baitu kecek anak gaul Jakarta , sarupo carito dibawah ko…gamang-gamang tangguang si Udin untuak mengakhiri masa lajangnyo jo si Del nan inyo pacari sajak di bangku kuliah.
Habih magrib sasudah makan si Udin jo si Syamsul atau kawan samo gadangnyo mamanggia caro gaulnyo anak mudo Ajo, dek kampuang si Syamsul di Paris baitu urang Padang manyabuik kalau urang nan kampuang halamannyo di Pariaman dan sekitarnyo.Dek kakanyangan si Udin jo Ajo yo lah tasanda paruiknyo..ops..makasuiknyo pungguangnyo ka kursi santai nan talatak di barando rumah kosnyo..nan kaki lah disalunjuakan…
Dek Angek hari magrib manjalang Isya ko…yo tapaso Udin jo Ajo, batilanjang dado sajo leyeh-leyeh dimuko barando tu kalau kecek cando awak mangalai-ngalai sambia mancari angin kok lai liwaik dimukonyo..maklum Jakarta , angin se kadang-kadang lah susah mandapeknyo dek kota ko lah sasak jo umaik…kecek urang ba angok pun kok nan agak lamak harus mangaluakan kepeng mambali oksigen murni. Udaro Jakarta oksigennyo lah kanai polusi.
Sambia mangipehkan Koran bekas .. maota-ota lah si Udin jo si Ajo ko, Ota ko dibukak dek si Ajo nan urangnyo yo pagarah
Din den caliak dari tadi yo agak barek waang malamun, caliak lah tu ndak dado waang nan dikipeh jo Koran tapi lutuik waang….angek lutuik angku tu..apo kiro-kiro nan waang pikia Din…ado masalah barek di kantua…nan waden sabagai kawan angku…kan bisa babagi awak, jaan waang lulua se surang kok ado masalah, Inyo baa Din bakawan ko indak wakatu sanang sajo doh….susahnyo tu..samo awak raso juo.
Eh…Jo, mokasih, angku tu yo lah indak asiang lai dek waden mulai dari sakolah dasar sampai kuliah di Padang tu samo-samo lo awak marantau mancari hiduik di Jakarta ko, lah badusanak bana awak rasonyo, nan urang tuo di Padang lah cando itu lo
Indak ado do masalah Jo, Cuma yo..biasolah Jo kok umua lah buliah awak bapikia untuak bakaluarga lai, Apo lai calon ambo si Del lah tamaik kini ko inyo lah di Jakarta lo ikuik urang tuonyo nan pindah tugas kasiko.
Haaahhh..apolai nan dipikiakan Din, karajo ala nan calon angku alah ado pulo tingga urang gaek ninik mamak sajo lai tu barundiang apo susahnyo Din
Iyo agak gamang waden Jo
Gamangnyo……
Angku tahulah hiduik di Jakarta kan serba maha, memang nan waden lah duo tahun labiah bakarajo kok gaji buliah dikatokan untuak surang alhamdulillah lai balabiah, tapi kok hiduik baduo..baa yo raso-raso indak kacukuik do..joa beko waden agiah makan anak urang.
Oh..itu..nan hiduik ko yo harus di “lawan” Din..harus barani awak jaan ragu ka ragu sajo, tapi yo sebagai manusia gamang juo rasonyo..wajarlah..ambopun bantuak itu juo…tapi awak cubo baretonglah..bara bana pokok biaya bakalurga di Jakarta , ado babarapo tip beko ambo agiah tahu angku…
Cubolah etong dek angku..bara biaya hiduik baduo ambo jo si Del tu…satiok bulannyo, mudah2an lai tadayuang dek gaji ambo
Baduo awak maetongnyo..ambo kan ka mangayuah biduak rumah tangga juo Din..awak mulai jo..kampuang tangah dulu alias biaya makan tapi nan etong ko..yo hiduik himaik Din ndak ba poya-poya, asumsinyo disusun skala prioritas yo agak relative stek istilah lainnyo basic needs standar manangah ka bawah
Iyo din suai..anggap se ambo jo si Del makan 3 kali sahari baduo sakali makan 20 ribu sahari bararti 60 ribu Jo atau bisa dihimaik lah stek mungkin 50 ribu lah sahari
Cocok nan makan sapiriang baduo..co lagu dangdut..lah tingga kenangan wakatu pacaran sajo tu..karajo gilo mah sapiriang baduo..ma asupan energi awak lai..ingek..pengantin baru Din..paralu mah Gizi....he..he..tu..aktivitas karajo ko di Jakarta barangkek matohari mulai agak naik …..tibo dirumah....lah mambayang se warna jinggo di ufuak barat..yo..habih energi awak ko ma Din..tantu paralu stamina nan prima..yang asanyo dari makanan nan kayo karbohidrat, vitamin dan protein.
Waik yo Jo..Bisa aja elu (Si Udin kalua stek gaya Jakartanyo)…taruih Jo
Nah berarti sabulan sekitar 1,8 juta Din angko itu sajo awak pakai, ado tipnyo Din bia himaik..acok-acok pai kondangan, sunatan, pai mandoa kok ado hajatan disaputa tampek tingga…tu baok apo tu istilah urang betawi siko..besek yo..irit kan ..
Ha,,ha..ok..ok..ma iyokan sajo kan ndak mambayia ambo do..mandanga tip angku ko..taruih Jo
Apolai….. biaya kontrak rumah nan sadang-sadang sajo yang pantiang lingkungannyo barasiah kamar ciek, ruang tamu ado MCK didalam dapua sederhana mungkin sekitar 750.000 sa bulan..baa lai Din..Hemat..Hemat Din..awak yo sadang marintis karir di perusahaan tampek awak bakarajo..baa kecek urang Din..kok mamanjek yo dari bawah Din..jarang urang mamanjek dari pucuak..kok dari pucuak juo..ibaraiknyo,,pisang tu masak pakai karbit
Mantap Jo..mudah2an 2 tahun lai jadi Manager awak di Perusahaan masiang-masiang………….baa Tip bisa bahimaik tampek tingganyo
Sabananyo lah dapek jalan kalua mah untuak angku, nan si Del di Jakarta kan tingga dirumah urang tuonyo, yo kok manuruik adat awak ndak masalah tu do..Tingga di Pondok Mertua Indah…manjalang awak mapan…jadi biaya tu bisa ilang..mah. Di Pondok tu..bisa lo bebas stek makan apo sajo…tamasuak makan ati..Din..he..he..he, tapi apopun makannyo minumnyo tetap aia teh masuakan ka boto Din..(Si Ajo manyitir iklan minuman ringan lo nampaknyo)
Halah…bisa se angku mah..lanjuik lah …….biaya lain
Biaya listrik ambiak se Daya nan 900 Watt kiro-kiro sabulan 150 ribu cukuik mah untuak pompa aia, penerangan, TV dan peralatan listrik rumah tangga lain..Tipnyo..jiko angku mangontra rumah jo si Del , ...jaan angku pasang lo AC, cukuik angku pake AC nan ciek lai..yaitu Angin Cendela…. Men…(Si Ajo plesetan stek), tu..jaan main-main playstesien (PS2) angku baduo si Del ……himaik energi Din, cukuik bia romantis pengantin baru ko… main ula tangga, Halma..tu..untuak marancang-rancang kok barajaki nanti…..bisa lah Main Monopoli..maatur strategi bisnis dan keuangan..baa kiro-kiro.
Ah..lagi-lagi..lu punya Tip…jitu Jo..taruih..taruih..sumangaik ambo mandanganyo
Tunggu dulu..angku buekan lah waden dulu …Capuchino.angek..bia lamak awak baretong..
(lah inyo buek caphucino nan instant harago cenggo sabungkuih dek si Udin)
Ko Jo ambo buek dua cangkia…sadang angek-angeknyo..Capuchino ko…taruihlah ituangan salanjuiknyo…jadi basumangaik ambo mamikiaan ka hiduik barumah tango jo si Del , apolai inyo lah di Jakarta pulo jo urang gaeknyo
Tadi nan dietong lah sampai dima Din
Biaya listrik Jo..apolai..nan ka awak ituang biaya pengantin baru ko
Biaya transportasi Din, awak kan lah punyo Sepeda Motor pai ka kantua, nan awak bali lai lo nan irit minyak mah perkiraan ambo nantinyo kok lah bekeluarga awak biaya BBM 150.000, lah tamasuak tu angku bajalan-jalan akhir pakan jo si Del .
Lalu apo tip angku Jo, bia himaik biaya BBM ko
Apo yo Din…Angku bali Bensin campur sajo, makasuik ambo…Bensin ko di campur Dorong angku baok sepeda motor…
Lagu lamo tu jo..ndak baa do..lagu lamo..sakali-kali lamak di danga..taruih……
Atau kiko sajo..awak kan ado Klub Sepeda Motor Irit BBM..nah acok-acok nebeng ka Kantua jo anggota lain dengan alasan mempererat silahturahmi…
Itu..baru solusi nan jitu Jo…nan lain
Tunggu sabanta antusias bana angku mah..ko Capuchino lah ka dingin…lanjuik biaya Komunikasi, jaman yo lah modern bana, nan HP ko ibaraiknyo lah kebutuhan sahari-hari mah indak barang mewah lai, kok dulu angku sadang manganggur suko pakai FREN kan …Fren..Fren (Ajo..Ajo)..pinjam sabanta HP angku..lah bakarajo angku Din..lah Ba HP..apo nan angku pakai..kini
Bia Hiamaik Jo, ambo pakai CDMA..
Rancak tu..kiro-kiro sabulan awak latakan sajo biaya Komunikasi ko 200 ribu, tapi Din bia himaik ganti jo Fleksi..nampaknyo itu Tip dari ambo
Makasuik angku…… Fleksi.. kan CDMA juo tu…
Angku .. kan ka tingga di Pondok Mertua Indah samantaro…yo untuak bakomunikasi jo telpon..makasuik ambo Fleksibel gitu lo Din…sakali-kali buliah lah manalipun pakai talepon Pondok Mertua tu…ha..ha…himaikan..
Haaalllaaaaah….malu dong Din…tapi ndak baa tu do..fleksibelnyo.. kan sakali-kali..taruih Jo..samakin seru mah
Paniang sorang ambo Din..banyak juo komponen biaya hiduaik ko mah..alun kaparaluan sahari-hari, biaya kesehatan…bantuak iko se lah Din, intinyo bara pandapatan awak disasuai kan jo pengeluaran, istilahnyo Jaan gadang pasak dari pado tiang…kok gadang tiang awak paketek pasak..kok gadang pasak..yo..tapaso awak bakureh mampagadang tiang….kok ndak ado pasak..awak pakai paku..walaaaah..intinyo..yo…bakiro-kiro..paralu parituang awak dalam mengelola keuangan dalam barumah tanggo
Iyo..Jo kok diituang bara biaya bakaluarga..ko..gamang taruih awak..bisa-bisa jadi bujang lapuak awak mah..awak pijayo se ka nan Kuaso..Hiduik Mati…rajaki..jodoh lah ditanganNyo..yang pantiang awak baikhtiar sakuek tanago..kecek urang bijak nan nasib ko yo wajib awak kalahkan.. Ado satu hal yang indak bisa awak jalehkan jo paritungan bantuak diateh Jo, adolah berkah menikah, selalu Tuhan nan Kuaso akan mencukupi kebutuhan umaikNyo nan namuah barusaho dan badoa
Yo mah..lah kunci dari sagalo kunci kecek angku tu .. SO …STOP COUNTING..JUST DO IT…..DIN
Insya Allah Jo, tahun muko ambo niekan merit jo si Del. .kaduo urang tuo lah merestui hubungan kami
Abihkan lah lai Caphuchino tu Din….lah masuak wakatu Isya…ka Musajik awak…malam ko ado acara wirid pangajian
Yo..lah Jo…
Pku, 29 Maret 2007
Trackback(0)
 |
TrackBack URI for this entry
Subscribe to this comment's feed
